కానరాని ఉషస్సు

అనంతపురం: శ్రీకృష్ణదేవరాయ విశ్వవిద్యా లయంలో మౌలిక సదుపాయాల కల్పనకు పీఎం ఉష (ప్రధాన మంత్రి– ఉచ్ఛతార్‌ శిక్షా అభియాన్‌) కింద రూ.20 కోట్ల నిధులు మంజూరయ్యాయి. ఈ నిధులు ఖర్చుపెట్టలేని నిస్సహాయ స్థితిలో వర్సిటీ ఉన్నతాధికారులు ఉన్నారు. దీంతో నిధులకు చెదలు పట్టడమే కాకుండా వెనక్కి వెళ్లే ప్రమాదం ఏర్పడింది. 2026 మార్చిలోపు నిధులు ఖర్చు చేయకపోతే వెనక్కి వెళ్లడమే కాకుండా మరో దఫా రావాల్సిన రూ.20 కోట్ల నిధులూ రాని పరిస్థితి ఏర్పడనుంది. ఇప్పటి దాకా ఒక్క పనిలో కూడా కనీసం అడుగు కూడా ముందుకు పడకపోవడంతో మార్చి నెలాఖరులోపు దాదాపుగా పూర్తి చేయని దుస్థితి నెలకొంది.

సమావేశాలతో సరి..

పీఎం ఉష పథకం కింద పెద్ద ఎత్తున మౌలిక సదుపాయాల కల్పనకు అవకాశముంటుంది. న్యాక్‌ గ్రేడింగ్‌ను బట్టి నిధులు మంజూరవుతాయి. నాక్‌ ఏ ప్లస్‌ గ్రేడ్‌ ఉంటే రూ.100 కోట్ల నిధులు, న్యాక్‌–బీ గ్రేడ్‌ ఉంటే రూ.20 కోట్ల నిధులు అందుతాయి. శ్రీకృష్ణదేవరాయ విశ్వవిద్యాలయానికి న్యాక్‌–బీ గ్రేడ్‌ గుర్తింపు ఉండడంతో రూ.20 కోట్ల నిధులు మంజరయ్యాయి. గత వైఎస్సార్‌ సీపీ ప్రభుత్వ హయాంలో వర్సిటీ వీసీగా పనిచేసిన ప్రొఫెసర్‌ మాచిరెడ్డి రామకృష్ణా రెడ్డి ‘పీఎం– ఉష’కు దరఖాస్తు చేయగానే, నిధులు మంజూరయ్యాయి. అనంతరం అప్పట్లోనే వీసీ ప్రొఫెసర్‌ కే. హుస్సేన్‌ రెడ్డి హయాంలో నిధులు వర్సిటీ ఖాతాకు జమయ్యాయి. 2026 మార్చి నెలాఖరులోపు రూ.20 కోట్ల నిధులు ఖర్చు చేయకపోతే వెనక్కి వెళ్లే ప్రమాదం ఉందని తెలిసినా వర్సిటీ ఉన్నతాధికారులు పట్టించుకోకపోవడం గమనార్హం. సివిల్‌ పనులకు సంబంధించి టెండర్లు మాత్రమే ఖరారయ్యాయి. అవి ఎప్పుడు ప్రారంభం అవుతాయో తెలియదు. గడువు సమీపిస్తున్నా తరచూ సమావేశాలు నిర్వహించడం, చర్చించడంతోనే కాలయాపన చేస్తున్నారనే విమర్శలు సర్వత్రా వ్యక్తమవుతున్నాయి.

వర్సిటీ అభివృద్ధిపై శ్రద్ధేదీ?

వర్సిటీలో ఉద్యోగులకు జీతాలు చెల్లించడానికి బ్లాక్‌గ్రాంట్‌ నిధులు మినహా నయాపైసా నిధులను చంద్రబాబు ప్రభుత్వం అందించిన పాపాన పోలేదు. నూతన ప్రాజెక్ట్‌ ఒక్కటీ రాలేదు. అభివృద్ధి కార్యక్రమాలకు ఒక్క రూపాయి మంజూరు చేయలేదు. వర్సిటీల అభివృద్ధిపై చంద్రబాబు ప్రభుత్వం దృష్టి పెట్టకపోగా.. పీఎం ఉష పథకం కింద గత ప్రభుత్వం హయాంలో అందిన నిధుల ఖర్చుపై దృష్టి పెట్టడంలో నిర్లక్ష్యం చేస్తున్నారనే విమర్శలు వినిపిస్తున్నాయి. వర్సిటీ భవిష్యత్తుపై ఉన్నతాధికారులు దృష్టి సారించడంలేదనే అభిప్రాయాలు వ్యక్తమవుతున్నాయి.

‘అన్నీ ఉన్నా అల్లుడి నోట్లో శని’ అన్న చందాన తయారైంది ఎస్కేయూలో పరిస్థితి! అభివృద్ధి పనుల కోసం నిధులు మంజూరు చేయాలని అధికారులు పదేపదే విజ్ఞప్తి చేయడం అందరికీ తెలిసిందే. కానీ, ఎస్కేయూలో మాత్రం అందుకు పూర్తి భిన్నమైన పరిస్థితి నెలకొంది. నిధులుండీ ఖర్చు చేయలేని దుస్థితి సర్వత్రా చర్చనీయాంశంగా మారింది.

వైఎస్సార్‌ సీపీ హయాంలో పీఎం ఉష పథకం కింద

ఎస్కేయూకు రూ.20 కోట్ల నిధులు

2026 మార్చి నెలాఖరులోపు

పనులు పూర్తి చేయాలని లక్ష్యం

గడువులోపు నిధులు ఖర్చు చేస్తే..

మరో రూ.20 కోట్లు వచ్చే అవకాశం

ఇప్పటిదాకా ప్రారంభం కాని పనులు

వర్సిటీ అధికారుల తీరుపై సర్వత్రా విమర్శలు

కానరాని ఉషస్సు