నామినేషన్‌ వేయకుండా అడ్డగింత?

కేటీదొడ్డి: తొలివిడత గ్రామపంచాయతీ ఎన్నికల నామినేషన్‌ ప్రక్రియ శనివారంతో ముగిసింది. మండలంలోని చింతలకుంట సర్పంచ్‌ స్థానానికి జంగం భద్రి నామినేషన్‌ వేయడానికి శనివారం క్లస్టర్‌ గ్రామమైన ఎర్సందొడ్డికి వెళ్తుండగా.. గ్రామానికి చెందిన కొందరు అడ్డుకొని నామినేషన్‌ పత్రాలు లాక్కొని వెళ్లారన్న వార్త సామాజిక మాధ్యమాల్లో చక్కర్లు కొడుతోంది. సర్పంచ్‌ అభ్యర్థి, ప్రతిపాదకుడిపై దాడికి పాల్పడ్డారంటూ గ్రామస్తులు చర్చించుకుంటున్నారు. ఇదిలా ఉండగా చింతలకుంట సర్పంచ్‌ స్థానాన్ని గ్రామపెద్దలు ఏకగ్రీవం చేస్తూ తీర్మానం చేశారని.. గ్రామాభివృద్ధికి రూ.38.50 లక్షలు ప్రకటించడంతో ఎవరూ నామినేషన్‌ వేయకుండా అడ్డుకున్నట్లు సమాచారం. ఈ విషయాన్ని ఎస్‌ఐ శ్రీనివాసులు వద్ద ప్రస్తావించగా.. ఎలాంటి గొడవ జరగలేదని, అక్కడే ఉన్నామని, ఎవరైనా నామినేషన్‌ వేయవచ్చని గ్రామస్తులకు తెలియజేశామని చెప్పారు.

సర్పంచ్‌ కోసం అంగన్‌వాడీ టీచర్‌ రాజీనామా

గోపాల్‌పేట: సర్పంచ్‌గా పోటీలో నిలిచేందుకు అంగన్‌వాడీ టీచర్‌ తన ఉద్యోగానికి రాజీనామా చేసిన ఘటన సింగాయిపల్లిలో చోటు చేసుకుంది. వివరాలు.. ఏదుల మండలంలోని సింగాయిపల్లికి చెందిన బత్తుల హరిత 28 ఏళ్లుగా మొదటి అంగన్‌వాడీ సెంటర్‌ టీచర్‌గా పనిచేస్తోంది. సర్పంచ్‌ స్థానం జనరల్‌ ఉమెన్‌కు రిజర్వ్‌ కావడంతో మొదట పోటీకి ఎవరూ ముందుకు రాలేదు. దీంతో సర్పంచ్‌కు పోటీలో ఉండాలన్న ఉద్దేశంతో బత్తుల హరిత శనివారం కొల్లాపూర్‌లోని ఐసీడీఎస్‌ ఆఫ్‌స్‌కు వెళ్లి తన ఉద్యోగానికి రాజీనామా చేశారు. అనంతరం సింగాయిపల్లి గ్రామానికి చేరుకుని కాంగ్రెస్‌ పార్టీ మద్దతుతో సర్పంచ్‌ అభ్యర్థిగా నామినేషన్‌ దాఖలు చేసింది.

పోలీసుల ముమ్మర తనిఖీలు

వనపర్తి: జిల్లా సరిహద్దు ప్రతి చెక్‌పోస్ట్‌లో ప్రత్యేక బృందాలతో అక్రమ రవాణా, డబ్బు పంపకాలు, ఎన్నికలను ప్రభావితం చేసే ప్రయత్నాలపై ప్రత్యేక తనిఖీలు చేపడుతున్నామని వనపర్తి ఎస్పీ సునీతరెడ్డి అన్నారు. శనివారం జిల్లావ్యాప్తంగా వాహన తనిఖీ నిర్వహించామని.. అనుమానాస్పదంగా తీసుకెళ్తున్న రూ.11.50 లక్షలు పట్టుబడగా సీజ్‌ చేశామని పేర్కొన్నారు. జిల్లాలో ఎన్నికల ప్రక్రియ శాంతియుతంగా, పారదర్శకంగా నిర్వహించేందుకు సిబ్బంది కట్టుదిట్టమైన చర్యలు చేపడుతున్నారని, ప్రజాస్వామ్యాన్ని డబ్బుతో ప్రభావితం చేసే ఏ ప్రయత్నాన్ని సహించమన్నారు. ఎన్నికల సమయంలో రూ.50 వేల కంటే ఎక్కువ నగదు తీసుకెళ్లరాదని.. ఎక్కువ నగదు ఉంటే స్పష్టమైన ఆధారాలు చూపించాలని, లేదంటే తక్షణమే స్వాధీనం చేసుకొని ఎన్నికల నియమావళి ప్రకారం చట్టపరమైన చర్యలు చేపడతామని హెచ్చరించారు. ఎన్నికల సమయంలో డబ్బు పంపిణీ, రవాణా, ప్రలోబాలు గుర్తిస్తే వెంటనే పోలీసులకు సమాచారం ఇవ్వాలన్ననారు. ఎన్నికలు శాంతియుత, పారదర్శకంగా నిర్వహించేందుకు ప్రతి పౌరుడు సహకరించాలని కోరారు.

రూ.11.50 లక్షలు స్వాధీనం