బైక్‌తో ఢీకొట్టి... తలపై బాది హత్య

హోసూరు: అక్క భర్త పేరిట రుణం తీసుకుని.. తిరిగి చెల్లించలేకపోవడంతో.. ఆదుకున్న సొంత బావనే హత్య చేసిన ఘటన కురుబరపల్లి ప్రాంతంలో సంచలనం సృష్టించింది. ఈ కేసులో మృతుడి బావమరిది, అల్లుడిని కురుబరపల్లి పోలీసులు అరెస్టు చేశారు. వివరాల మేరకు.. క్రిష్ణగిరి జిల్లా ఎన్నేకల్‌ పుదూర్‌ గ్రామానికి చెందిన రఘుపతి(40) హోసూరు బత్తలపల్లి మార్కెట్‌లో కూలీగా పనిచేస్తున్నాడు. గత 21న ద్విచక్ర వాహనంలో వెళ్తున్న ఇతడిని ఢీకొనడంతో ఏర్పడిన ప్రమాదంలో మృతిచెందినట్లు కురుబరపల్లి పోలీసులు కేసు నమోదు చేశారు. ఈ ఘటనలో కారు డ్రైవర్‌ కర్ణాటక రాష్ట్రం బన్నేరుగట్ట ప్రాంతానికి చెందిన వినోద్‌కుమార్‌ పోలీసులకు లొంగిపోయి రఘుపతి మృతిపై అనుమానం ఉన్నట్లు తెలిపారు. ఆ మేరకు పోలీసులు చేపట్టిన విచారణలో అసలు విషయం బయటపడింది.

విచారణలో హత్య గుట్టు వెలుగులోకి

బాధితుల ఫిర్యాదు మేరకు.. పోలీసులు మృతుడి రఘుపతి ఫోన్‌కు ఆఖరుగా వచ్చిన నెంబర్‌ను పరిశీలించగా అతడి భార్య తమ్ముడు రాజ(35)దిగా గుర్తించారు. టిప్పర్‌ లారీ నడుపుతున్న రాజాను పోలీసులు అదుపులోకి తీసుకొని విచారించగా అసలు విషయం వెలుగుచూసింది. తన అక్క భర్త అయిన రఘుపతి పేరిట పలు ఫైనాన్స్‌ సంస్థల్లో రూ.66 లక్షల వరకూ రాజా అప్పు తీసుకున్నాడు. నెలకు లక్ష రూపాయల వరకు ఈఎంఐలు కడుతున్నాడు. అనంతరం రుణం చెల్లించకపోవడంతో ఆ సంస్థల నుంచి రఘుపతికి ఒత్తిడి పెరిగింది. దీంతో బావ మరిదిని నిలదీశాడు. ఆవేశానికి గురైన రాజ, బంధువు శరత్‌కుమార్‌ కలిసి రఘుపతిని హత్య చేస్తే రుణం చెల్లించాల్సిన అవసరం ఉండదని నిర్ణయించుకున్నారు. హత్య చేసేందుకు పథకం ప్రకారం ఈనెల 21వ తేదీ అర్థరాత్రి ప్రమాదానికి ఉపయోగించిన టిప్పర్‌ లారీతోని సిద్ధం చేసుకున్నారు. త్వరగా రావాలని రాజ తెలపడంతో రఘుపతి బైక్‌లో వెళ్లాడు. ఈ సమయంలో సిద్ధంగా ఉన్నవారు కారుతో బైక్‌ను ఢీకొట్టారు. మృతి చెందకపోవడంతో ఇనుపరాడ్‌తో తలపై బాది హత్య చేశారు. ఈ ఘటనలో బన్నేరుగట్టకు చెందిన కారు డ్రైవర్‌ వినోద్‌కుమార్‌ను పోలీసులకు లొంగిపోవాలని సూచించడంతో అతను లొంగి పోయాడు. శవ పరీక్షల్లో వెలువడిన దాఖలాల ప్రకారం రఘుపతిని హత్య చేసిన రాజ, శరత్‌కుమార్‌లను కురుబరపల్లి పోలీసులు అరెస్టు చేసి రిమాండ్‌కు తరలించారు.

అక్క భర్తనే హతమార్చిన తమ్ముడు

రుణ బాధను తప్పించుకునేందుకు ఈ దారుణం

బైక్‌తో ఢీకొట్టి... తలపై బాది హత్య