అన్నా.. ఒక్కచాన్స్‌!

మానకొండూర్‌ మండలంలోని ఓ గ్రామానికి చెందిన ఓ పెద్ద మనిషి గత కొన్నేళ్లుగా రాజకీయంగా ఏదో ఒక పదవి చేపట్టాలని ఆశించగా.. రిజర్వేషన్లు కలిసిరాలేదు. ఈసారి రిజర్వేషన్‌ అనుకూలించడంతో అధికార పార్టీ జెండా పట్టుకున్నాడు. పెద్దసారు తనకే మద్దతిస్తున్నాడంటూ నామినేషన్‌ వేసేందుకు సిద్ధం అవుతున్నాడు. అయితే ఇన్నాళ్లు పార్టీని నమ్ముకుని తిరిగానని, తనకు అన్యాయం చేయొద్దని, ఒక్కచాన్స్‌ ఇస్తే తానేంటో నిరూపించుకుంటానని పార్టీ సీనియర్‌ నాయకుడు అధిష్టానాన్ని ప్రాధేయపడుతున్నాడు.

గంగాధర మండల పరిధిలోకి చెందిన ఓ రాజకీ య యువనేత ఏళ్లకాలంగా పార్టీని నమ్ముకుని పనిచేస్తున్నాడు. గతంలో పలుమార్లు పదవి ఆశించగా.. అధిష్టానం అవకాశం ఇవ్వలేదు. ఈసారి స్థానిక సంస్థల ఎన్నికల్లో రిజర్వేషన్లు కలిసి రావడంతో జిల్లాకు చెందిన పార్టీ పెద్దలీడర్‌తో చర్చించాడు. తప్పకుండా తానే గెలుస్తానని, ఒక్కచాన్స్‌ ఇవ్వాలని కోరాడు. అధిష్టానం పచ్చజెండా ఊపడంతో శనివారం మంది మార్బలంతో నామినేషన్‌ వేశాడు.

కరీంనగర్‌/కరీంనరగ్‌టౌన్‌/మానకొండూర్‌: గ్రామ పంచాయితీ ఎన్నికలతో పల్లెల్లో రాజకీయ వేడి పెరిగింది. పార్టీల గుర్తులతో ఎన్నికలు జరగనప్పటికీ కాంగ్రెస్‌, బీఆర్‌ఎస్‌, బీజేపీలు ప్రతిష్టాత్మకంగా తీసుకుంటున్నాయి. సర్పంచ్‌ నుంచి వార్డుమెంబర్‌ వరకు గెలిపించుకుని పల్లెలపై పట్టు సాధించాలని ఉవ్విళ్లూరుతున్నాయి. బలమైన అభ్యర్థులను బరిలో దింపితేనే గెలుపు అవకాశాలుంటాయని భావిస్తున్నాయి. అభ్యర్థుల ఎంపికలో పార్టీలు తీవ్రమైన పరీక్షను ఎదుర్కొంటున్నాయి. ఒక్కో పార్టీ నుంచి పోటీచేసే ఆశావహల సంఖ్య ఎక్కువ కావడంతో, అవకాశం ఇవ్వకుంటే రెబల్స్‌గా పోటీ చేస్తామంటూ సవాలు విసురుతున్నారు. జిల్లాలో మొదటి విడత నామినేషన్లు ముగియగా.. నేటినుంచి రెండో విడత ప్రారంభం కానున్నాయి.

