ద్విచక్రవాహనాలు ఢీకొని ముగ్గురికి గాయాలు

మదనపల్లె రూరల్‌ : ఎదురెదురుగా వస్తున్న ద్విచక్రవాహనాలు ఢీకొని ముగ్గురు గాయపడిన ఘటన శనివారం బి.కొత్తకోట మండలంలో జరిగింది. మండలంలోని ఎర్రప్పగారిపల్లెకు చెందిన రెడ్డి నరసింహులు(43) మొరవపల్లెకు వెళుతుండగా, మార్గంమధ్యలో అదే గ్రామానికి చెందిన భూదేవి(36) ఆయనతోపాటు బైక్‌పై ఎక్కింది. మొరవపల్లె సమీపంలోని చెరువుకట్టపై గట్టు పంచాయతీ ఆకులవారిపల్లెకు చెందిన శంకర(46) మరో ద్విచక్రవాహనంలో ఎదురుగా వచ్చి ఢీకొనడంతో ముగ్గురు గాయపడ్డారు. గమనించిన స్థానికులు బాధితులను బి.కొత్తకోట ప్రభుత్వ ఆస్పత్రికి తరలించారు. చికిత్సల అనంతరం మెరుగైన వైద్యం కోసం వారిని మదనపల్లె ప్రభుత్వ జిల్లా ఆస్పత్రికి రెఫర్‌ చేశారు.

అంగళ్లులో అక్రమ లేఔట్లు

కురబలకోట : కురబలకోట మండలంలోని అంగళ్లు, కురబలకోట, నందిరెడ్డిగారిపల్లి గ్రామాల్లో విచ్చలవిడిగా అపార్టుమెంట్లు, లేఔట్లు వేస్తున్నారు. అధికారులు మాత్రం పట్టించకోవడం లేదు. అన్నమయ్య జిల్లాలోనే అంగళ్లుకు ఎడ్యుకేషన్‌ హబ్‌గా పేరుంది. ఈ ప్రాంత పరిసరాల్లో ప్లాట్లు పరిగెడుతున్నాయి. అపార్టుమెంట్లు వెలుస్తున్నాయి. అధికారులు పట్టించుకోకపోవడంపై అనుమానాలు వ్యక్తమవుతున్నాయి. మరో వైపు పరిమితికి మించి అపార్టుమెంట్లు కడుతున్నారు. లే ఔట్ల పరిస్థితి కూడా ఇంతే. చాలా వాటికి అప్రూవల్‌ లేదు. అధికారులు మామూళ్లకు తలొగ్గి నియమ నిబంధనలను పట్టించుకోవడం లేదని విమర్శలు వెల్లువెత్తుతున్నాయి. వారు ఉన్నా లేనట్లుగా ఉందని విమర్శిస్తున్నారు. అధికారుల స్వార్థంతో ప్రభుత్వ ఆదాయానికి భారీగా గండి పడుతోందని చెబుతున్నారు. అధికారులకు ముడుపులు ముడుతుండడమే వారి నిశబ్దానికి కారణంగా ప్రజలు చెబుతున్నారు. అక్రమ లేఔట్లు, అపార్టుమెంట్లు రాబోయే రోజుల్లో పెద్ద సమస్యలకు కారణం అవుతాయని భావిస్తున్నారు. అంగళ్లు విద్యా కేంద్రంగా వర్దిల్లుతున్న తరుణంలో ఇలాంటి అక్రమ కట్టడాల వల్ల సమస్యలకు దారితీస్తాయని నిపుణులు వ్యక్తం చేస్తున్నారు. ఈ విషయమై అధికారులను అడగగా.. అక్రమ లే ఔట్లకు, అక్రమ నిర్మాణాలకు నోటీసులు జారీ చేసినట్లు తెలిపారు.

అధికార పార్టీ నాయకుల ఘర్షణ

ఒంటిమిట్ట : మండలంలోని ఓ మారుమూల గ్రామంలో అధికార పార్టీకి చెందిన రెండు కుటుంబాలు ఘర్షణ పడ్డాయి. స్థానికుల వివరాల మేరకు.. శుక్రవారం రాత్రి ఆ గ్రామంలో టీడీపీ పార్టీకి చెందిన రెండు కుటుంబాలు పాత కక్షలు మనసులో ఉంచుకొని ఘర్షణకు దిగారని తెలిసింది. ఈ ఘర్షణలో ఒక వర్గం వారు మరో వర్గంపైకి కర్రలు, రాళ్లతో దాడి చేయబోయినట్లు సమాచారం. ఈ ఘర్షణ శనివారం ఒంటిమిట్ట పోలీసు స్టేషన్‌ వరకు కూడా వచ్చినట్లు వినికిడి. అనంతరం ఒంటిమిట్ట మండలంలోని ఇద్దరు టీడీపీ నాయకులు జోక్యం చేసుకోని వారికి నచ్చచెప్పి పోలీసు స్టేషన్‌ నుంచి పంపించినట్లు చెబుతున్నారు. అయితే ఇక్కడ నచ్చచెప్పడానికి వచ్చిన ఇద్దరు టీడీపీ నాయకులు ఒకరు ఒక వర్గానికి, మరొకరు మరో వర్గానికి మద్దతు తెలిపనట్లు గుసగుసలు వినిపిస్తున్నాయి.

రెవెన్యూ అధికారుల పేరుతో వసూళ్లు

సుండుపల్లె : మండల పరిధిలోని అగ్రహారం గుట్ట, జగనన్న కాలనీలలో రెవెన్యూ అధికారుల పేర్లతో గవర్నమెంట్‌ ఇళ్లకు ఆన్‌లైన్‌ చేయాలని మండలంలోని ఓ వ్యక్తి వెయ్యి రూపాయలు వసూళ్లకు పాల్పడుతున్నట్లు గ్రామస్తులు బుధవారం ఆరోపించారు. ఉన్నతాధికారులు స్పందించి ప్రసాద్‌ అనే వ్యక్తి వసూళ్లకు పాల్పడినట్లు గుర్తించి తహసీల్దార్‌ మెహబూబ్‌చాంద్‌ ఫిర్యాదు మేరకు శనివారం ఎస్‌ఐ ముత్యాల శ్రీనివాసులు కేసు నమోదు చేశారు.

వ్యక్తిపై కేసు నమోదు