కులపోళ్ల ఓట్లే కీలకం

కరీంనగర్‌టౌన్‌: పల్లె సంగ్రామంలో భాగంగా శనివారం మొదటి విడత నామినేషన్ల ఘట్టం ముగిసింది. ఆదివారం రెండో విడత ఎన్నికలకు నోటిఫికేషన్‌, నామినేషన్ల దాఖలు పర్వం షూరు కానుంది. ఈనేపథ్యంలో సర్పంచ్‌గా పోటీ చేయాలనుకుంటున్న ఆశావహులు పల్లెల్లో తమకు మద్దతు ఇవ్వాలని పగలు ప్రచారం చేస్తూనే..రాత్రి మంతనాలలో ముగినితేలుతున్నారు. గెలుపే లక్ష్యంగా ముందస్తు ప్రణాళికలు రూపొందించుకుంటున్నారు. తమ అనుచరుల్లోని ముఖ్యులను రంగంలోకి దింపి ఓటర్లను ఆకర్షించేందుకు యత్నిస్తున్నారు. సామాజిక వర్గాల వారీగా ఓటర్ల మద్దతు కూడగట్టుకునేందుకు కుస్తీ పడుతున్నారు. కుల పెద్దలను రహస్యంగా సంప్రదిస్తున్నారు. పోలింగ్‌ బూత్‌ల వారీగా ఉన్న ఓట్లను సామాజిక వర్గాల వారీగా గుర్తించి ఆకట్టుకునేందుకు ప్రయత్నాలు చేస్తున్నారు. అన్ని సామాజికవర్గాల మద్దతు లభిస్తే విజయం సునాయాసమన్న భావనలో అభ్యర్థులున్నారు.

ఎత్తుకు పై ఎత్తులు

గ్రామాల్లో వార్డుల వారీగా మొత్తం ఓట్లలో ఎక్కువ ప్రాబల్యం కలిగిన ఓట్లను పరిగణనలోకి తీసుకుంటున్న అభ్యర్థులు ఆయా సామాజిక వర్గాలను ఆకట్టుకునేందుకు ఎత్తుకు పై ఎత్తులు వేస్తున్నారు. గెలుపోటములను నిర్ధారించే పోలింగ్‌ బూత్‌లపై దృష్టి సారిస్తూ, ప్రత్యేకంగా ఒక టీమ్‌ తయారు చేసుకొని తీసివేతలు, కూడికలు మొదలుపెట్టారు. గెలుపుబాటలో పయనించాలంటే తీసుకోవాల్సిన చర్యలపై మంతనాలు ముమ్మరం చేశారు. ఆయా కుల సంఘాల్లో జిల్లా స్థాయి పదువుల్లో ఉన్నవారిని మచ్చిక చేసుకునే పనిలో పడ్డారు.

కులపెద్దలతో మంతనాలు

ప్రధాన పార్టీలకు చెందిన అభ్యర్థులు కులాలు, మతాల వారీగా ఓటర్లను గుర్తించి ఆయా వర్గాలకు చెందిన పెద్దలతో అనుచరగణం సాయంతో మంతనాలు చేస్తున్నారు. సమయం దొరికినప్పుడల్లా ఫోన్లలో వారిని ఆప్యాయంగా పలుకరించి గెలుపునకు సహకరించాలని కోరుతున్నారు. స్థానిక సమస్యలు, భవిష్యత్తులో చేపట్టాల్సిన అభివృద్ధి పనులను వారితో ప్రస్తావించి గెలిచిన వెనువెంటనే తొలిప్రాధాన్యమిచ్చి పరిష్కరిస్తామని హామీలిస్తున్నారు. ప్రస్తుత రాజకీయ పరిస్థితులు భిన్న రూపం దాల్చడంతో ఎన్నికల సమయంలోనే సమస్యల పరిష్కారానికి పునాది రాయి పడాలనే ముందుచూపుతో అన్ని సామాజిక వర్గాలు వ్యవహరిస్తున్నాయి.

రెండు వైపులా వారే..

పోటీలో ఉండే అభ్యర్థులకు ఎవరిని నమ్మాలో, ఎవరిని దూరంగా ఉంచాలో అర్థం కాని పరిస్థితులు ఏర్పడుతున్నాయి. ఉదయం ఓ అభ్యర్థికి మద్దతుగా కనిపిస్తున్న వ్య క్తులు చీకటి కాగానే మరో అభ్యర్థికి మద్దతుగా వాడలలో కలియతిరుగుతున్నారు. తమ కే ఓట్లు వేయిస్తామని నమ్మబలుకుతున్నారు. మందు, విందు పార్టీల్లో మునిగి తేలుతున్నారు. ఒక్కరుగా కాకుండా కొంత మందిని పోగేసుకుని వెళ్తున్నారు. వీరిని బుజ్జగించడానికి ఆశావహులు తంటాలు పడుతున్నారు. దీంతో పంచాయతీ సమరం రాను రాను రసకందాయంగా మారనుంది.

పగలు ప్రచారం.. రాత్రి మంతనాలు

వీటిపై అన్ని పార్టీల దృష్టి

గంపగుత్తగా వేసుకునేందుకు ప్రణాళికలు

సామాజికవర్గాల వారీగా మంతనాలు

కుల పెద్దలను సంప్రదిస్తున్న నేతలు

ఓటర్లను ఆకర్షించేందుకు ముందస్తు హామీలు.. నజరానా