అవమానంపై పాలకవర్గం ఆగ్రహం

చిలకలపూడి(మచిలీపట్నం): జిల్లా పరిషత్‌ నిధు లతో తమకు కేటాయించిన పనులను అర్ధంతరంగా నిలిపివేస్తూ జెడ్పీ సీఈఓ కన్నమనాయుడు ఇచ్చిన ఆదేశాలను వెనక్కు తీసుకోవాలని జెడ్పీటీసీ సభ్యులు డిమాండ్‌ చేశారు. చైర్‌పర్సన్‌ ఉప్పాల హారిక, పాలక వర్గ సభ్యుల ప్రమేయం లేకుండా ఏకపక్షంగా నిర్ణయం తీసుకోవడం ఏమిటని ఆగ్రహం వ్యక్తం చేశారు. జెడ్పీ సర్వసభ్య సమావేశం జెడ్పీ కన్వెన్షన్‌ హాలులో చైర్‌పర్సన్‌ ఉప్పాల హారిక అధ్యక్షతన శనివారం జరిగింది. తొలుత చైర్‌పర్సన్‌ హారిక మాట్లాడుతూ.. ఈ నెల 24వ తేదీన పంచాయతీ రాజ్‌, ఆర్‌డబ్ల్యూఎస్‌కు సంబంధించి జెడ్పీటీసీ సభ్యులకు ఆయా మండలాల్లో కేటాయించిన 424 పనులను నిలిపివేస్తూ సీఈఓ ఆదేశాలు ఇచ్చారని, తనతో, పాలకవర్గ సభ్యులతో సంబంధం లేకుండా ఏకపక్షంగా నిర్ణయం తీసుకున్నారని తెలిపారు. జెడ్పీటీసీ సభ్యుల ఆమోదంతో తీసుకోవాల్సిన నిర్ణయాన్ని సీఈఓ ఏకపక్షంగా తీసుకోవడం తనను, పాలకవర్గ సభ్యులను అవమానించినట్లేనని ఆవేదన వ్యక్తం చేశారు. ఈ నెల 26వ తేదీన రాజ్యాంగ దినోత్సవం రోజు మహిళ చైర్‌పర్సన్‌ అని కూడా చూడకుండా వ్యక్తిగతంగా విమర్శించడం బాధకలిగించిందన్నారు. దీంతో సభ్యులు ఒక్కసారిగా సీఈఓ నిర్ణయంపై ఆగ్రహం వ్యక్తం చేశారు. గత సమావేశంలో బడ్జెట్‌ ప్రకారం సభ్యులంతా ఏకగ్రీవంగా తీర్మానం చేసి ఆమోదించిన పనులను ఏ విధంగా రద్దు చేస్తారని ప్రశ్నించారు. సీఈఓ కన్నమనాయుడు మాట్లా డుతూ.. జెడ్పీలో నిధులు లేకపోవడంతోనే తాను ఈ నిర్ణయం తీసుకోవాల్సి వచ్చిందన్నారు. బడ్జెట్‌లో రూపొందించిన ప్రకారం రానున్న రోజుల్లో రూ.20 కోట్ల వరకు స్టాంపు డ్యూటీ నిధులు వస్తాయని, వాటిని అభివృద్ధి పనులకు కేటాయించామని చైర్‌ పర్సన్‌ హారిక పేర్కొన్నారు. నిధులు వచ్చే అవకాశం ఉన్నప్పుడు పనులను ఎలా రద్దు చేస్తారని నిలదీశారు. ఉమ్మడి జిల్లా వ్యాప్తంగా 424 పనులు కేటాయించామని, ఇప్పకే 50 శాతం పనులు పూర్తయ్యాయని, మిగిలినవి వివిధ దశల్లో ఉన్నాయని, అయితే పనులు ప్రారంభం కాలేదని లేఖలు రాయడం ఉద్దేశపూర్వకంగా నిర్ణయం తీసుకోవడం కాదా అని నిల దీశారు. తమను అవమానించేందుకు, తమ మనోభావాలను దెబ్బతీయడమే లక్ష్యంగా ఏకపక్షంగా నిర్ణయం తీసుకున్నారని మండిపడ్డారు. ఎన్నో సార్లు తనను అవమానించినా పట్టించుకోలేదని పేర్కొ న్నారు. ఇప్పుడు పాలకవర్గాన్నే అవమానించారని మండిపడ్డారు.

