తంబళ్లపల్లె అభివృద్ధికి నిధులు ఇవ్వండి

బి.కొత్తకోట : తంబళ్లపల్లె నియోజకవర్గ అభివృద్ధికి వెయ్యి కోట్లు మంజూరు చేయాలని సీపీఐ జిల్లా కార్యదర్శి మహేష్‌ ప్రభుత్వాన్ని డిమాండ్‌ చేశారు. శనివారం బి.కొత్తకోటలో ఆ పార్టీ నియోజకవర్గ సమావేశంలో ఆయన మాట్లాడుతూ విద్య, వైద్య రంగాల్లో తంబళ్లపల్లె వెనుకబడిందన్నారు. టీడీపీ వర్గ విబేధాలతో అభివృద్ధి కుంటుబడిందన్నారు. ఇక్కడి ప్రజలు ఉపాధి కోసం వలసలు వెళ్తున్నారని, వారిని ఆదుకోవాలని పేర్కొన్నారు. మండలాల్లో పరిశ్రమలను నెలకొల్పి ఉపాధి అవకాశాలు కల్పించాలని కోరారు. గిరిజనులకు జనుపనార, వేరుశెనగ పరిశ్రమలు స్థాపించాలని అన్నారు. వైద్యం కోసం ఇప్పుడున్న సీహెచ్‌సీల అభివృద్ధికి, పీహెచ్‌సీల అప్‌గ్రేడ్‌కు చర్యలు తీసుకోవాలని డిమాండ్‌ చేశారు. మదనపల్లె ప్రభుత్వ వైద్య కళాశాలను ప్రయివేటీకరించొద్దని కోరారు. సమావేశంలో జిల్లా సహాయ కార్యదర్శి కృష్ణప్ప, నియోజకవర్గ కార్యదర్శి మనోహర్‌రెడ్డి, నాయకులు అంజనప్ప, రఘునాథ్‌, అష్రఫల్లీ, నారాయణస్వామి, హరికుమార్‌, తంబయ్యశెట్టి, నిజాముద్దీన్‌, జవహర్‌బాబు పాల్గొన్నారు.