‘నువ్వుల’ సాగుకు ఇదే అదును

● డిసెంబర్‌ రెండో వారం వరకు

అనుకూలం

● రైతులు త్వర పడాలంటున్న శాస్త్రవేత్తలు

● సాంకేతిక పద్ధతులతో అధిక దిగుబడి

కడప అగ్రికల్చర్‌ (వైఎస్‌ఆర్‌ జిల్లా) : జిల్లాలో నువ్వు పంటల సాగుకు ఇటీవల అదును ప్రారంభమైంది. ఈ రబీలో జిల్లా వ్యాప్తంగా 4,566 హెక్టార్లలో సాగవుతుందని అధికారులు ముందస్తు ప్రణాళికలు సిద్ధం చేశారు. ఇప్పటికే చాలా వరకు సాగైంది. నువ్వుల పంట సాగుకు ఇప్పుడు అనుకూలమని శాస్త్రవేత్తలు, వ్యవసాయ అధికారులు సూచిస్తున్నారు. రైతన్నలు త్వరపడి సాగు చేసుకోవాలని పేర్కొంటున్నారు. ఈ అదునులో సాగు చేస్తే సగటున ఎకరాకు 600 కిలోల దిగుబడి ఇస్తుందని తెలిపారు. నువ్వులో నూనె 49–55 శాతం, ప్రోటీన్‌ 20–25 శాతం, అధిక పోషక విలువలు, ఔషధ గుణాలు ఉండటం వల్ల వివిధ రకాల వంటకాల్లో వాడుతున్నందున మార్కెట్లో మంచి ధర ఉంటుంది. కావున రైతులు డిసెంబర్‌ 2వ వారం వరకు సాగు చేసుకోవచ్చని వారు సూచించారు.

సాగుకు అనువైన నేలలు

నీరు నిలవని తేలిక, బరువు నేలలు శ్రేష్టం. ఆమ్ల, క్షార నేలలు కాకుండా ఉండాలి.

సాగుకు నేల తయారీ..

నువ్వు పంటను సాగు చేసుకునే పొలాన్ని 2–4 సార్లు మెత్తగా దున్ని, 2 సార్లు గుంటకతో చదును చేసుకుని సాగు చేసుకోవాలి.

విత్తనం, విత్తే పద్ధతి..

ఎకరాకు 2 కిలోల విత్తనం సరిపోతుంది. విత్తనానికి సమపాళ్లలో ఇసుక లేదా నూకలు కలిపి గొర్రెతో వరుసలలో విత్తుకోవాలి.

విత్తన శుద్ధి

కిలో విత్తనానికి 3 గ్రాముల కార్బెండజిమ్‌/మాంకోజెబ్‌తో విత్తన శుద్ధి చేసి విత్తడం వల్ల నేల నుంచి సంక్రమించే తెగుళ్లను 21 రోజుల వరకు నివారించవచ్చు. పంట తొలిదశలో రసం పీల్చే పురుగుల నుంచి రక్షణ కోసం ఇమిడాక్లోప్రిడ్‌ 70 డబ్ల్యూఎస్‌, 5గ్రా./కిలో విత్తనానికి కలిపి విత్తనశుద్ధి చేసుకోవాలి.

విత్తే సమయం..

ప్రారంభ ఖరీఫ్‌లో మే రెండవ పక్షం, రబీ లేదా వేసవిలో నీటిపారుదల కింద డిసెంబర్‌ రెండవ పక్షం నుంచి జనవరి రెండవ పక్షం వరకు విత్తుకోవచ్చు. నువ్వు పంటను రబీ–వేసవికాలంలో సాగు చేసినపుడు అధిక దిగుబడి వస్తుంది. నువ్వు పంటలో అధిక దిగుబడులకు అవసరమైన ఉష్ణోగ్రత, సమానంగా విస్తరించిన వర్షపాతం అవసరం. ఉష్ణోగ్రత 25 డిగ్రీల –27 డిగ్రీల మధ్యలో ఉండే పక్షంలో మొలక శాతం, తొలిదశలో పెరుగుదల, పూత బాగా ఉంటాయి. ఉష్ణోగ్రత 20 డిగ్రీల కంటే తగ్గితే పెరుగుదల తగ్గుతుంది. అలాగే పూతదశలో 37 డిగ్రీల సెంటీగ్రేడ్‌ కంటే అధిక ఉష్ణోగ్రత ఉన్నట్లయితే ఫలదీకరణ జరగక గింజ కట్టదు.

