దివ్యాంగులను ప్రోత్సహిస్తే అద్భుత విజయాలు

గద్వాలటౌన్‌: క్రీడల్లో రాణించడం ద్వారా దివ్యాంగ ప్రతిభావంతులు.. సకలాంగులకు ఏమాత్రం తీసిపోరని నిరూపించాలని అడిషనల్‌ కలెక్టర్‌ లక్ష్మినారాయణ పేర్కొన్నారు. అంతర్జాతీయ దివ్యాంగుల దినోత్సవాన్ని పురస్కరించుకొని జిల్లా మహిళా శిశు దివ్యాంగుల సంక్షేమ శాఖ ఆధ్వర్యంలో దివ్యాంగ విద్యార్థులకు జిల్లాస్థాయి ఆటల పోటీలు నిర్వహించారు. శనివారం స్థానిక ఇండోర్‌ స్టేడియంలో జరిగిన పోటీలను అడిషనల్‌ కలెక్టర్‌ జెండా ఊపి ప్రారంభించారు. ఈ సందర్భంగా ఏర్పాటు చేసిన సమావేశంలో ఆయన మాట్లాడారు. దివ్యాంగులలో దాగివున్న క్రీడా నైపుణ్యాలను, సృజనాత్మకతను వెలికితీసి వారిలో ఆత్మస్థైర్యాన్ని పెంపొందించాలని సూచించారు. డీఎస్పీ మొగిలయ్య మాట్లాడుతూ శారీరకంగా, మానసికంగా ఇబ్బందులు ఎదుర్కొంటున్న దివ్యాంగులలో ఎంతో ప్రతిభ దాగి ఉందని, దాన్ని గుర్తించి ప్రోత్సహించాలన్నారు. ఇటీవల అంధుల టీ20 క్రికెట్‌ ప్రపంచకప్‌ సాధించిన విషయాన్ని గుర్తుచేశారు. ప్రతి ఏడాది దివ్యాంగుల కోసం పోటీలను నిర్వహించి వారిని ప్రోత్సహిస్తున్నామని చెప్పారు. అనంతరం అంధుల ఆశ్రమ పాఠశాల విద్యార్థులు, స్థానిక బాలుర ఉన్నత పాఠశాలలోని ప్రత్యేక అవసరాల భవిత కేంద్రం విద్యార్థులు పోటీలలో ఉత్సాహంగా పాల్గొన్నారు. గెలుపొందిన విజేతలకు డిసెంబర్‌ 3వ తేదీన కలెక్టర్‌ చేతుల మీదుగా బహుమతులను అందజేస్తామని చెప్పారు. పరుగుపందెం, చెస్‌, క్యారమ్స్‌, షాట్‌ఫుట్‌, జావలిన్‌త్రో తదితర పోటీలలో దివ్యాంగులు ఉత్సాహంగా పాల్గొన్నారు. కార్యక్రమంలో డీఈఓ విజయలక్ష్మి, జిల్లా సంక్షేమ శాఖ అధికారి సునంద, డీవైఎస్‌ఓ కృష్ణయ్య, డీఎంహెచ్‌ఓ సంధ్యకిరణ్మయి, డీఆర్డీఏ ఏపీడీ శ్రీనివాసులు, వ్యాయామ ఉపాధ్యాయులు పాల్గొన్నారు.

దివ్యాంగులను ప్రోత్సహిస్తే అద్భుత విజయాలు