ప్రాణంకన్నా పరువే ముఖ్యం

చైర్‌పర్సన్‌ ఉప్పాల హారిక మాట్లాడిన అనంతరం జెడ్పీటీసీ సభ్యులు సీఈఓ వైఖరికి నిరసనగా పోడియం వద్దకు వచ్చి వాగ్వాదానికి దిగారు. తమ పరిధిలో పనులను నిలిపివేయడం అవమానంగా భావిస్తున్నామని, తాము ప్రాణంగా కన్న పరువు ముఖ్యంగా బతుకుతామని, ఇప్పుడు గ్రామస్థులకు ఏం సమాధానం చెప్పాలని ప్రశ్నించారు. తమ ప్రమేయం లేకుండా, అత్యవసర సమావేశం నిర్వహించకుండా ఏకపక్షంగానే నిర్ణయం తీసుకున్నారని ఆగ్రహం వ్యక్తం చేశారు. సీఈఓకు వ్యతిరేకంగా నినాదాలతో హోరెత్తించారు.

నల్లబ్యాడ్జీలతో నిరసన

పోడియం ముందు నినాదాలతో మూడు గంటలపాటు నిరసన తెలిపినా సీఈఓలో స్పందన రాకపోవడంతో సభ్యుల్లో మరింత ఆగ్రహం వ్యక్తమైంది. జెడ్పీ చరిత్రలో ఎన్నడూ లేని విధంగా సీఈఓ వ్యవ హరిస్తున్నారని, పనులను రద్దు చేస్తూ జారీ చేసిన ఉత్తర్వులను తక్షణమే వెనక్కు తీసుకోవాలని రెడ్డిగూడెం, ముసునూరు జెడ్పీటీసీ సభ్యులు విజయభాస్కరరెడ్డి, ప్రతాప్‌, పెనుగంచిప్రోలు, గన్నవరం ఎంపీపీలు మార్కపూడి గాంధీ, అనగాని రవి మిగిలిన సభ్యులతో కలిసి డిమాండ్‌ చేశారు. సీఈఓను సస్పెండ్‌ లేదా బదిలీ చేయాలని కోరారు. అప్పటికీ అధికారుల్లో స్పందన లేకపోవడంతో నల్లబ్యాడ్జీలు ధరించి భోజన విరామ సమయం అయినా బయటకు వెళ్లకుండా నాలుగు గంటల పాటు ఆందోళన చేశారు. దీంతో కృష్ణా జిల్లా కలెక్టర్‌ డి.కె.బాలాజీ జోక్యం చేసుకుని కేటాయించిన పనుల్లో ప్రారంభించినవి, వివిధ దశల్లో ఉన్న వాటికి నిధులు విడుదలయ్యేలా చర్యలు తీసుకుంటానని, ఆదాయవనరులు రాగానే మిగిలిన పనులు చేసేలా చూస్తానని హామీ ఇచ్చారు.

వెనక్కు తగ్గిన సీఈఓ

కలెక్టర్‌ హామీ ఇచ్చానా సభ్యులు ఆందోళన కొనసాగించడంతో సీఈఓ కన్నమనాయుడు స్పందించి తాజా ఉత్తర్వులు ఇస్తానని హామీ ఇచ్చారు. సభ్యులు లేవనెత్తిన అంశాలను పరిశీలించానని, ఇంజినీరింగ్‌ అధికారుల నివేదికల్లో తప్పులున్నట్లు తెలుస్తోందని పేర్కొన్నారు. ప్రారంభించిన పనులు కూడా ప్రారంభం కాలేదని ఇంజినీరింగ్‌ అధికారులు ఇచ్చిన ప్రాథమిక నివేదికలో ఉందన్నారు. తప్పులను సరిచేసి సభ్యులకు ఇబ్బంది లేకుండా తాజా ఉత్తర్వులు జారీ చేస్తానన్నారు. చైర్‌పర్సన్‌ ఉప్పాల హారిక సూచనల ప్రకారం ప్రాధాన్యతా క్రమంలో పనులకు నిధులు కేటాయిస్తానని చెప్పడంతో సభ్యులు ఆందోళనను విరమించారు. ఎన్టీఆర్‌ జిల్లా జాయింట్‌ కలెక్టర్‌ ఇలక్కియా, నూజివీడు సబ్‌ కలెక్టర్‌ వినూత్న, ఉమ్మడి జిల్లా అధికారులు పలువురు పాల్గొన్నారు.