ఎరువుల వాడక విధానం

ఖరీఫ్‌లో ఆఖరి దుక్కిలో ఎకరాకు 4 టన్నుల పశువుల ఎరువు, 16 కిలోల నత్రజని, 8 కిలోల పాస్ఫేట్‌, 8 కిలోల భాస్వరాన్నిచ్చే ఎరువులు వేసుకోవాలి. నత్రజని సగభాగం మొత్తం భాస్పరం, పొటాషినిచ్చే ఎరువులను ఆఖరి దుక్కిలో వేసి బాగా కలియదున్నాలి. మిగతా సగభాగం నత్రజని ఎరువులు విత్తిన నెల రోజులకు కలుపు తీసి వేయాలి. భాస్వరం ఎరువులు సింగిల్‌ సూపర్‌ పాస్ఫేట్‌ రూపంలో వాడినపుడు అధికంగా కాల్షియం, గంధకం లభించి దిగుబడి పెరుగుతుంది.

నీటి యాజమాన్యం పద్ధతులు

విత్తిన వెంటనే మొదటి తడి ఇవ్వాలి. పూత, కాయ అభివద్ధి, గింజకట్టే దశల్లో తడులు ఇవ్వాలి. విత్తిన తర్వాత 35–40 రోజుల నుంచి 55–60 రోజుల వరకు నీటి ఎద్దడి లేకుండా చూడాలి. నువ్వు పంటకు తేలికపాటి తడులు మాత్రమే ఇవ్వాలి. పంట నీటిముంపునకు గురి అయినట్టయితే మొక్కలు చనిపోయే అవకాశం ఉంది.

కలుపు నివారణ, అంతర కృషి

పెండిమిథాలిన్‌ 30 శాతం 4–5 మి.లీ./లీటరు నీటికి చొప్పున విత్తిన 48 గంటల్లోపు తడినేలపై పిచికారీ చేయాలి. విత్తిన తర్వాత వర్షం పడే సూచనలు ఉన్నట్లయితే పెండి మిథాలిన్‌ను పిచికారీ చేయకూడదు. పెండిమిథాలిన్‌ పిచికారీ చేసిన వెంటనే నీటి తడి పెట్టకూడదు లేదా ప్రీటిలాఫ్లోర్‌ 50 శాతం ఇ.సి. 2 మి.లీ./లీటరు నీటికి చొప్పున ఎకరాకు 400 లీ. మందును 200 లీటర్ల నీటిలో కలిపి విత్తిన మూడవ రోజు లోపు వెనక్కి నడుస్తూ పిచికారీ చేయాలి. మొక్కలు మొలచిన 15 రోజులకు అదనపు మొక్కలను తీసి వేయాలి.

లాభదాయకమైన పంట

నువ్వు పంట రైతులకు లాభదాయకమైన నూనె గింజల పంటగా నిలుస్తోంది. సమయానికి విత్తనం, నాణ్యమైన రకాలు, సరైన ఎరువుల వినియోగం, కలుపు నివారణ, నీటి యాజమాన్యం, పురుగు–రోగ నియంత్రణ పద్ధతులను అనుసరించడం ద్వారా పంట ఉత్పత్తి పెరిగి రైతు ఆదాయం గణనీయంగా పెంచుకోవచ్చు. ఆధునిక ఉత్పత్తి సాంకేతికతలను సమర్థంగా అమలు చేయడం వల్ల నువ్వు పంటలో దిగుబడి విప్లవం సాధ్యమవుతుంది. రైతులు వ్యవసాయ శాస్త్రవేత్తల మార్గదర్శకత్వంలో ఈ సాంకేతికతలను అనుసరించి సాగు చేస్తే, పంట నాణ్యత, దిగుబడి, మార్కెట్‌ లాభాలు మూడు కూడా పెరుగుతాయి.

– డాక్టర్‌ ఎన్‌.కృష్ణప్రియ, కో ఆర్డినేటర్‌, ఏరువాక కేంద్రం, కడప

‘నువ్వుల’ సాగుకు ఇదే అదును

‘నువ్వుల’ సాగుకు ఇదే అదును