నీరివ్వకుంటే పరిహారం కావాలి

సాక్షి,బళ్లారి: కర్ణాటక, ఆంధ్రప్రదేశ్‌, తెలంగాణ రాష్ట్రాల పరిధిలోని పలు జిల్లాలకు తాగు, సాగునీరందించే ఉమ్మడి జలాశయం తుంగభద్ర డ్యాం నుంచి రబీ పంటకు నీరు ఇవ్వకపోతే ప్రతి ఎకరాకు రూ.25 వేల చొప్పున నష్టపరిహారం ఇవ్వాల్సిందేనని రైతుల ఆందోళనలు కొనసాగుతున్నాయి. శనివారం జిల్లాలోని సిరుగుప్ప పట్టణంలో బీజేపీ రైతు మోర్చా, మాజీ ఎమ్మెల్యే సోమలింగప్ప ఆధ్వర్యంలో రైతులు పెద్ద సంఖ్యలో చేరి నిరసన, ఆందోళనలు చేపట్టారు. రాష్ట్రంలో కాంగ్రెస్‌ పార్టీ అధికారంలోకి వచ్చాక రైతుల సమస్యలు పట్టించుకోకపోవడంతో రైతాంగం పూర్తిగా, అన్ని విధాలుగా నష్టపోతున్నారని మండిపడ్డారు. తుంగభద్ర డ్యాంలో రబీ పంట పండించేందుకు తగినంత నీరు ఉన్నప్పటికీ, డ్యాంలో గేట్లు మార్చాలనే సాకుతో ఏకంగా రబీ పంటకు నీటి సరఫరా నిలుపుదల చేస్తున్నారని, ఇది ఎంత మాత్రం సరైన నిర్ణయం కాదన్నారు. ముఖ్యమంత్రి కుర్చీని కాపాడుకునేందుకు సీఎం సిద్ధరామయ్య, సీఎం కుర్చీని పొందాలని డీకేశి ఇద్దరు నేతల మధ్య జరుగుతున్న రాజకీయ సమరంలో రైతుల సమస్యలను పూర్తిగా గాలికి వదిలేశారన్నారు.

ఒక వైపు విందుకు పిలిచి చర్చించుకోవడం, మరో వైపు టిఫిన్‌కు పిలిపించుకుని మాట్లాడుకోవడం ఇదే జరుగుతోంది కాని, రాష్ట్రంలో రైతుల, ప్రజల సమస్యలు గాలికి వదిలివేయడంతో రాష్ట్రంలో పాలన అధ్వానంగా మారిపోయిందన్నారు. తుంగభద్ర డ్యాంలో 33 గేట్లు మార్చాలని గత ఏడాది సూచిస్తే ఎందుకు సరైన సమయంలో పనులు పూర్తి చేయలేదని ఆగ్రహం వ్యక్తం చేశారు. రైతాంగం గురించి కనీస అవగాహన లేని వారు మంత్రులుగా కొనసాగుతున్నారన్నారు. ఈ నేపథ్యంలో రైతులకు శాపంగా మారిందన్నారు. పార్టీలకతీతంగా ఆయకట్టు రైతులందరూ రెండో పంటకు నీరు ఇవ్వాలని కోరుతున్నారన్నారు. రెండో పంట ముగిసినప్పుడు గేట్ల మరమ్మతులు లేదా మార్చడానికి వీలవుతుందని, ఈ విషయాన్ని స్వయంగా గేట్ల సంబంధిత నిపుణులు కూడా సూచించారన్నారు. మరి ఎందుకు మూర్ఖంగా ఆలోచిస్తూ రైతులకు రెండో పంటకు నీరు ఇవ్వడం లేదని ప్రకటించారో అర్ధం కావడం లేదన్నారు. రాష్ట్రంలో విస్తారంగా మొక్కజొన్న పంట పండిందన్నారు. గిట్టుబాటు ధరలు లేక రైతులకు పెట్టిన పెట్టుబడులు కూడా రావడం లేదన్నారు.

సిరుగుప్పలో మాట్లాడుతున్న మాజీ ఎమ్మెల్యే సోమలింగప్ప

సిరుగుప్పలో రైతులు చేపట్టిన ఆందోళన దృశ్యం

జిల్లాలో నిరంతరం కొనసాగుతున్న రైతుల ఆందోళనలు

రెండో పంటకు నీరు ఇవ్వకపోతే

ఎకరాకు రూ.25 వేలు ఇవ్వాల్సిందే

మొక్కజొన్నకు క్వింటాల్‌కు రూ.3500ల మద్దతు ధర ఇవ్వాలి

సిరుగుప్పలో ముక్తకంఠంతో

రైతు నాయకుల డిమాండ్‌

రైతులకు దక్కని పెట్టుబడి

ప్రభుత్వం ఏపీఎంసీల ద్వారా క్వింటాల్‌కు రూ.3500ల ధర నిర్ణయించి తీసుకోవాల్సిన అవసరం ఉందన్నారు. ప్రస్తుతం మొక్కజొన్న క్వింటాల్‌కు రూ.1500 నుంచి రూ.1700 తీసుకుంటారన్నారు. ఈ లెక్కన రైతులకు పెట్టుబడులు కూడా దక్కడం లేదన్నారు. ఆరుగాలం కష్టపడి పంట పండించిన రైతులకు పంట చేతికందిన తర్వాత రైతులకు పెట్టిన పెట్టుబడులు కూడా రాకపోతే ఆ రైతులు ఎవరికి చెప్పుకోవాలి అని ఆవేదన వ్యక్తం చేశారు. మొక్కజొన్నకు క్వింటాల్‌కు రూ.2400 కేంద్ర ప్రభుత్వం ప్రకటించిందన్నారు. ఈ ధర కూడా ఇవ్వడంలో ప్రభుత్వం మీనమేషాలు లెక్కిస్తోందన్నారు. కుర్చీ కోసం పాకులాడుతున్నారే కాని అన్ని విధాలుగా రైతన్నలను నిర్లక్ష్యం చేస్తున్నారని ఆగ్రహం వ్యక్తం చేశారు. తుంగభద్ర ఆయకట్టు రైతులకు రెండో పంటకు నీరు ఇవ్వకపోయిన పక్షంలో ప్రతి ఎకరాకు రూ.25 వేలు పరిహారం ఇవ్వకపోతే మొక్కజొన్న పంటకు గిట్టుబాటు ధర ప్రకటించకపోయినా రైతులు పెద్ద ఎత్తున ఆందోళన చేస్తామని హెచ్చరించారు. బీజేపీ యువమోర్చా అధ్యక్షుడు సిద్దప్ప, రైతు సంఘం నాయకులు శివరాంగౌడ, నాగేశప్ప, వీరభద్రగౌడ, బసవరాజు, మారేష్‌ తదితరులు పాల్గొన్నారు.

రాష్ట్రంలో పాలన అధ్వానం

నీరివ్వకుంటే పరిహారం కావాలి