ప్రకృతిని పరిరక్షించే ఆవిష్కరణలు అవసరం

కొత్తపల్లి(కరీంనగర్‌): విద్యార్థులు ప్రకృతిని పరిరక్షించే ఆవిష్కరణలు రూపొందించాలని కలెక్టర్‌ ప మేలా సత్పతి సూచించారు. కొత్తపల్లిలోని అల్ఫోర్స్‌ ఈటెక్నో పాఠశాలలో శనివారం జిల్లా విద్యాశాఖ ఆధ్వర్యంలో ఏర్పాటు చేసిన జిల్లాస్థాయి బాల వైజ్ఞానిక ప్రదర్శన 2025–26, ఇన్‌స్పైర్‌అవార్డ్స్‌ మనాక్‌ 2024– 25 ప్రదర్శనకు హాజరయ్యారు. జాతీయ పతాక ఆవిష్కరణ చేపట్టి, జ్యోతి ప్రజ్వల న చేశారు. విద్యార్థుల విజ్ఞాన శాస్త్ర ఆలోచనలు ప్రపంచస్థాయిలో కాకుండా స్థానిక సమస్యలపై ఉండాలన్నారు. వాటి పరిష్కారం దిశగా ఆవిష్కరణలు చేయాలన్నారు. ప్రకృతిని తల్లిలా చూసుకుంటే మంచి ఫలితాలిస్తుందన్నారు. 10 ఏళ్లుగా క్రమం తప్పకుండా జిల్లా నుంచి సైన్స్‌ ఎగ్జిబిట్లు రాష్ట్రస్థాయికి, జాతీయస్థాయికి ఎంపిక కావడం గర్వకారణమన్నారు. కరీంనగర్‌లో సైన్స్‌ మ్యూజియం ఉందని, ప్రభుత్వ, ప్రైవేట్‌ పిల్లలు ఎవరైనా సందర్శించవచ్చన్నారు. డీఈవో శ్రీరామ్‌ మొండయ్య మాట్లాడుతూ ఉపాధ్యాయులు విద్యార్థుల్లో శాస్త్రపరమైన ఆలోచనలు పెంపొందించడానికి కృషి చేయాలన్నారు. అల్ఫోర్స్‌ విద్యాసంస్థల చైర్మన్‌ వి.నరేందర్‌ రెడ్డి మాట్లాడుతూ విజ్ఞానశాస్త్రం వైపు విద్యార్థులు దృష్టి సారించాలన్నారు. జిల్లా సైన్స్‌ అధికారి జైపాల్‌రెడ్డి మాట్లాడుతూ జిల్లాస్థాయిలో 807 సైన్స్‌ ఎగ్జిబిట్లు, 126 ఇన్‌స్పైర్‌ మనక్‌ ఎగ్జిబిట్లు వచ్చాయన్నారు. జిల్లా ఉమ్మడి పరీక్షల బోర్డు కార్యదర్శి ఎస్‌.భగవంతయ్య, సెక్టోరియల్‌ అధికారులు కర్ర అశోక్‌రెడ్డి, ఆంజనేయులు, శ్రీనివాస్‌ పాల్గొన్నారు.