ఫుడ్‌ ప్రాసెసింగ్‌ యూనిట్లకు త్వరితగతిన అనుమతులు

కలికిరి : కలికిరి సమీపంలోని ఏపీఐఐసీ లేఔట్‌లలో ఫుడ్‌ప్రాసెసింగ్‌ యూనిట్ల ఏర్పాటుకు ముందుకు వచ్చే పారిశ్రామిక వేత్తలకు త్వరితగతిన అనుమతులు మంజూరు చేయనున్నట్లు రాష్ట్ర ఫుడ్‌ ప్రాసెసింగ్‌ ప్రిన్సిపల్‌ సెక్రటరీ చిరంజీవి చౌదరి అన్నారు. కలికిరి సమీపాన, వాల్మీకిపురం మండలం తాటిగుంటపల్లి గ్రామ పరిధిలోని ఏపీఐఐసీ లేఔట్‌లో వున్న చేగు ఫుడ్స్‌, ఎస్‌ఆర్‌కే ఫుడ్స్‌ యూనిట్‌లలో నూతనంగా ఏర్పాటు చేయడానికి, మరో ఫుడ్‌ ప్రాసెసింగ్‌ యూనిట్‌ అనుమతులకు గాను శనివారం ఆయన చేగు ఫుడ్స్‌, ఎస్‌ఆర్‌కే ఫుడ్స్‌ కేంద్రాలను పరిశీలించారు. ఈ సందర్భంగా మాట్లాడుతూ ఫుడ్‌ ప్రాసెసింగ్‌ యూనిట్ల ఏర్పాటుకు ముందుకు వచ్చే వారికి ప్రభుత్వం తరఫున అనుమతులు, రాయితీలు ఉంటాయన్నారు. ఔత్సాహికులు సద్వినియోగం చేసుకోవచ్చన్నారు. కార్యక్రమంలో జిల్లా ఉద్యానశాఖ అధికారిణి సుభాషిణి, జిల్లా పరిశ్రమల అధికారి క్రిష్ణ కిశోర్‌, ఉద్యాన శాఖ పీలేరు హెచ్‌ఓ సుకుమార్‌రెడ్డి తదితరులు పాల్గొన్నారు.