TV
టిప్పర్‌ డ్రైవర్‌పై ఆకతాయిల దాడి
మదనపల్లె రూరల్‌ : జార్ఖండ్‌కు చెందిన టిప్పర్‌ డ్రైవర్‌పై మద్యం మత్తులో ఆకతాయిలు దాడికి పాల్పడిన ఘటన శనివారం రాత్రి మదనపల్లెలో జరిగింది. జార్ఖండ్‌కు చెందిన నూర్‌ ఆలం(27) పట్టణంలోని రెడ్డీస్‌కాలనీ యోగివేమన నగర్‌లో ఉంటూ టిప్పర్‌ డ్రైవర్‌గా పని చేస్తున్నాడు. సాయంత్రం నీరుగట్టువారిపల్లె వద్ద కూర్చుని హిందీలో తన కుటుంబ సభ్యులతో ఫోన్‌లో మాట్లాడుతుండగా, పక్కనే మద్యం తాగుతున్న పల్లె క్రాస్‌కు చెందిన ఆకతాయిలు.. నూర్‌ ఆలం తమను తిడుతున్నాడని భావించి అకారణంగా అతడిపై దాడికి పాల్పడ్డారు. మద్యం మత్తులో విచక్షణా రహితంగా కొట్టడమే కాకుండా కాళ్లతో తన్నారు. దాడిలో టిప్పర్‌ డ్రైవర్‌కు నోటి నుంచి రక్తస్రావం కాగా అపస్మారక స్థితికి వెళ్లాడు. ఈ విషయాన్ని స్థానికులు టిప్పర్‌ యజమాని జేసీబీ మధుకు తెలపడంతో.. ఆయన వెంటనే బాధితుడిని జిల్లా ప్రభుత్వ ఆస్పత్రికి తరలించారు. దాడిపై వన్‌టౌన్‌ పోలీస్‌స్టేషన్‌లో ఫిర్యాదు చేశారు.
గోరాన్‌ చెరువు వద్ద
రోడ్డు ప్రమాదం
గాలివీడు : మండలంలోని గోరాన్‌ చెరువు గ్రామం గొల్లపల్లి వద్ద శనివారం సాయంత్రం రోడ్డు ప్రమాదం చోటుచేసుకుంది. ఆర్టీసీ డ్రైవర్‌ ఈశ్వరయ్య తన సొంత వాహనం కారు(షిఫ్ట్‌ డిజైర్‌)లో డ్యూటీ నిమిత్తం రాయచోటికి వెళుతుండగా గొల్లపల్లి వద్ద అదుపు తప్పి పక్కనే ఉన్న రాయిని ఢీకొన్నాడు. ఈ ఘటనలో కారులో ఒక్కడే ఉన్న ఈశ్వరయ్య ఎటువంటి గాయాలు లేకుండా సురక్షితంగా బయటపడ్డాడు. ఈ ఘటనపై పూర్తి వివరాలు తెలియాల్సి ఉంది.
గంజాయి ముఠాను
శిక్షించండి
మదనపల్లె : నెల్లూరులో గంజాయి, మాదకద్రవ్యాలకు వ్యతిరేకంగా ప్రజల్లో చైతన్యం తీసుకొస్తున్న కళాకారుడు పెంచలయ్యను హత్య చేసిన దుండగులను కఠినంగా శిక్షించాలని సీపీఎం జిల్లా కార్యదర్శి పి.శ్రీనివాసులు డిమాండ్‌ చేశారు. శనివారం ఆయన మీడియాతో మాట్లాడుతూ ప్రజానాట్యమండలి కార్యదర్శిగా పెంచలయ్య గంజాయిపై కళారూపాల్లో వ్యతిరేకించడం జీర్ణించుకోలేని ముఠాలు.. బిడ్డలతో కలిసి బైక్‌పై వెళ్తుండగా దాడి చేసి హతమార్చడం దారుణమన్నారు. గంజాయి వ్యాపారులే ఈ ఘాతుకానికి పాల్పడ్డారని, వారిని గుర్తించి ప్రభుత్వం కఠిన చర్యలు తీసుకుని శిక్షించాలని కోరారు.
