మద్దతు ఇస్తే సరే.. లేకుంటే రెబలే..!

సాక్షి, మహబూబాబాద్‌: మొదటి విడత పంచాయతీ ఎన్నికల నామినేషన్ల స్వీకరణ శనివారంతో ముగిసింది. అయితే ఐదు మండలాల్లోని అత్యధిక గ్రామాల్లో పార్టీల మద్దతుపై సయోధ్య కుదరలేదు. దీంతో ఎలాగైనాసరే పోటీలో నిలబడి సత్తాచాటి బలం నిరూపించుకుంటామనే ధీమాతో నాయకులు ఉన్నారు. నామినేషన్లు వేసి పోటీకి సిద్ధమయ్యారు. ఇందులో అత్యధికంగా అధికార పార్టీలో మహబూబాబాద్‌ ఎమ్మెల్యే మురళీ నాయక్‌, ఎంపీ బలరాం నాయక్‌, ముఖ్యమంత్రి సలహాదారులు వేం నరేందర్‌ రెడ్డి వర్గీయులు ఎవరికివారుగా పోటీలో నిలిచారు. వీరి పోటీ.. నాయకులకు తలనొప్పిగా మారే అవకాశం ఉంది. దీంతో ఎవరిని బుజ్జగించి పోటీ నుంచి తప్పించాలో పాలుపోక నాయకులు తలపట్టుకున్నారు.

● నెల్లికుదరు మండలంలోని 31 గ్రామ పంచాయతీలు, 280 వార్డులకు ఎన్నికలు జరుగుతున్నాయి. ఇందులో 20 పంచాయతీల్లో కాంగ్రెస్‌ పార్టీ నుంచి రెబల్స్‌ బరిలోదిగారు. నేనాల, మునిగలవీడు, ఎర్రబెల్లిగూడెం గ్రామాల్లో ఎక్కువ మంది పోటీ పడుతున్నారు. నెల్లికుదురు మండల కేంద్రంలో బీఆర్‌ఎస్‌ పార్టీనుంచి ఇద్దరు పోటాపోటీగా నామినేషన్లు వేశారు.

● గూడూరు మండలంలో 41 పంచాయతీలు, 354 వార్డులకు ఎన్నికలు జరుగుతున్నాయి. ఇందులో ఎమ్మెల్యే మురళీ నాయక్‌, ఎంపీ బలరాం నాయక్‌ వర్గాలకు చెందిన కార్యకర్తలు పోటా పోటీగా నామినేషన్లు వేశారు. ఇందులో నియోకవర్గంలోని ప్రధాన నాయకులు ఉన్న గూడూరు మండల కేంద్రంలో ఎమ్మెల్యే వర్గానికి చెందిన సునిత, ఎంపీ వర్గానికి చెందిన అనిత పోటీ పడుతున్నారు. వీటితోపాటు పొనుగోడు, రాములుతండా, మచ్చెర్ల, గోవిందాపురం, అప్రాజ్‌పల్లితోపాటు 30 గ్రామ పంచాయతీల్లో కాంగ్రెస్‌ పార్టీకి రెబల్స్‌ బెడద తప్పడం లేదు.

● మహబూబాబాద్‌ రూరల్‌ మండలంలో 41 గ్రామ పంచాయతీలు, 338 వార్డులకు ఎన్నికలు జరుగుతున్నాయి. ఇందులో ఎమ్మెల్యే మురళీ నాయక్‌ సొంత తండా సోమ్లాతండాతోపాటు, కంబాలపల్లి, చోక్లాతండా, జంగిలిగొండ గ్రామాలతోపాటు 15 గ్రామాల్లో కాంగ్రెస్‌ పార్టీకి రెబల్స్‌ అభ్యర్థులు నామినేషన్లు వేశారు.

● ఇనుగుర్తి మండలంలో 13 పంచాయతీలు, 112 వార్డులకు ఎన్నికలు జరుగుతున్నాయి. ఇందులో మండల కేంద్రం ఇనుగుర్తిలో సర్పంచ్‌ పదవి కోసం కాంగ్రెస్‌ పార్టీ నుంచి ఎమ్మెల్యే, ఎంపీ వర్గాల నుంచి నలుగురు నామినేషన్‌ వేశారు. చిన్నముప్పారం గ్రామంలో కాంగ్రెస్‌ నుంచి నలుగురు, బీఆర్‌ఎస్‌ నుంచి ముగ్గురు, నామినేషన్లు వేశారు. మీట్యాతండా పంచాయతీలో కాంగ్రెస్‌, బీఆర్‌ఎస్‌ మద్దతుదారులు పదిమందికిపైగా సర్పంచ్‌ పదవికి నామినేషన్లు వేశారు.

● కేసముద్రం మండలంలో 29 పంచాయతీలు, 254 వార్డులకు ఎన్నికలు జరుగుతున్నాయి. ఇందులో కోమటిపల్లి, కల్వల, ఉప్పరపల్లితోపాటు పలు గ్రామాల్లో కాంగ్రెస్‌ పార్టీలోని ఎమ్మెల్యే మురళీనాయక్‌, సీఎం సలహాదారు వేం నరేందర్‌ రెడ్డి అనుచరులు సర్పంచ్‌ పదవికోసం పోటీ పడుతున్నారు.

అధికార కాంగ్రెస్‌కు రెబల్‌ బెడద

ప్రముఖుల గ్రామాల్లో పోటా పోటీ

బరిలో నిలిచి సత్తా చాటుతామని ధీమా

వర్గాలుగా విడిపోయిన నాయకులు

మద్దతు ఇస్తే సరే.. లేకుంటే రెబలే..!