వైద్య కళాశాలల ప్రైవేటీకరణపై ‘నిరసన’ సంతకం

లబ్బీపేట (విజయవాడతూర్పు): నూతన వైద్య కళాశాలల విషయంలో ప్రభుత్వ తీరుపై నిరసన సంతకాలు వెల్లువెత్తుతున్నాయి. వైద్య కళాశాలల ప్రైవేటీకరణ వద్దంటూ ప్రజలంతా సంతకాలతో చంద్రబాబు ప్రభుత్వానికి తేల్చిచెబుతున్నారు. వైఎస్సార్‌ సీపీ ఆధ్వర్యంలో నిర్వహించిన రచ్చబండ శిబిరాల వద్దకు ప్రజలు స్వచ్ఛందంగా వచ్చి సంతకాలు చేస్తున్నారు. ఈ విషయంలో తమ సంపూర్ణ మద్దతు ఇస్తున్నామంటూ అన్ని వర్గాల ప్రజలు బాహాటంగా ప్రకటిస్తున్నారు. ఈ క్రమంలో విజయవాడ తూర్పు నియోజకవర్గంలో నిర్వహించిన సభల్లో ఏకంగా 95 వేల మందికి పైగా సంతకాలు చేశారు. ఇందులో టీడీపీ మద్దతుదారులు కూడా పాల్గొనడం బాబు ప్రభుత్వ దుర్మార్గ విధానాలపై ప్రజల వ్యతిరేకతకు అద్దం పడుతోంది. వైఎస్సార్‌ సీపీ అధినేత, మాజీ ముఖ్యమంత్రి వైఎస్‌ జగన్‌మోహన్‌రెడ్డి రాష్ట్ర వ్యాప్తంగా రచ్చబండ కార్యాక్రమాల ద్వారా కోటి సంతకాలు సేకరించి గవర్నర్‌కు అందించాలని నిర్ణయించిన సంగతి తెలిసిందే.

ప్రభుత్వ వైద్య కళాశాలలను పీపీపీ పేరుతో ప్రైవేటీకరణ చేస్తూ చంద్రబాబు ప్రభుత్వం చేస్తున్న ప్రజా వ్యతిరేక విధానాలను సంతకాల సేకరణ ద్వారా ప్రజల్లోకి తీసుకెళ్లాం. ఈ కార్యక్రమంలో ప్రతి కార్యకర్త కష్టపడి పని చేశారు. ప్రభుత్వం తీసుకున్న నిర్ణయం దుర్మార్గమైందని తమ సంతకం ద్వారా ప్రజలు తేల్చిచెబుతున్నారు.

– దేవినేని అవినాష్‌, వైఎస్సార్‌ సీపీ ఇన్‌చార్జి, విజయవాడ తూర్పు నియోజకవర్గం

వైద్య కళాశాలల ప్రైవేటీకరణపై ‘నిరసన’ సంతకం