ముంచెత్తిన మంచు

మదనపల్లె: తుపును ప్రభావంతో మదనపల్లె, తంబళ్లపల్లె నియోజకవర్గాలను మంచు ముంచెత్తుతోంది. శుక్ర, శనివారాల్లో అయితే మంచులో రాకపోకలు సాగించడానికి అవస్థలు పడాల్సిన పరిస్థితి నెలకొంది. పగలు, రాత్రి తేడా లేకుండా మంచు వీడకపోవడంతో ప్రజల దైనందిన కార్యకలాపాలకు ఆటంకం కలుగుతోంది. చల్లటిగాలికి ప్రజలు వణుకుతున్నారు. రోడ్లపైకి వచ్చేందుకు జంకుతున్నారు. అయితే ప్రజారవాణా వ్యవస్థ ద్వారా రాకపోకలు తగ్గలేదు. బి.కొత్తకోట–మదనపల్లె, మదనపల్లె–ములకలచెరువు, తంబళ్లపల్లె మార్గాల్లో రద్దీ అధికంగానే ఉంది. మదనపల్లె పట్టణంలో జనం రద్దీ సాధారణంగానే ఉండగా చలి ఫలితం ప్రజలు వేడి కలిగించే దుస్తులతో దైనందిన కార్యకలాపాల్లో మునిగిపోయారు.

హార్సిలీహిల్స్‌పై గజగజ

బి.కొత్తకోట మండలంలోని పర్యాటక కేంద్రం హార్సిలీహిల్స్‌పై ఉష్ణోగ్రతలు పడిపోతున్నాయి. సముద్రమట్టానికి 4,141 అడగుల ఎత్తులోని హార్సిలీహిల్స్‌పై రాత్రి–పగలు దట్టమైన మంచు కమ్మేసింది. చలి విపరీతంగా పెరిగింది. చలిదెబ్బకు పర్యాటకులు గజగజ వణికిపోతున్నారు. దట్టమైన మంచుతో రోడ్లు కనిపించడం లేదు. ఘాట్‌రోడ్డుపై ప్రయాణించేందుకు పర్యాటకులు ఆందోళనకు చెందుతున్నారు. ప్రమాదాలు జరిగే ఆస్కారం ఉంటుందని సందర్శకులు హార్సిలీహిల్స్‌ పర్యటన వాయిదా వేసుకుంటున్నారు. రాత్రి తొమ్మిది గంటల నుంచి తెల్లవారుజాము ఏడు గంటల వరకు చలి విపరీతమైంది. దాంతో స్థానికులు, పర్యాటకులు ఇళ్లు, అతిథిగృహలనుంచి బయటకు వచ్చేందుకు జంకుతున్నారు. దీనితో రహదారులు, ప్రకృతి సందర్శనా ప్రాంతాలు బోసిపోతున్నాయి.

వణికిస్తున్న చలి

హార్సిలీహిల్స్‌పై పడిపోయిన ఉష్ణోగ్రతలు