రైతులు, వర్తకుల మధ్య సామరస్యత ఉండాలి

రాయచూరు రూరల్‌ : జిల్లాలో రైతులు, వర్తకుల మధ్య సామరస్యత ఉండాలని రాయచూరు జిల్లా చాంబర్‌ ఆఫ్‌ కామర్స్‌ సంఘం అధ్యక్షుడు కమల్‌ కుమార్‌ జైన్‌ పేర్కొన్నారు. శనివారం నగరంలోని ప్రైవేట్‌ హోటల్‌లో ర్యాంప్‌ పథకంలో భాగంగా కేఎస్‌ఎంసీ, జిల్లా పరిశ్రమల కేంద్రం ఆధ్వర్యంలో ఏర్పాటు చేసిన కార్యక్రమాన్ని ప్రారంభించి మాట్లాడారు. జిల్లాలో వివిధ రకాల వాణిజ్య పంటలను పండిస్తున్న నేపథ్యంలో ప్రభుత్వం నుంచి వస్తున్న సంక్షేమ పథకాల లబ్ధిని ప్రతి ఒక్కరూ సద్వినియోగం చేసుకోవాలన్నారు. కేంద్ర ప్రభుత్వం జీఎస్టీ, ఇతర సుంకాలను తగ్గించిందన్నారు. కార్యక్రమంలో పురుషోత్తం, తిప్పణ్ణ, త్రివిక్రం జోషి, లక్ష్మిరెడ్డి, చిదానంద, సతీష్‌, గురురాజ్‌ కులకర్ణి, హేమన్న, మల్లికార్జునలున్నారు.

మల్లకంబ క్రీడాకారుడు మైలారికి కళాశ్రీ అవార్డు

రాయచూరు రూరల్‌: యోగా, మల్లకంబ క్రీడా పోటీల్లో శభాష్‌ అనిపించుకుంటున్న అంధ అనాథ మైలారి కళా అవార్డు అందుకున్నాడు. గదగ్‌ జిల్లా రోణ తాలూకా హొళెఆలూరు జ్ఞాన సింధు అంధ విద్యార్థుల పాఠశాలలో 9వ ఏట పాఠశాలలో చేరారు. 2023లో మైసూరు దసరా ఉత్సవాల్లో 10 ఏళ్ల వయస్సులో యోగా పోటీల్లో పాల్గొని రాష్ట్రానికి ప్రథమ స్థానంలో నిలిచాడు. 2025 సెప్టెంబర్‌ 13న రాష్ట్ర స్థాయి ప్యారా ఒలింపిక్‌ పోటీల్లో విజయం సాధించి న్యూఢిల్లీలో జరిగిన జాతీయ స్థాయి, 2024–25 భోజన పోటీల్లో ప్రథమం, నవంబర్‌ 18న బెంగళూరులో జరిగిన మల్లకంబ పోటీల్లో రాష్ట్ర స్థాయిలో ఉత్తమ ప్రదర్శననిచ్చారు. ఇందుకు గాను శుక్రవారం బెంగళూరులో సీఎం సిద్దరామయ్య చేతుల మీదుగా కళాశ్రీ అవార్డును అందుకున్నారు.

సిద్దరామయ్యను సీఎంగా కొనసాగించాలి

రాయచూరు రూరల్‌: ప్రభుత్వంలో ముఖ్యమంత్రి పదవి నుంచి సిద్దరామయ్యను గద్దె దింపితే పార్టీ వినాశనం కావడంతో పాటు పార్టీకి పుట్టగతులు ఉండవని కురుబ సంఘం జిల్లాధ్యక్షుడు బసవంతప్ప పేర్కొన్నారు. శనివారం పాత్రికేయుల భవనంలో ఏర్పాటు చేసిన విలేఖర్ల సమావేశంలో ఆయన మాట్లాడారు. రాష్ట్రంలో ముఖ్యమంత్రి మార్పు విషయంపై తర్జనభర్జనలు జరుగుతున్న నేపథ్యంలో సిద్దూను గద్దె దింపితే 2028లో జరగబోయే విధానసభ ఎన్నికల్లో బిహార్‌లో వచ్చిన పరిస్థితులు కర్ణాటకలో నెలకొంటాయన్నారు. సిద్దరామయ్యను మార్చకుండా ఐదేళ్ల వరకు పదవిలో కొనసాగించాలన్నారు. రాష్ట్రంలో ముఖ్యమంత్రిగా అధికారం చెలాయిస్తూ పేదలను ఆదుకుంటున్న వ్యక్తి అన్నారు. పదవి నుంచి దింపితే రాష్ట్ర వ్యాప్తంగా కురుబ సమాజం పెద్ద ఎత్తున ఆందోళన చేపడుతుందన్నారు.

చలి దుప్పట్ల మాటున

పిల్లల అపహరణ

రాయచూరు రూరల్‌ : జిల్లాలో చలి దుప్పట్లు విక్రయించే వ్యక్తులు చిన్న పిల్లలను అపహరిస్తున్నట్లు వదంతులు వ్యాపించాయి. శనివారం దొంగ రాంపూర్‌, హోసూరు, లాల్‌ బహుద్దూర్‌ శాస్త్రినగర్‌, మైలార నగర్‌, నీరు బావికుంట, జలాల్‌ నగర్‌ ప్రాంతాల్లో చలికాలం దుప్పట్లను అమ్మేవారు ద్విచక్రవాహనాలపై వచ్చినట్లు వచ్చి దుప్పట్లో వారిని చుట్టుకొని దానిపై మరిన్ని దుప్పట్లు కప్పి ఎవరికీ తెలియకుండా అపహరణలకు పాల్పడుతున్నారు. శనివారం రాయచూరు తాలూకా దొంగరాంపూర్‌లో ఆరేళ్ల బాలుడిని చలి దుప్పట్లో పెట్టుకుంటున్న సమయంలో ప్రజలు చూసి పిల్లవాడిని రక్షించారు.

బాలుడిపై వీధి కుక్కల దాడి

హుబ్లీ: బాలుడిపై వీధి కుక్కలు దాడి చేసిన ఘటన విజయపుర జిల్లా నిడగుందిలో చోటు చేసుకుంది. శుక్రవారం సాయంత్రం బిలాల్‌ కాలనీలో ట్యూషన్‌ ముగించుకొని ఇంటికి వెళుతున్న మహమ్మద్‌ బానకర అనే 6 ఏళ్ల బాలుడిపై వీధి కుక్కల గుంపు ఆకస్మికంగా దాడి చేసింది. ఫలితంగా బాలుడి తొడ భాగానికి కుక్కకాట్లు తీవ్రంగా తగిలాయి. తక్షణమే కుటుంబ సభ్యులు కుక్కలను తరిమికొట్టి బాలుడిని ఆరోగ్య కేంద్రానికి తరలించి ప్రథమ చికిత్స అందింపజేశారు. అనంతరం మెరుగైన చికిత్స కోసం బాగలకోటె ప్రైవేట్‌ ఆస్పత్రికి తరలించారు. ఘటన స్థలాన్ని తహసీల్దార్‌ ఏడీ అమరామరగి పరిశీలించి వీధి కుక్కల దాడిపై సమాచారం సేకరించారు.

రైతులు, వర్తకుల మధ్య సామరస్యత ఉండాలి

రైతులు, వర్తకుల మధ్య సామరస్యత ఉండాలి

రైతులు, వర్తకుల మధ్య సామరస్యత ఉండాలి