TV
అవిశ్వాస తీర్మానం ప్రవేశ పెట్టినందుకే అసత్య ఆరోపణలు
మదనపల్లె రూరల్‌ : కురవంక ఉపసర్పంచ్‌పై అవిశ్వాస తీర్మానం ప్రవేశపెట్టి, పదవి నుంచి తప్పించినందుకు అక్కసుతో సర్పంచ్‌ పసుపులేటి చలపతిపై, టీడీపీ నాయకురాలు బైగారి భారతి అసత్య ఆరోపణలు చేస్తున్నారని వార్డు మెంబర్లు గొంగడి కృష్ణమూర్తి, నాగరాజ తెలిపారు. శనివారం కురవంక గ్రామ సచివాలయం సమీపంలో ఏర్పాటు చేసిన మీడియా సమావేశంలో వారు మాట్లాడారు. 2021 స్థానిక సంస్థల ఎన్నికల్లో సర్పంచ్‌ పసుపులేటి చలపతి ఇండిపెండెంట్‌ అభ్యర్థిగా పోటీ చేసి విజయం సాధించి, వార్డు మెంబర్లందరినీ గెలిపించుకున్నారన్నారు. విద్యావంతురాలు ఉపసర్పంచ్‌గా ఉంటే బాగుంటుందని, వార్డు మెంబర్లందరినీ ఒప్పించి బైగారి భారతికి సముచిత స్థానం కల్పించారన్నారు. మూడు నెలల క్రితం జరిగిన పంచాయతీ సమావేశంలో.. అభివృద్ధి, ఖర్చు చేసిన నిధులపై తీర్మానం సిద్ధం చేస్తే తాను సంతకం చేస్తానని చెప్పి తర్వాత అతీగతీ లేదన్నారు. పంచాయతీ అభివృద్ధికి సహకరించకపోగా, సమావేశాలకు హాజరుకాకపోవడంతో వార్డు మెంబర్లం అవిశ్వాస తీర్మానం నోటీసు పంపామన్నారు. దీన్ని జీర్ణించుకోలేని బైగారి భారతి.. సర్పంచ్‌ పసుపులేటి చలపతితో తనకు ప్రాణహాని ఉందని సామాజిక మాథ్యమాల్లో వ్యాఖ్యానించడం హాస్యాస్పదమన్నారు. పంచాయతీలో ఐదుగురు మహిళా వార్డు మెంబర్లు ఉన్నారని, ఏరోజు ఎలాంటి ఇబ్బందులు రాలేదన్నారు. కురవంక పంచాయతీలో కోట్లాది రూపాయల అభివృద్ధి జరిగిందని, మండలంలోని అన్ని పంచాయతీలకు ఆదర్శ పంచాయతీగా తీర్చిదిద్దడం జరిగిందన్నారు. గత టీడీపీ ప్రభుత్వంలో సర్పంచ్‌గా పని చేసిన పసుపులేటి మోహన్‌ అవినీతి గురించి పంచాయతీలోని ప్రజలందరికీ తెలుసన్నారు. కురవంక టీడీపీ ఇన్‌చార్జి పసుపులేటి వినోద్‌కుమార్‌, తన తండ్రి చేసిన అవినీతి, అమ్ముకున్న ప్రభుత్వ స్థలాలు, ప్రజల నుంచి చేసిన అక్రమ వసూళ్ల గురించి తెలుసుకుని, తర్వాత మాట్లాడాలన్నారు. బైగారి భారతి వారం రోజుల క్రితమే రాజీనామా చేశానని అబద్ధాలు చెప్పారని, అలాగైతే సబ్‌ కలెక్టర్‌ చల్లా కల్యాణి అవిశ్వాస తీర్మానానికి ఎందుకు హాజరయ్యారని ప్రశ్నించారు. టీడీపీ నాయకురాలిగా బైగారి భారతి ఏం చేసుకున్నా తమకు సంబంధం లేదని, పంచాయతీ వార్డు మెంబర్‌గా ఉంటూ, అభివృద్ధిని అడ్డుకోవాలని చూస్తే మాత్రం ఊరుకునేది లేదని హెచ్చరించారు. ఇప్పటికై నా అసత్య ఆరోపణలు మానుకుని, పంచాయతీ అభివృద్ధికి సహకరించాలని కోరారు. కార్యక్రమంలో వార్డు సభ్యులు అనిత, శ్రీనివాసులు, చంద్రిక, పంచాయతీ ప్రజలు పాల్గొన్నారు.
