నీటి వృథాను అరికట్టి చెరువులు నింపాలి

జిల్లా కలెక్టర్‌ నిశాంత్‌ కుమార్‌

రామాపురం: నీటి వృథాను అరికట్టి సప్లై చానళ్ల ద్వారా చెరువులు నింపే ప్రక్రియను పూర్తి చేయాలని నీటిపారుదల, వెలిగల్లు ప్రాజెక్టు అధికారులకు జిల్లా కలెక్టర్‌ నిశాంత్‌ కుమార్‌ సూచించారు. శనివారం రామాపురం మండల పరిధిలో జరుగుతున్న సప్లై ఛానల్‌, ఇతర నీటి నిల్వ పనులను జిల్లా కలెక్టర్‌ పరిశీలించారు. మండల పరిధిలోని నల్లగుట్టపల్లి, బి.రాచపల్లి గ్రామ పరిధిలో రామరాజు వంక నుంచి బల్లిగుట్ట చెరువు సప్లై ఛానల్‌, రామరాజు వంక చెక్‌ డాం నిర్మాణం, రామరాజు వంక నుంచి ఓబుల్‌ రెడ్డి చెరువు, కసిరెడ్డి చెరువుకు, దిగువ చింతల వారి కుంట, చింతకుంట చెరువులకు నింపే సప్లై ఛానల్‌ పనులను కలెక్టర్‌ స్వయంగా పరిశీలించారు. పనులను నాణ్యతగా, త్వరితగతిన పూర్తి చేయాలన్నారు. ఈ సందర్భంగా ఈనెల 30వ తేదీన పదవి విరమణ చెందుతున్న నీటిపారుదల శాఖ ఎస్‌ఈ వెంకటరామయ్యకు జిల్లా కలెక్టర్‌ పూల మొక్క అందించి శాలువాతో సన్మానించారు. కార్యక్రమంలో తహసీల్దార్‌ వెంటేశ్వర్లు తదితరులు పాల్గొన్నారు.