కేసీఆర్‌ తాగ్య ఫలితమే తెలంగాణ

జెడ్పీసెంటర్‌ (మహబూబ్‌నగర్‌): ఉద్యమ నేత కేసీఆర్‌ తాగ్య ఫలితంగానే తెలంగాణ రాష్ట్రం ఆవిర్భవించిందని బీఆర్‌ఎస్‌ జిల్లా అధ్యక్షుడు, మాజీమంత్రి లక్ష్మారెడ్డి అన్నారు. దీక్ష దివాస్‌ను పురస్కరించుకుని బీఆర్‌ఎస్‌ పార్టీ ఆధ్వర్యంలో శనివారం పార్టీ కార్యాలయంలో ప్రత్యేక కార్యక్రమం నిర్వహించారు. అంతకు ముందు అమరవీరుల స్తూపం వద్ద నివాళులర్పించారు. అక్కడి నుంచి ర్యాలీగా పార్టీ కార్యాలయానికి చేరుకొని మాట్లాడారు. తెలంగాణ రాష్ట్ర సాధన కోసం 2001 టీఆర్‌ఎస్‌ పెట్టి ఉద్యమానికి శ్రీకారం చుట్టారని, అప్పటి నుంచి తాను కేసీఆర్‌ వెంట నడిచారని చెప్పారు. కేసీఆర్‌ అడిగిన వెంటనే ఎమ్మెల్యే పదవికి రాజీనామా చేశానన్నారు. ఆ పరిస్థితుల్లో ఎంపీగా మహబూబ్‌నగర్‌ నుంచి కేసీఆర్‌ గెలవడం, తెలంగాణ రాష్ట్రం సాధించడం జరిగిందన్నారు. వచ్చే స్థానిక సంస్థల ఎన్నికల్లో కష్టపడి పని చేయాలని, కష్టపడే వారికి మంచి గుర్తింపు ఉంటుందన్నారు. మాజీమంత్రి శ్రీనివాస్‌గౌడ్‌ మాట్లాడుతూ కాంగ్రెస్‌ పార్టీకి ఓట్లు వేసిన ప్రజలు ఇప్పుడు బాధపడుతున్నారన్నారు. రాష్ట్రం వద్దని అన్న వాళ్లు ప్రస్తుతం రాష్ట్రాన్ని ఏలుతున్నారని దుయ్యబట్టారు. భవిష్యత్‌ బీఆర్‌ఎస్‌ పార్టీదేనని 15 ఏళ్లు పార్టీ అధికారంలో ఉండడం ఖాయమన్నారు. కార్యక్రమంలో గ్రంథాలయ సంస్థ మాజీ చైర్మన్‌ రాజేశ్వర్‌రెడ్డి, మైనార్టీ కార్పొరేషన్‌ మాజీ చైర్మన్‌ ఇంతియాజ్‌, జెడ్పీ మాజీ వైస్‌ చైర్మన్‌ యాదయ్య, నాయకులు నర్సింహులు, వెంకన్న, నరేందర్‌, శివరాజు, శ్రీనివాస్‌రెడ్డి, భాస్కర్‌ తదితరులు పాల్గొన్నారు.