కేసీఆర్‌ దీక్షతోనే తెలంగాణ ఏర్పాటు

గద్వాలటౌన్‌: ‘తెలంగాణ వచ్చుడో.. కేసీఆర్‌ సచ్చుడో..’ అన్న నినాదంతో ప్రాణాలకు తెగించి కేసీఆర్‌ చేపట్టిన అమరణ దీక్ష తెలంగాణ చరిత్రలో నిలిచిపోయిందని.. ఆ దీక్షతోనే తెలంగాణ రాష్ట్రం సిద్ధించిందని అలంపూర్‌ ఎమ్మెల్యే విజయుడు, స్పోర్ట్స్‌ అథారిటీ మాజీ చైర్మన్‌ ఆంజనేయగౌడ్‌ పేర్కొన్నారు. శనివారం స్థానిక బీఆర్‌ఎస్‌ పార్టీ కార్యాలయంలో పార్టీ నాయకులు దీక్షా దివస్‌ చేపట్టారు. ఈ సందర్భంగా వారు కార్యకర్తలనుద్దేశించి మాట్లాడారు. ప్రాణాన్ని పణంగా పెట్టి రాష్ట్రాన్ని సాధించిన కేసీఆర్‌.. రాష్ట్ర ప్రజలను మోసం చేస్తాడా అని ప్రశ్నించారు. కాంగ్రెస్‌ ప్రభుత్వం వచ్చాక కరెంటు కోతలు, రైతుల కష్టాలు మళ్లీ మొదలయ్యాయని, ప్రజలు కేసీఆర్‌ పాలనను గుర్తు చేసుకుంటున్నారన్నారు. చరిత్రలో ఏ ప్రభుత్వంపైన లేనంత ప్రజా వ్యతిరేకత కాంగ్రెస్‌పై ఉందని, ప్రజల వెంట మనం ఉంటే.. వారే తిరిగి కేసీఆర్‌ను ముఖ్యమంత్రిని చేస్తారని చెప్పారు. ఉద్యమ నేతగా కేసీఆర్‌ పదేళ్లలో రాష్ట్రాన్ని అన్ని రంగాల్లో అభివృద్ధి చేశారని చెప్పారు. అబద్దాలు, మాయమాటలు చెప్పి రేవంత్‌రెడ్డి గద్దెనెక్కిండని విమర్శించారు. రెండేళ్ల కాంగ్రెస్‌ ప్రభుత్వ వైఫల్యాలు, అవినీతిని ప్రజల్లోకి తీసుకెళ్లి ఎండగట్టాలని పిలుపునిచ్చారు. మాజీ చైర్మన్‌ బీఎస్‌ కేశవ్‌, హనుమంతునాయుడు, వెంకట్రాములు, శ్యామల,పద్మ, బస్వరాజ్‌, మోనేష్‌,రాజారెడ్డి, యూ సూఫ్‌, రంగారెడ్డి, జనార్థన్‌రెడ్డి పాల్గొన్నారు.