వివాదాస్పదమైన రోడ్డు తవ్వకం

కరీంనగర్‌రూరల్‌: పట్టా భూమిలో రోడ్డు నిర్మించా రని ఆరోపిస్తూ ఓ మహిళ ఏకంగా రోడ్డునే తవ్వడం వివాదస్పదంగా మారింది. మరోసారి సర్వే చేసి హద్దులు నిర్ణయించేవరకు ఎలాంటి పనులు చేపట్టరాదంటూ రెవెన్యూ అధికారులు రోడ్డు తవ్వకం పనులను నిలిపివేశారు. కరీంనగర్‌ మండలం నగునూరు శివారులో సర్వేనంబరు 27లో ఓ మహిళకు రెండు ఎకరాల వ్యవసాయ భూముంది. 2021లో గ్రామపంచాయతీ ఆధ్వర్యంలో పొలంపక్క నుంచి ఉన్న నక్షా రోడ్డును 30 ఫీట్లుగా వెడల్పు చేశారు. గ్రామశివారు నుంచి దుబ్బల మీదుగా చొప్పదండి రోడ్డు వరకు అభివృద్ధి చేసి సోలార్‌ లైట్లు బిగించారు. తమకు ఎలాంటి సమాచారం లేకుండా పట్టాభూమిని కలుపుకుని రోడ్డు వెడల్పు చేశారంటూ పంచాయతీ, రెవెన్యూ అధికారులకు సదరు మహిళ ఫిర్యాదు చేసింది. ఏడాదిక్రితం సర్వేయర్‌ భూమిని సర్వే చేయగా రోడ్డు మధ్యభాగంలోకి రావడంతో హద్దురాళ్లను ఏర్పాటు చేశారు. అప్పటి పంచాయతీ పాలకవర్గం ఒత్తిడితో సదరు మహిళ ఎలాంటి చర్యలు చేపట్టలేదు. శుక్రవారం జేసీబీతో రోడ్డుపై ఏర్పాటు చేసిన హద్దురాళ్లలోపు ఉన్న రోడ్డు స్థలాన్ని తొలగించడంతో స్థానికులు పంచాయతీ, రెవెన్యూ అధికారులకు ఫిర్యాదు చేశారు. తహసీల్దార్‌ రాజేశ్‌ ఆదేశాల మేరకు ఆర్‌ఐ కనకరాజు మోఖాపై వెళ్లి రోడ్డు తవ్వకం పనులను నిలిపివేయించారు. డీఐతో సర్వే చేసేంతవరకు ఎలాంటి పనులు చేపట్టరాదని సదరు మహిళకు సూచించినట్లు తహసీల్దార్‌ తెలిపారు.