మట్టి.. కొల్లగొట్టి ..!

తాడేపల్లి రూరల్‌ : ప్రభుత్వం రాజధాని పనుల్ని ముమ్మరం చేసింది. ఈ నేపథ్యంలో మట్టి మాఫియా రెచ్చిపోతోంది. అధికారులు నిర్లక్ష్యం వల్ల ఆయా ప్రాంతాల్లో అభివృద్ధి పనులు చేసే సమయంలో వచ్చే మట్టిని విచ్చలవిడిగా నిబంధనలకు విరుద్ధంగా కొంతమంది అధికారులతో కలసి అక్రమార్కులు అమ్ముకుని జేబులు నింపుకుంటున్నారు. రాజధానిలో కొండవీటి వాగు వరదను నియంత్రించేందుకు ప్రభుత్వం పలుచోట్ల వెడల్పుతో పాటు రిజర్వాయర్‌ నిర్మాణాన్ని చేపట్టింది. మరికొన్ని చోట్ల డ్రెయిన్లు, పైప్‌లైన్లు వేసే సమయంలో ఐదు నుంచి పది అడుగుల దాకా తవ్వాల్సిన పరిస్థితి ఏర్పడింది. ఈ సమయంలో వచ్చిన మట్టిని సదరు కాంట్రాక్టర్‌ నిబంధనల ప్రకారం అక్కడి నుంచి తొలగించాలి. ఇదే అదునుగా చేసుకుని ఇతర ప్రాంతాల్లో చెరువ కట్టలను, రోడ్లను సైతం రాత్రీ పగలు తేడా లేకుండా తవ్వేస్తున్నారు.

సిండి‘కేట్లు’గా దోపిడీ

లారీ ఓనర్లు సిండికేట్‌ అయ్యారు. మట్టి రవాణా ముసుగులో చెరువు కట్టలు, కొండవీటి వాగు మట్టిని యథేచ్ఛగా తోలుకుంటున్నారు. పైపు లైను దగ్గరకు ప్రైవేటు జేసీబీలు తీసుకువెళ్లి ట్రాక్టర్‌ లోడింగ్‌కు రూ. 400, లారీ మట్టికి రూ. 1000 ఇస్తున్నారు. ఈ మట్టిని అమ్ముకోవడానికి అనుమతులు ఉన్నాయి. ఈ ముసుగులో కొండవీటి వాగు నుంచి వచ్చే బంక మట్టిని రాత్రి సమయంలో తోలుతున్నారు. 220 మిషన్లు ఏర్పాటు చేసి అక్కడున్న వాచ్‌మేన్‌కు పదో పరకో అప్పజెప్పి వందల లారీల మట్టిని అక్రమంగా తరలిస్తున్నారు. చిర్రావూరు, రామచంద్రాపురంలతో పాటు కొల్లూరు ఇటుక బట్టీలకు తోలుతున్నట్లు లారీ డ్రైవర్లు తెలిపారు. ఈ మట్టి తవ్వకాలపై గతంలో ఒకరిపై ఒకరు దాడులు చేసుకుంటూ పోలీసులకు ఫిర్యాదు కూడా చేసుకున్నారు. ప్రస్తుతం వీరంతా సిండికేట్‌గా ఏర్పడ్డారు. రాత్రి 10 గంటల నుంచి తెల్లవారుజామున 5 గంటల వరకు కొండవీటి వాగు మట్టిని యథేచ్ఛగా తరలిస్తున్నారు. అటువైపు కనీసం పోలీసులు గానీ, సీఆర్‌డీఏ అధికారులు గానీ కన్నెత్తి చూడడం లేదు. కొంతమంది అధికారపార్టీ అండదండలతో లారీలు కొని మరీ ఈ వ్యాపారాన్ని నిర్వహించడం గమనార్హం. ఇప్పటికై నా అధికారులు మేల్కొని మట్టి తవ్వకాలలో జాగ్రత్తలు తీసుకుని, బిల్లులు ఇవ్వాలని రాజధాని రైతులు కోరుతున్నారు.

మట్టి.. కొల్లగొట్టి ..!