వైఎస్‌ఆర్‌ జిల్లాలోనే సిద్దవటం కొనసాగించాలి

సిద్దవటం : అన్నమయ్య జిల్లాలో సిద్దవటం మండలాన్ని కలుపుతూ చంద్రబాబు ప్రభుత్వం గెజిట్‌ నోటిఫికేషన్‌ ఇవ్వడంపైన సిద్దవటం మండలంలోని ప్రజలు తీవ్ర అసంతృప్తి వ్యక్తం చేస్తూ సిద్దవటం మండలం మాధవరం–1 గ్రామ పంచాయతీ బంగారుపేట శ్రీ గంగాభవానీ అమ్మవారి సన్నిధిలో 14 మందితో జేఏసీ ఏర్పాటు చేసి కార్యాచరణ రూపకల్పన చేశారు. జేఏసీ అధ్యక్షులుగా సొట్టు అమరనాథశర్మను ఏకగ్రీవంగా ఎన్నుకున్నారు. ఈ సందర్భంగా పలువురు సభ్యులు మాట్లాడుతూ ప్రజలకు సౌకర్యాలు కల్పించాల్సిన ప్రభుత్వం ఇబ్బందులకు గురిచేయడం తగదని మండిపడ్డారు. సిద్దవటం మండలాన్ని రాయచోటిలో కలిపే నిర్ణయాన్ని వెనక్కు తీసుకోవాలని.. లేదంటే ఉద్యమాలు, రాస్తారోకోలు, రిలే నిరాహార దీక్షలు, మానవ హారాలు నిర్వహించే విధంగా పోరాటాలు ఉధృతం చేస్తామని తెలిపారు. చేరువలో ఉన్న కడపను కాదని రాయచోటిలో కలపడం ఏమిటని మండిపడ్డారు. సిద్దవటం మండలం కడపలోనే ఉండాలన్నారు. ఈ కార్యక్రమంలో విద్యావంతులు, చేనేత కార్మికులు, పత్రికా విలేకరులు, మేధావులు, స్వచ్ఛంధ సంస్థ సభ్యులు పాల్గొన్నారు.

ఏకలవ్య గిరిజన సేవా సంఘం కార్యవర్గం ఎంపిక

మదనపల్లె రూరల్‌ : ఆంధ్రప్రదేశ్‌ రాష్ట్ర ఏకలవ్య గిరిజన పరిరక్షణ సేవా సంఘం నూతన అధ్యక్షురాలుగా ఆవుల ధనలక్ష్మి నియమితులయ్యారు. శనివారం ఏపీ ఏకలవ్య గిరిజన పరిరక్షణ సేవా సంఘం రాష్ట్ర వర్కింగ్‌ ప్రెసిడెంట్‌ జయప్ప, రాష్ట్ర ప్రధాన కార్యదర్శి డాక్టర్‌ ఆనంద్‌కుమార్‌ నియామకానికి సంబంధించి ఉత్తర్వులు విడుదల చేశారు. ఈ సందర్భంగా వారు మాట్లాడుతూ ధనలక్ష్మి భర్త ఆవుల మల్లికార్జున గతంలో ఏకలవ్య గిరిజన పరిరక్షణ సేవా సంఘం రాష్ట్ర అధ్యక్షులుగా విశేష సేవలందించారన్నారు. కులస్తుల సమస్యలపై తక్షణమే స్పందించి, అన్ని విషయాల్లోనూ అండగా నిలిచారన్నారు. ప్రస్తుతం మల్లికార్జున, వైఎస్సార్‌ సీపీ ఎస్టీ సెల్‌ రాష్ట్ర ప్రధాన కార్యదర్శిగా నియమితులైన నేపథ్యంలో ఆయన గిరిజన సేవా సంఘం అధ్యక్ష పదవికి రాజీనామా చేశారన్నారు. దీంతో ఆయన స్థానంలో ఆవుల ధనలక్ష్మిని రాష్ట్ర అధ్యక్షురాలిగా నియమించినట్లు తెలిపారు. ఈ సందర్భంగా ఆవుల ధనలక్ష్మి మాట్లాడుతూ... ఎరుకుల కులస్తులకు నిత్యం అందుబాటులో ఉంటూ, ప్రభుత్వం నుంచి అందాల్సిన సంక్షేమ పథకాలు, కార్యక్రమాల మంజూరుకు తనవంతు కృషి చేస్తానన్నారు. రాజ్యాంగ నిర్మాత డాక్టర్‌ బాబాసాహెబ్‌ అంబేడ్కర్‌, బీసీల ఆశాజ్యోతి జ్యోతిబాపూలే స్ఫూర్తితో పని చేస్తానన్నారు. రాష్ట్రంలోని బంజారా, ఎరుకుల, యానాది, ఇతర ఎస్టీ కులాలను సమన్వయం చేసుకుని ముందుకెళతామన్నారు.

బీసీ హాస్టళ్ల వార్డెన్ల రాష్ట్ర అధ్యక్షుడిగా మనోహర్‌రెడ్డి

రాయచోటి టౌన్‌ : రాష్ట్ర సంక్షేమ హాస్టళ్ల (వపతి గృహాలు), వార్డెన్ల (అధికారుల) సంఘం రాష్ట్ర అధ్యక్షుడిగా రాయచోటి బీసీ హాస్టల్‌ వార్డెన్‌ ఎంఆర్‌ మనోహర్‌రెడ్డి ఎంపికయ్యారు. విజయవాడలోని ఎన్‌జీవో హోంలో రాష్ట్ర స్థాయి జనరల్‌ బాడీ సమావేశం నిర్వహించారు. ఈ సమావేశంలో తనను ఏకగ్రీవంగా రాష్ట్ర అధ్యక్షులుగా ఎన్నుకున్నారని మనోహర్‌రెడ్డి తెలిపారు. గతంలో కూడా ఒక మారు రాష్ట్ర అధ్యక్షులుగా పని చేశానని, ఆ సమయంలో రాష్ట్ర స్థాయి వార్డెన్ల సమస్యలతోపాటు విద్యార్థుల సమస్యలను పరిష్కరించడంలో తాను ఎంతో కృషి చేశానని చెప్పారు. ఆ నమ్మకంతోనే మళ్లీ ఏకగ్రీవంగా రాష్ట్ర అధ్యక్షులుగా ఎన్నుకున్నారని తెలిపారు. వారి నమ్మకానిన్న వమ్ము కానీయకుండా ఏ సమస్య వచ్చినా ముందుండి పరిష్కారానికి కృషి చేస్తానని చెప్పారు.

వైఎస్‌ఆర్‌ జిల్లాలోనే సిద్దవటం కొనసాగించాలి

వైఎస్‌ఆర్‌ జిల్లాలోనే సిద్దవటం కొనసాగించాలి