బాండ్‌ పేపర్‌తో బరిలోకి..

పెద్దకొడప్‌గల్‌(జుక్కల్‌): ‘సర్పంచ్‌గా నన్ను ఎన్నుకుంటే నేను కానీ.. నా కుటుంబం కానీ ఇప్పుడు ఉన్న ఆస్తులకు మించి అక్రమంగా ఎంత సంపాదించినా గ్రామ పంచాయతీ జప్తు చేసి ప్రజలకు పంచవచ్చు..’ అంటూ బాండ్‌ పేపర్‌ రాసిచ్చి ఎన్నికల బరిలోకి వస్తోంది పవర్‌ సుమిత్ర. మండలంలోని పోచారం తండాకు చెందిన సుమిత్ర గ్రాడ్యుయేషన్‌ పూర్తి చేసి ప్రైవేట్‌ టీచర్‌గా పని చేసింది. గ్రామ సర్పంచ్‌ పదవి రిజర్వేషన్‌ అనుకూలంగా రావడంతో తన భర్త ప్రోత్సాహంతో పోటీకి సిద్ధమైంది. ‘పనులు చేసేందుకు ప్రజల వద్ద చేయి చాచను.. పంచాయతీ సొమ్మును అక్రమంగా ఖర్చు చేయను..’ అంటూ రాసిన బాండ్‌ పేపర్‌ను గ్రామస్తుల చేతుల్లో పెట్టింది. తనను ఆశీర్వదించాలని కోరుతోంది.