పార్ట్‌టైం జాబ్‌ పేరిట సైబర్‌ మోసం

జగిత్యాలక్రైం: సైబర్‌ నేరగాళ్లు పార్ట్‌టైం జాబ్‌ పేరుతో ఓ నిరుద్యోగిని నమ్మించి మోసానికి పాల్పడ్డారు. జగిత్యాల పట్టణానికి చెందిన మహ్మద్‌ అయూబ్‌కు ఈనెల 21న టెలిగ్రామ్‌లో పార్ట్‌టైం జాబ్‌లున్నాయని మెసేజ్‌ వచ్చింది. దీంతో అతను లింక్‌ ఓపెన్‌ చేయగా సైబర్‌ నేరగాళ్లు రిజిస్ట్రేషన్‌ కోసం రూ.10 వేలు చెల్లించాలని కోరారు. దీంతో మహ్మద్‌ అయూబ్‌ రూ.10 వేలు చెల్లించాడు. అనంతరం అయూబ్‌ ఐసీఐసీఐ ఖాతాకు రూ.16 వేల వేతనం వేశారు. దీంతో నమ్మిన అతను సైబర్‌ నేరగాళ్లు ఇచ్చిన టాస్క్‌లను పూర్తి చేసి అడిగిన విధంగా దశల వారీగా రూ.1,14,032 వారి ఖాతాలో జమచేశాడు. లింక్‌ క్లోజ్‌ కావడంతో మోసపోయానని గుర్తించి పోలీసులకు ఫిర్యాదు చేశాడు. సైబర్‌ పోలీసులు తక్షణమే స్పందించి సైబర్‌ నేరగాళ్ల ఖాతాలో ఉన్న రూ.25 వేలు ఫ్రీజింగ్‌ చేశారు. బాధితుని ఫిర్యాదు మేరకు పట్టణ పోలీస్‌స్టేషన్‌లో కేసు నమోదు చేసినట్లు ఎస్సై కుమారస్వామి తెలిపారు.

జగిత్యాలక్రైం: జగిత్యాల పట్టణంలోని ఓ బంగారం దుకాణంలో బంగారు ఉంగరం మాయం చేసి నకిలీ ఉంగరాన్ని వదిలి వెళ్లిన ఘటన జరిగింది. టవర్‌సర్కిల్‌ ప్రాంతంలోని ఓ బంగారం దుకాణానికి శనివారం మధ్యాహ్నం ఓ వ్యక్తి వచ్చి బంగారు ఉంగరం సెలక్షన్‌ చేసుకున్నాడు. అదే తరుణంలో మరో కస్టమర్‌ రావడంతో మాటల్లో దింపి ఓ ఉంగరాన్ని తూకం వేయాలని కోరగా తూకం వేసి యజమాని ఉంగరాన్ని టేబుల్‌పై పెట్టగానే 2 గ్రాముల బంగారు ఉంగరాన్ని కాజేసి నకిలీ ఉంగరాన్ని పెట్టి అక్కడి నుంచి జారుకున్నాడు. సీసీపుటేజీల ఆధారంగా చోరీకి పాల్పడ్డట్లు గుర్తించి పోలీసులకు యజమాని ఫిర్యాదు చేశాడు.