అనుమానాస్పద వ్యక్తులపై నిఘా పెట్టండి

మహబూబ్‌నగర్‌ క్రైం: గ్రామాల్లో అనుమానాస్పద వ్యక్తులపై ప్రత్యేకంగా ఇంటెలిజెన్స్‌ సిబ్బంది ప్రత్యేక నిఘా పెట్టాలని, ప్రత్యేక బలగాల సేవలను సమర్థవంతంగా వినియోగించుకోవాలని అత్యవసర పరిస్థితుల్లో వెంటనే స్పందించే విధంగా చర్యలు చేపట్టాలని ఎస్పీ డి.జానకి అన్నారు. స్థానిక సంస్థల ఎన్నికల నామినేషన్స్‌ చివరి రోజు సందర్భంగా మహబూబ్‌నగర్‌ మండల పరిధిలోని గాజులపేట, కోడూర్‌ గ్రామాల్లో నామినేషన్‌ కేంద్రాలు, పోలింగ్‌ కేంద్రాలను తనిఖీ చేశారు. సమస్యాత్మక పోలింగ్‌ కేంద్రాల్లో విధుల్లో ఉండే వారు మరింత అప్రమత్తంగా ఉండే విధంగా చూడాలని సూచించారు. పోలింగ్‌ కేంద్రానికి సమీపంలో ఎవరూ గుంపులు, గుంపులుగా ఏర్పడకుండా నిరోధించాలన్నారు. ప్రజలతో ఎస్పీ నేరుగా మాట్లాడుతూ పోలీసుల నుంచి ఎలాంటి సహాయం కోరుకుంటున్నారో అడిగి తెలుసుకున్నారు. ప్రజలు ప్రశాంతంగా ఓటు హక్కు వినియోగించుకునే విధంగా ప్రశాంత వాతావరణంతో పాటు భద్రత చర్యలు తీసుకుంటామన్నారు. ఎన్నికల ప్రక్రియ సాఫీగా సాగేందుకు ప్రతి పోలీస్‌ అధికారి, సిబ్బంది బాధ్యతతో అప్రమత్తంగా విధులు నిర్వహించాలన్నారు.