TV
సంస్థాగతంగా కాంగ్రెస్‌ పటిష్టతకు కృషి
మదనపల్లె : కాంగ్రెస్‌ పార్టీని సంస్థాగతంగా పటిష్టం చేసేందుకు కృషి చేస్తున్నట్టు ఏఐసీసీ పరిశీలకుడు కె.మహేంద్రన్‌ అన్నారు. శనివారం మదనపల్లెలో ఆ పార్టీ నియోజకవర్గ సమావేశం జరిగింది. ఈ సందర్భంగా ఆయన పార్టీ స్థితిగతులను సమీక్షించారు. నియోజకవర్గ ఇన్‌చార్జి పవన్‌కుమార్‌రెడ్డి ఆధ్వర్యంలో సమావేశమైన మహేంద్రన్‌, ఏఐసీసీ కార్యదర్శి గణేష్‌కుమార్‌ యాదవ్‌, టీపీసీసీ ప్రధాన కార్యదర్శి రాకేష్‌, పార్టీ నాయకులు, కార్యకర్తలతో డీసీసీ అధ్యక్షుడి ఎన్నిక, వివిధ అంశాలపై చర్చించారు. ఈ సందర్భంగా వారు మాట్లాడుతూ 2029లో ఎన్నికల్లో విజయమే లక్ష్యంగా ప్రతి కార్యకర్త పని చేయాలన్నారు. కాంగ్రెస్‌ పార్టీ లేని గ్రామం, రాష్ట్రం లేదన్నారు. పార్టీ కోసం ప్రతి కార్యకర్త చిత్తశుద్ధితో పని చేయాలని కోరారు. టీడీపీ, జనసేనలు బీజేపీ ఏజంట్లని అన్నారు. డీసీసీ అధ్యక్షుడి ఎన్నికను పారదర్శకంగా నిర్వహించేందుకే సంఘటన్‌ శ్రీజన్‌ అభియాన్‌ పేరుతో కార్యక్రమాలు నిర్వహిస్తున్నట్టు చెప్పారు. క్షేత్రస్థాయిలో పార్టీని బలోపేతం చేసేందుకు శ్రేణులను సిద్ధం చేస్తున్నట్టు చెప్పారు. అంతకుముందు కాంగ్రెస్‌ పార్టీ శ్రేణులు ర్యాలీ నిర్వహించారు. ఈ కార్యక్రమాల్లో ఓబీసీ విభాగం చైర్మన్‌ ఆవుల ఆది, జిల్లా అధ్యక్షులు గాజుల భాస్కర్‌, మైనార్టీ విభాగం రాష్ట్ర ఉపాధ్యక్షులు ఎస్‌కే బాషా, మహిళా విభాగం జిల్లా అధ్యక్షురాలు నిగార్‌ సుల్తానా, యువజన విభాగం జిల్లా అధ్యక్షులు కొండుపల్లి ఆనంద్‌, సీనియర్‌ నాయకులు రెడ్డిసాహెబ్‌, మీనాకుమారి, ముబారక్‌ఖాన్‌, ఈశ్వరమ్మ, ఖాదర్‌బాషా, శరత్‌కుమార్‌, గుల్షన్‌, నాగరాజు, భానుప్రకాష్‌రెడ్డి తదితరులు పాల్గొన్నారు.
