రైతు సేవా కేంద్రాల ద్వారా ధాన్యం విక్రయించాలి

రామవరప్పాడు: రైతు సేవా కేంద్రాల ద్వారా ధాన్యం విక్రయించాలని, దళారులను నమ్మవద్దని ఎన్టీఆర్‌ జిల్లా కలెక్టర్‌ డాక్టర్‌ జి.లక్ష్మీశ రైతులకు సూచించారు. విజయవాడరూరల్‌ మండలం నిడమానూరు, ఎనికేపాడు గ్రామాల్లో కలెక్టర్‌ శనివారం పర్యటించారు. ఈ సందర్భంగా రైతులు ఆరబెట్టిన ధాన్యాన్ని పరిశీలించారు. ధాన్యం విక్రయించడంలో ఏమైనా ఇబ్బందులు ఉన్నాయా అని రైతులను ప్రశ్నించారు. ఎనికేపాడులోని వీరయ్య రైస్‌ మిల్లును తనిఖీ చేశారు. ఈ సందర్భంగా కలెక్టర్‌ లక్ష్మీశ మాట్లాడుతూ.. జిల్లాలో 150 రైతు సేవా కేంద్రాల ద్వారా ధాన్యం కొనుగోళ్లు జరుగుతున్నాయని తెలిపారు. ప్రస్తుతం జిల్లాలో 13,70,700 గోనె సంచులు ఉన్నాయని పేర్కొన్నారు. ధాన్యం రవాణాకు 1,450 వాహనాలు అందుబాటులో వివరించారు. ఆర్డీఓ కావూరి చైతన్య, పలు శాఖల అధికారులు పాల్గొన్నారు.

హంసల దీవి బీచ్‌

గేట్లు మూసివేత

కోడూరు: తుపాను ప్రభావంతో సముద్రం అల్లకల్లోలంగా మారిన నేపథ్యంలో హంసలదీవి బీచ్‌ గేట్లను రెండు రోజుల పాటు మూసివేస్తున్నట్లు ఫారెస్ట్‌ రేంజర్‌ శ్రీసాయి శనివారం ప్రకటించారు. సముద్రంలో అలలు ఉవ్వెత్తున ఎగసిపడడంతో పాటు నీరు ముందుకు చొచ్చుకొచ్చిందని తెలిపారు. సముద్ర స్థితిగతులతో పాటు భారీ వర్షాల నేపథ్యంలో పర్యాటకుల భద్రత దృష్ట్యా ఈ నెల 30, డిసెంబర్‌ ఒకటో తేదీన బీచ్‌ గేట్లను మూసివేస్తున్నామని పేర్కొన్నారు. తీరంలోకి పర్యాటకులను నిషేధించామని స్పష్టంచేశారు. పర్యాటకులు బీచ్‌కు రావద్దని కోరారు. బీచ్‌ వద్ద పరిస్థితుల బట్టి గేట్లు తెరిచే తేదీని త్వరలో ప్రకటిస్తామని శ్రీసాయి తెలిపారు.

పెనమలూరు: పెనమలూరు మండలంలోని కానూరులో ఉన్న సిద్ధార్థ డీమ్డ్‌ టుబీ యూనివర్సీటీలో మొదటి ఏడాది ఎంబీఏ విద్యార్థి షేక్‌ కాజామొహిద్దీన్‌ భారత విశ్వవిద్యాలయాల జట్టుకు ఎంపికయ్యారని యూనివర్సిటీ ఫిజి కల్‌ డైరెక్టర్‌ పి.రఘు తెలిపారు. ఆయన శనివారం వివరాలు తెలుపుతూ డిసెంబర్‌ ఏడు నుంచి 19వ తేదీ వరకు ఆస్ట్రేలియాలో జరగనున్న క్రికెట్‌ పోటీల్లో భారత విశ్వవిద్యాలయ జట్టు నుంచి ఆడతాడన్నారు. ఇండియన్‌ ఇంటర్‌ యూనివర్సిటీ పోటీల్లో ఉత్తమ ప్రతిభ చూపడంతో జట్టులో స్థానం దక్కిందన్నారు. ఈ సందర్భంగా కాలేజీలో శనివారం కులపతి కేవీ చౌదరి, ఉపకులపతి డాక్టర్‌ పి.వెంకటేశ్వరరావు, ప్రో ఉపకులపతి డాక్టర్‌ ఎ.వి.రత్న ప్రసాద్‌ క్రికెట్‌ జట్టుక ఎంపికై న కాజామొహిద్దీన్‌ను అభినందించారు.

గాంధీనగర్‌(విజయవాడసెంట్రల్‌): ఏపీ బీసీ స్టడీ సర్కిల్‌, విజయవాడ ద్వారా సివిల్‌ సర్వీ సెస్‌ పరీక్షలకు ఉచిత శిక్షణ కోసం దరఖాస్తుల స్వీకరణ గడువు పొడిగించినట్లు స్టడీ సర్కిల్‌ డైరెక్టర్‌ కె.లక్ష్మీదేవి శనివారం ఒక ప్రకటనలో తెలిపారు. అర్హత కలిగిన బీసీ, ఎస్సీ, ఎస్టీ వర్గాలకు చెందిన విద్యార్థులు వచ్చే నెల మూడో తేదీ లోగా తమ దరఖాస్తులను విజయవాడ కార్యాలయంలో సమర్పించాలని కోరారు. అభ్యర్థులకు డిసెంబర్‌ ఏడో తేదీన స్క్రీనింగ్‌ టెస్ట్‌ నిర్వహించనున్నట్లు చెప్పారు. అభ్యర్థులు ఈ సదావకాశాన్ని సద్వినియోగం చేసుకోవాలని కోరారు. అర్హత కలిగిన అభ్యర్థులు జిల్లా వెనుకబడిన తరగతుల సంక్షేమ, సాధికారత అధికారి కార్యాలయం లేదా 9966849937, 9505094349, 86888 55255 సెల్‌ నంబర్లలో సంప్రదించాలని కోరారు.

రైతు సేవా కేంద్రాల ద్వారా ధాన్యం విక్రయించాలి

రైతు సేవా కేంద్రాల ద్వారా ధాన్యం విక్రయించాలి