హైవేపై నెత్తుటి ధార

కంచికచర్ల: హైదరాబాద్‌ – విజయవాడ జాతీయ రహదారి (హైవే 65) నిత్యం రక్తమోడుతోంది. ఎక్కడో ఒక చోట రోజూ జరుగుతున్న రోడ్డు ప్రమాదాల్లో నెత్తుటి ధారకడుతోంది. ఈ రహదారిపై నిత్యం వేలాదిగా వాహనాల రాకపోకలు కొనసాగుతున్నాయి. హైవే డిజైన్‌లో ఉన్న లోపాలే రోడ్డు ప్రమాదాలకు కారణాలని విశ్లేషకులు పేర్కొంటు న్నారు. ఎన్టీఆర్‌ జిల్లా జగ్గయ్యపేట నియోజకవర్గం పరిధిలోని గరికపాడు చెక్‌పోస్టు నుంచి విజయవాడ వరకు 90 కిలో మీటర్ల జాతీయ రహదారి విస్తరించి ఉంది. ఈ పరిధిలో ఏదో ఒక చోట రోజూ జరుగుతున్న ప్రమాదాల్లో ఎంతో మంది ప్రాణాలు కోల్పోతున్నారు. మరి కొందరు క్షతగాత్రులవుతు న్నారు. నిత్యం ప్రమాదాలు జరుగుతున్నా సంబంధిత అధికారులు మాత్రం వాటి నివారణ దిశగా చర్యలు తీసుకోవడం లేదన్న ఆరోపణలు వెల్లువెత్తుతున్నాయి.

ప్రైవేటు బస్సులదే అగ్రస్థానం

జాతీయ రహదారిపై ఎక్కువగా బస్సులు, కార్లు, ద్విచక్రవాహనాల వల్ల ప్రమాదాలు జరుగుతున్నాయి. ఎక్కువగా ప్రైవేటు బస్సుల వల్ల ప్రమాదాలు జరగడం గమనార్హం. మితిమీరిన వేగంతో బస్సులు నడపటం వల్ల ప్రమాదాలు జరుగుతున్నాయి. ట్రాఫిక్‌ నిబంధనలు పాటించకపోవటంతో పాటు పరిమితికి మించి ప్రయాణికులను ఎక్కిం చటం ప్రమాదాలకు కారణమేనని నిపుణులు పేర్కొంటున్నారు. కొన్ని సార్లు డ్రైవర్ల నిర్లక్ష్యం, మద్యం తాగి వాహనాలు నడపటం వల్ల ప్రమాదాలు జరుగుతున్నాయి.

డిజైన్‌ లోపం

నేషనల్‌ హైవే అథారిటీ ఆఫ్‌ ఇండియా అధికారులు 65వ నంబరు జాతీయ రహదారి నిర్మాణానికి సక్రమంగా డిజైన్‌ చేయకపోవడం వల్లే ప్రమాదాలు జరుగుతున్నాయని పలువురు విశ్లేషకులు పేర్కొంటున్నారు. జాతీయ రహదారిపై ప్రమాదాలు జరిగే స్థలాలను గుర్తించకపోవటంతో పాటు అవసరమైన ప్రదేశాలు, మలుపుల వద్ద ప్రమాద సూచికలు, హెచ్చరిక బోర్డులు, రోడ్డు క్రాస్‌ చేసే వద్ద జీబ్రా గుర్తులు లేకపోవటం వల్ల ప్రమాదాలు జరుగుతున్నాయని వివరిస్తున్నారు.

