స్వగ్రామానికి వలస జీవి మృతదేహం

పెగడపల్లి(ధర్మపురి): బతుకుదెరువు కోసం ఇరాక్‌ వెళ్లిన వ్యక్తి గుండెపోటుతో అక్కడే మృతిచెందాడు. ఆయన మృతదేహం 38 రోజులకు ఇంటికి తీసుకొచ్చారు. వివరాలు.. పెగడపల్లి మండల కేంద్రానికి చెందిన లింగంపల్లి రమేశ్‌ (55) జీవనోపాధి కోసం రెండేళ్ల క్రితం ఇరాక్‌ వెళ్లాడు. అక్కడ కంపెనీలో పనికి తగిన జీతం లేక కంపెనీ నుంచి బయటకు వెళ్లాడు. దొరికిన చోట పని చేసుకుంటున్న రమేశ్‌ గత నెల 21న గుండెపోటుతో మృతిచెందినట్లు కుటుంబ సభ్యులకు సమాచారం అందింది. శనివారం శవపేటికలో ఇంటికి చేరిన మృతదేహాన్ని చూసి కుటుంబ సభ్యుల రోదనలు మిన్నంటాయి. మృతుడికి భార్య, కూతురు, కుమారుడు ఉన్నారు.

హన్మాజిపల్లెకు మృతదేహం

గన్నేరువరం: హన్మాజిపల్లెకి చెందిన పారునంది వీరయ్య(44) గుండెపోటుతో సౌదీ అరేబియాలో ఈనెల 19న మృతిచెందగా.. శనివారం మృతదేహం గ్రామానికి చేరుకుంది. కుటుంబ సభ్యుల రోదనలు మిన్నంటాయి. స్థానికులు, కుటుంబ సభ్యుల కథనం ప్రకారం.. ఉపాధి కోసం వీరయ్య కొన్ని సంవత్సరాలుగా సౌదీ అరేబియా వెళ్తున్నాడు. పది నెలల క్రితం గ్రామానికి వచ్చి మళ్లీ సౌదీకి వెళ్లాడు. అక్కడ ఒక కంపెనీలో కారు డ్రైవర్‌ పని చేస్తున్నాడు. ఈ క్రమంలో ఈనెల 19న కారు పార్కింగ్‌ చేసి అందులోనే సేద తీరుతున్న సమయంలో గుండెపోటు వచ్చింది. అక్కడికక్కడే మృతిచెందినట్లు తోటి కార్మికులు ఫోన్‌ ద్వారా కుటుంబ సభ్యులకు సమాచారమందించారు. మృతుడికి భార్య, ఇద్దరు కుమారులు ఉన్నారు.

స్వగ్రామానికి వలస జీవి మృతదేహం