తలనొప్పిగా ఎంపిక ప్రక్రియ

ప్రధాన పార్టీల నుంచి ఒక్కొక్కరే బరిలో నిలిచే విధంగా ప్రయత్నాలు ముమ్మరం చేస్తున్నారు. అధికార కాంగ్రెస్‌తో పాటు బీఆర్‌ఎస్‌, బీజేపీలు సైతం గ్రామాల్లో బలంగా ఉన్నాయి. పంచాయతీ ఎన్నికల్లో మెజారిటీ స్థానాలు సాధించాలని భావిస్తున్నాయి. ఒక్కో పార్టీ నుంచి పదుల సంఖ్యలో టికెట్‌ కోసం ఆశిస్తుండగా.. తొలివిడతలో నామినేషన్‌ వేసినవారు మద్దతును అభ్యర్థిస్తున్నారు. ఈ సందర్భంగా పార్టీ పెద్దలకు సర్పంచ్‌ అభ్యర్థుల ఎంపిక తలనొప్పిగా మారింది. టికెట్‌ రాకపోతే స్వతంత్రంగా పోటీ చేస్తామని చాలా మంది ముందే ప్రకటన చేస్తున్నారు. వారిని బుజ్జగించేందుకు ఆఫర్లు, రాబోయే పరిషత్‌ ఎన్నికల్లో అవకాశాలు ఇస్తామని హామీలు ఇస్తున్నారు.

ఖర్చు ముందే ఫిక్స్‌

అభ్యర్థుల ఎంపికపై దృష్టి పెట్టిన ప్రధాన పార్టీలు ఆర్థిక పరిస్థితిని ప్రామాణికంగా తీసుకుంటున్నాయి. అభ్యర్థికి వ్యక్తిగత ఫాలోయింగ్‌, పార్టీకి, నాయకులకు విధేయతతో పాటు పోటీ చేసే అభ్యర్థికి సొంతంగానే ఎన్నికల ఖర్చు పెట్టుకునే స్థోమత ఉందా అని చూస్తున్నారు. దీంతో ఆయా పార్టీల్లో ఏళ్లుగా కష్టపడుతున్న పేద కార్యకర్తలు, నాయకులకు చుక్కెదురవుతోంది. కొన్నేళ్లుగా పార్టీలో ఉంటూ పలుకుబడి ఉన్నప్పటికీ ఆర్థికంగా వెనుకబడిన కొందరు ఆందోళన చెందుతున్నారు.

మండలం సర్పంచ్‌ వార్డు

చిగురుమామిడి 17 174

తిమ్మాపూర్‌ 23 212

గన్నేరువరం 17 140

మానకొండూర్‌ 29 280

శంకరపట్నం 27 240

మొత్తం 113 1,046

జిల్లాలోని ఐదు మండలాల్లో నేటినుంచి రెండో విడత నామినేషన్ల స్వీకరణ ప్రారంభం కానుంది. చిగురుమామిడి, తిమ్మాపూర్‌, గన్నేరువరం, మానకొండూర్‌, శంకరపట్నం మండలాల్లో మూడురోజులు ప్రక్రియ కొనసాగనుంది. 113 సర్పంచ్‌, 1,046 వార్డు స్థానాలకు నామినేషన్లు స్వీకరించనున్నారు. 3వ తేదీన నామినేషన్ల పరిశీలన, 4న అభ్యంతరాలపై అప్పిల్‌, 5న పరిశీలన, 6న విత్‌ డ్రా ఉంటుంది.

గ్రామ పంచాయితీ మొదటి విడత ఎన్నికల నామినేషన్ల స్వీకరణ గడువు శనివారంతో ముగిసింది. జిల్లాలో మొదటి విడతలో 92 గ్రామపంచాయతీలు, 866 వార్డులకు ఎన్నికలు జరుగుతున్నాయి. డిసెంబర్‌ 3 వరకు ఉపసంహరణ గడువు ఉంది. కాగా.. కొత్తపల్లి మండలంలో ఆరు గ్రామ పంచాయతీల సర్పంచ్‌ స్థానాలకు 69 నామినేషన్లు, 62 వార్డుస్థానాలకు 218 నామినేషన్లు దాఖలయ్యాయి. కరీంనగర్‌ మండలంలో 14 సర్పంచ్‌ స్థానాలకు 102, 132 వార్డుస్థానాలకు 359 నామినేషన్లు వచ్చాయి. గంగాధర, చొప్పదండి, రామడుగు మండలాల నామినేషన్ల వివరాలు తెలియాల్సి ఉంది. ఆదివారం పూర్తి సమాచారం ఇస్తామని డీపీవో వెల్లడించారు.