పోలీసులు గుర్తించిన బ్లాక్స్‌స్పాట్‌లు

జాతీయ రహదారిపై నిత్యం ప్రమాదాలు జరుగుతున్న ప్రాంతాలను పోలీసులు బ్లాక్‌ స్పాట్‌లుగా గుర్తించారు. జగ్గయ్యపేట నుంచి గొల్లపూడి వరకు 30 బ్లాక్‌ స్పాట్లు ఉన్నాయని తేల్చారు. జగ్గయ్య పేట పరిధిలో షేర్‌మహ్మద్‌ పేట క్రాస్‌ రోడ్డు, తిరు మలగిరి క్రాస్‌రోడ్డు, గట్టు భీమవరం క్రాస్‌రోడ్డు, కొణకంచి క్రాస్‌రోడ్డు, నవాబుపేట, తోటచర్ల, నంది గామ పరిధిలో మునగచర్ల, అనాసాగరం, వై జంక్షన్‌, అంబారుపేట వద్ద, కీసర సమీపంలో మద్రాస్‌ కేఫ్‌, బీజేటీ డిగ్రీ కళాశాల క్రాస్‌ వద్ద, పేరకలపాడు క్రాస్‌రోడ్డు, కంచికచర్ల చెరువుకట్ట వద్ద, పరిటాల ఆంజనేయస్వామి విగ్రహం సమీపంలో, దొనబండ క్రాస్‌రోడ్డు, ఇబ్రహీంపట్నం పరిధిలో కేతనకొండ, మూల పాడు, నిమ్రా మెడికల్‌ కాలేజీ వద్ద, పశ్చిమ ఇబ్రహీంపట్నం, వీటీపీఎస్‌కు వెళ్లే కెనాల్‌, రాయనపాడు క్రాస్‌రోడ్డు, నల్లకుంట పలు ప్రాంతాల్లో పోలీసులు బ్లాక్‌ స్పాట్‌లను గుర్తించారు. ఈ ప్రాంతంలో నిత్యం ప్రమాదాలు జరుగుతున్నాయి. ఇటీవల నందిగామ సమీపంలోని అనాసాగరం వద్ద ఈ నెల 18వ తేదీ తెల్లవారుజామున హైదరాబాద్‌ నుంచి శ్రీకాకుళం వెళ్తున్న కావేరీ ట్రావెల్స్‌ బస్సు సుగర్‌లోడుతో వెళ్తున్న లారీని వేగంగా వచ్చి ఢీకొంది. ఈ ఘటనలో నలుగురు తీవ్రంగా, మరో ఎనిమిది మందికి స్వల్పంగా గాయపడ్డారు. బస్సు ముందు భాగం నుజ్జునుజ్జయింది. ఇటీవల మునగచర్ల వద్ద జరిగిన ప్రమాదంలో ఒకరు మృతి చెందగా మరొకరు తీవ్రంగా గాయపడ్డారు. ఈ నెల 28న నందిగామ సమీపంలోని అనాసాగరం వద్ద టైర్‌ పంక్చరయి రోడ్డుపై ఆగిఉన్న లారీని హైదరాబాద్‌ వైపు నుంచి వస్తున్న కారు ఢీకొన్న ప్రమాదంలో ఒకరు మృతి చెందగా మరో ముగ్గురికి తీవ్రగాయాలయ్యాయి. జగ్గయ్యపేట మండలం తిరుమలగిరి రోడ్డు వద్ద అదుపుతప్పి పల్టీ కొట్టిన మరో ప్రమాదంలో ఒకరు మృతి చెందగా ఐదుగురికి తీవ్రగాయాలయ్యాయి.

ఎన్టీఆర్‌ జిల్లా పరిధిలో హైవేపై రెండేళ్లలో జరిగిన ప్రమాదాల్లో 754 మంది విలువైన ప్రాణాలు కోల్పోయారు. మరో 1500 మంది వరకు గాయాలపాలయ్యారని పోలీస్‌ అధికారులు తెలిపారు. బ్లాక్‌ స్పాట్‌లుగా గుర్తించిన ప్రాంతాల్లో మొక్కబడిగా ప్లాస్టిక్‌ డ్రమ్ములు మాత్రమే ఏర్పాటు చేశారు. రోడ్డు ప్రమాదాల నియంత్రణకు ఎటువంటి చర్యలు చేపట్టకపోవటంతో నిత్యం ప్రమాదాలు జరుగుతున్నాయి. బ్లాక్‌ స్పాట్‌ల వద్ద ప్రమాద హెచ్చరిక బోర్డులతో పాటు జీబ్రా గుర్తులు, రెడ్‌ సిగ్నల్‌ లైట్లు ఏర్పాటు చేయాలని పలువురు కోరుతున్నారు.

హైవేపై నెత్తుటి ధార

హైవేపై నెత్తుటి ధార