ధాన్యం సేకరణను వేగవంతం చేయాలి

కామారెడ్డి రూరల్‌: ధాన్యం కొనుగోళ్లను వేగవంతం చేయాలని కలెక్టర్‌ ఆశిష్‌ సంగ్వాన్‌ అధికారులను ఆదేశించారు. ఐకేపీ ఆధ్వర్యంలో కామారెడ్డి మండలం చిన్న మల్లారెడ్డిలో ఏర్పాటు చేసిన ధాన్యం కొనుగోలు కేంద్రాన్ని కలెక్టర్‌ శనివారం పరిశీలించారు. ధాన్యం సేకరణ ప్రక్రియను వేగంగా పూర్తి చేసి, రైతులకు ఇబ్బందులు కలగకుండా చూడాలని సంబంధిత అధికారులను ఆదేశించారు. కలెక్టర్‌ వెంట అదనపు కలెక్టర్‌ విక్టర్‌, సివిల్‌ సప్లయీస్‌ ఏఎస్‌వో వెంకటేశ్వర్లు, డీఎం శ్రీకాంత్‌, మెప్మా ఏపీఎం శ్రీధర్‌ రెడ్డి, అడిషనల్‌ డీఆర్డీవో విజయలక్ష్మి, డీపీఎం సాయిలు, ఐకేపీ ఏపీఎం శ్రీనివాస్‌, సీసీలు విశ్వనాథం, స్వరూప, వీవోఏలు, గ్రామ సంఘాల సభ్యులు ఉన్నారు.

రామారెడ్డి (ఎల్లారెడ్డి): గ్రామ పంచాయతీ ఎన్నికల నేపథ్యంలో నామినేషన్‌లు దాఖలు చేసేందుకు ప్రశాంత వాతావరణం కల్పిస్తున్నామని అదనపు ఎస్పీ చైతన్యరెడ్డి అన్నారు. మండలంలోని రెడ్డిపేట గ్రామంలో నామినేషన్‌ కేంద్రాన్ని శనివారం పరిశీలించారు. ఈ సందర్భంగా చైతన్య రెడ్డి మాట్లాడుతూ.. అభ్యర్థితోపాటు ముగ్గురికి మించి నామినేషన్‌ కేంద్రాల్లోకి వెళ్లకుండా చూడాలని బందోబస్తులో ఉన్న పోలీసులకు సూచించారు. అన్ని నామినేషన్‌ కేంద్రాల దగ్గర పోలీస్‌ బందోబస్తు కొనసాగుతుందని, ప్రశాంత వాతావరణంలో నామినేషన్‌ల ప్రక్రియ కొనసాగేలా పోలీసుశాఖ చర్యలు తీసుకుంటోందన్నారు.

కామారెడ్డి టౌన్‌: మున్సిపల్‌ పరిధిలోని సిరిసిల్లారోడ్‌లో అనుమతి లేకుండా నిర్మించిన గాంఽధీ ఆస్పత్రి భవన సెల్లార్‌ను అధికారులు సీజ్‌ చేశారు. మున్సిపల్‌ కమిషనర్‌ రాజేందర్‌రెడ్డి, టీపీవో గిరిధర్‌ భవన యజమానికి శనివారం నోటీసులు జారీ చేశారు. పోలీసులు, రెవెన్యూ అధికారుల సమక్షంలో సెల్లార్‌ను సీజ్‌ చేశారు. జిల్లా కేంద్రంలో అనుమతులు లేకుండా సెల్లార్లు నిర్మించిన భవనాల యజమానులకు నోటీసులు జారీ చేస్తున్నట్లు కమిషనర్‌ తెలిపారు. మున్సిపల్‌ అనుమతులు లేని పక్షంలో చర్యలు తప్పవని ఆయన స్పష్టం చేశారు.

కామారెడ్డి రూరల్‌: రేషన్‌ బియ్యం పంపిణీ డిసెంబర్‌ 1వ తేదీ నుంచి ప్రారంభం కానుంది. ఒక్కో యూనిట్‌కు ఆరు కిలోల చొప్పున ఉచితంగా సన్న బియ్యం పంపిణీ చేయనున్నారు. అంత్యోదయ కార్డులకు 35 కిలోలు, అన్నపూర్ణ కార్డులకు 10 కిలోల చొప్పున అందిస్తారు. ప్రతి నెలా 1 నుంచి 15వ తేదీ వరకు మాత్రమే బియ్యం పంపిణీ చేయనున్నట్లు పౌరసరఫరాలశాఖ అధికారులు తెలిపారు.

కామారెడ్డి రూరల్‌: పీఎంశ్రీ చిన్న మల్లారెడ్డి బాలుర ఉన్నత పాఠశాల గణిత శాస్త్ర ఉపాధ్యాయుడు విజయగిరి రామకృష్ణ గ్లోబల్‌ ఎడ్యుకేటర్‌ ఆఫ్‌ ఎక్సలెన్స్‌ టీచర్‌ – 2025 అవార్డు అందుకున్నారు. ప్రపంచ స్థాయి విద్యలో అత్యున్నత సేవలు అందిస్తున్న 80కి పైగా దేశాల ఉపాధ్యాయులను గుర్తించి ఏకేఎస్‌ ఇంటర్నేషనల్‌ ఎడ్యుకేషన్‌ ఆధ్వర్యంలో శనివారం ఢిల్లీలో అవార్డులు అందజేశారు. స్థానిక స్థాయి నుంచి గ్లోబల్‌ స్థాయికి పాఠశాల విద్యను శక్తివంతం చేసే ఉద్ధేశంతో, ప్రపంచవ్యాప్తంగా నైపుణ్యం కలిగి, పోటీ పరీక్షల్లో ఒలంపియాడ్‌ పరీక్షల్లో తట్టుకునేలా విద్యార్థులను పాఠశాల స్థాయి నుంచి తీర్చిదిద్దుతున్న ఉపాధ్యాయులను గుర్తించి గ్లోబల్‌ ఎక్సలెన్స్‌ టీచర్‌ అవార్డుల ద్వారా ఆ సంస్థ ప్రోత్సహిస్తోంది. ప్రతిష్టాత్మకమైన అవార్డును పొందిన రామకృష్ణను హెచ్‌ఎం సాయిరెడ్డి, ఉపాధ్యాయులు అభినందించారు.

ధాన్యం సేకరణను వేగవంతం చేయాలి

ధాన్యం సేకరణను వేగవంతం చేయాలి

ధాన్యం సేకరణను వేగవంతం చేయాలి