వేలమా.. తూచ్‌!

గద్వాలటౌన్‌: ‘సర్పంచు పదవికి వేలమా..? అబ్బే అలాంటిదేమీ లేదు సార్‌.. మా గ్రామంలో మేము సర్పంచు పదవి కోసం ఎలాంటి వేలాన్ని వేసుకోలేదు. ఇదంతా కొందరు ఉద్దేశ్యపూర్వకంగా ఇస్తున్న తప్పుడు సమాచారమే తప్ప మరేమీ లేదు..’ అంటూ ఏకగ్రీవమైన గ్రామాల్లో కొంతమంది మాత్రమే వచ్చి విచారణ అధికారుల ఎదుట ముందస్తుగా అనుకున్న ప్రకారమే చెప్పడం గమనార్హం. పంచాయతీ ఎన్నికల్లో సర్పంచు పదవులను వేలం వేసిన గ్రామాల్లో శనివారం ఎన్నికల పరిశీలకులతో పాటు ఆయా మండలాల ఎంపీడీఓలు, తహసీల్దార్లు, ఎస్‌ఐలు పర్యటించారు. గద్వాల, గట్టు, కేటీదొడ్డి, ధరూర్‌ మండలంలోని కొండపల్లి, వీరాపురం, కుర్వపల్లి, మిట్టదొడ్డి, గోర్లఖాన్‌దొడ్డి, రంగాపురం, చింతలకుంట, ఉమిత్యాలతండా తదితర గ్రామాల్లో విచారణ నిర్వహించారు. కొన్ని గ్రామాల్లో ముందస్తుగా అనుకున్న ప్రకారం సర్పంచు ఎన్నికలకు భార్యాభర్తల చేతనే నామినేషన్లను వేయించారు. మరికొన్ని గ్రామాల్లో కూడా వేలంపాడిన వారికి సర్పంచు పదవి దక్కే విధంగా వారిచేత సింగిల్‌ నామినేషన్లు వేయించారు. ఇతరులు ఎవరూ నామినేషన్‌ వేయరాదని, గ్రామంలో కొంతమంది పెద్ద మనుషులు హుకూం జారీ చేశారు. ఈ విషయంలో గ్రామస్తులపై కొంతమంది గ్రామ పెద్దలు సామ, దాన, భేద, దండోపాయాలను ఉపయోగించినట్లు విశ్వసనీయ సమాచారం. దీంతో ఆయా పంచాయతీలకు కేవలం ముందుగా అనుకున్న ప్రకారంగా వేలంపాడిన తాలూకు వారు మాత్రమే నామినేషన్‌ దాఖలు చేశారు. వేలంపాటల గురించి వరసగా రెండు రోజులు ‘సాక్షి’లో ‘అమ్మకానికి సర్పంచ్‌లు’, ‘హెచ్చరికలు బేఖాతర్‌..’ శీర్షికలతో కథనాలు ప్రచురితం అయ్యాయి. జిల్లాలోని తొలిదశ ఎన్నికలు జరుగుతున్న మండలాల్లో వేలంపాట ద్వారా ఏకగ్రీవం కానున్న పంచాయతీలపై ప్రచురించిన కథనం సంచలనం సృష్టించింది.

సర్పంచ్‌ పదవుల వేలంపై అధికారుల విచారణ

నిజమని తేలితే కఠిన

చర్యలుంటాయని హెచ్చరిక

విషయం బయటకు పొక్కకుండా జాగ్రత్తపడిన గ్రామ పెద్దలు

వేలం జరగలేదంటూ అధికారులను నమ్మించే ప్రయత్నం

స్పందించిన అధికార యంత్రాంగం.. విచారణ

పత్రికలు, సోషల్‌ మీడియాలో వచ్చిన కథనాలకు జిల్లా యంత్రాంగం స్పందించింది. అందులో భాగంగా ఆయా గ్రామాల వారీగా విచారణ చేపట్టారు. ఎన్నికల పరిశీలకులతో పాటు మరికొంతమంది అధికారులు ఆయా గ్రామాల్లో పర్యటించి వేలం వ్యవహారంపై విచారణ నిర్వహించారు. అయితే జిల్లా అధికారులు వస్తున్నట్లు ముందస్తు సమాచారం ఉండటంతో పలువురు గ్రామ పెద్దలు పథకం ప్రకారం గ్రామస్తులను సిద్ధం చేశారు. దీంతో కొంతమందిని మాత్రమే అధికారుల ముందు పెట్టి వేలం విషయం బయటకు పొక్కకుండా జాగ్రత్త పడ్డారు. గ్రామాల్లో వేలంపాట జరగలేదంటూ అధికారులను నమ్మించే ప్రయత్నం చేశారు. అధికారులు కూడా వేలంపాట జరిగిందా లేదా అన్నదానిపై అందుబాటులో ఉన్న గ్రామస్తుల నుంచి వివరాలు అడిగి తెలుసుకున్నారు. ముందస్తుగా మాట్లాడుకున్న విధంగా గ్రామస్తులెవరూ కూడా విచారణ అధికారుల ఎదుట వేలంపాటపై నోరు విప్పలేదు. దీంతో అధికారులు చేసేదేమీ లేక పంచనామా నిర్వహించారు. అయితే అధికారులపై కూడా రాజకీయ ఒత్తిళ్లు వచ్చినట్లు సమాచారం. ఇంటెలిజెన్స్‌ వ్యవస్థ బలంగా ఉన్న ప్రస్తుత తరుణంలో వేలం ప్రక్రియ గురించి అధికార యంత్రాంగం వారికి తెలియకపోవడం శోచనీయం. ప్రజాస్వామ్యంలో జరిగే ఎన్నికలలో ఏకాభిప్రాయం ముసుగులో వేలంపాట నిర్వహించడం సరైనది కాదనే విమర్శలు వినిపిస్తున్నాయి. మొత్తం మీద జిల్లాలో కొన్ని గ్రామ పంచాయతీలు అంగట్లో వస్తువుల్లా అమ్ముడుపోయిన విషయం వాస్తవమని ఆయా గ్రామాల్లోని పలువురు నాయకులు పెదవి విరవడం విశేషం.

అవగాహన కల్పిస్తున్నాం

గ్రామ పంచాయతీ ఎన్నికల్లో ఆయా పదవులను వేలం పాటతో ఏకగ్రీవాలను నిరోధించేందుకు జిల్లా ఎన్నికల అధికారులు గ్రామాల్లో పర్యటించి ప్రజలకు అవగాహన కల్పిస్తున్నారని కలెక్టర్‌ సంతోష్‌ ఒక ప్రకటనలో తెలిపారు. ప్రజాస్వామ్యానికి విరుద్ధంగా వేలం ద్వారా సర్పంచు పదవులు పొందడం చట్టరీత్యా నేరం. ఎన్నికల పరిశీలకులతో పాటు ఎంపీడీఓలు, తహసీల్దార్లు, ఎస్‌ఐలు గ్రామాల్లో పర్యటించి అనైతిక ఏకగ్రీవాలను నిరోధిస్తున్నామన్నారు. ఇప్పటికే ఆరోపణలు వచ్చిన గ్రామాలలో అధికారుల బృందం పర్యటించి, గ్రామస్తుల నుంచి వివరాలను సేకరించండం జరిగిందన్నారు. ఆరోపణలు రుజువైతే కఠిన చర్యలు తీసుకుంటామని హెచ్చరించారు.

వేలమా.. తూచ్‌!