జిల్లాలో కంది, మొక్కజొన్న సాగు చేసిన రైతుల కంట కన్నీరు కనిపిస్తోంది. పంటకు గిట్టుబాటు ధర దక్కక అన్నదాతల ఆవేదన వర్ణనాతీతంగా మారింది. వరుణుడు భయపెడుతుండడంతో పంటను కాపాడుకోలేక... మార్కెట్‌లో తక్కువ ధరకు అమ్ముకోలేక అల్లాడిపోతున్నారు. క్రమక్రమంగా అప్పుల ఊబిలోక

రైతులను వెంటాడుతున్న కష్టాలు

● కంది, మొక్కజొన్న పంటలకు దక్కని కనీస మద్దతు ధర

● కొనుగోలు కేంద్రాలు ఏర్పాటు చేయని చంద్రబాబు ప్రభుత్వం

● అన్నదాత కష్టాలు వర్ణనాతీతం

కూడేరు మండలం ముద్దలాపురంలో పొలాల్లోనే ఆరబోసిన మొక్కజొన్నలు

కళ్యాణదుర్గం/కూడేరు: ఇప్పటివరకూ అరటి రైతు కష్టాలు అందరినీ ఆలోచింపజేశాయి. తాజాగా ఆ జాబితాలో కంది, మొక్కజొన్న రైతులు చేరారు. ఈ ఖరీఫ్‌లో జిల్లావ్యాప్తంగా కంది 55,296 హెక్టార్లలో సాగులోకి వచ్చింది. ఇటీవల పంటను తొలగించారు. చంద్రబాబు ప్రభుత్వం కంది పంటకు కనీస మద్దతు ధర క్వింటాల్‌కు రూ.7,550 ప్రకటించినా కొనుగోలు చేయడంలో నిర్లక్ష్యం చేస్తుండడంతో నష్టపోవాల్సిన పరిస్థితి తలెత్తుతోంది. ప్రస్తుతం మార్కెట్లో వ్యాపారులు కంది క్వింటాల్‌ ధర రూ.6,300కు కూడా కొనుగోలు చేసేందుకు ముందుకు రాకపోవడంతో రైతన్నల పరిస్థితి అగమ్యగోచరంగా తయారైంది.

మొక్కజొన్న.. ధర లేదన్నా..

మొక్కజొన్న సాగు చేసిన రైతుల పరిస్థితి దయనీయంగా మారింది. జిల్లావ్యాప్తంగా ఖరీఫ్‌లో 42 వేల హెక్టార్లలో పంట సాగైంది. ఇతర పంటలతో పోల్చితే తక్కువ పెట్టుబడితో గిట్టుబాటవుతుందన్న ఉద్దేశంతో ఖరీఫ్‌లో రైతులు జిల్లా వ్యాప్తంగా విస్తారంగా సాగు చేశారు. మంచి దిగుబడులు వచ్చాయి. పంట చేతికొచ్చి విక్రయించాల్సిన సమయంలో ధర పడిపోయింది. దీంతో రైతులు నానా అవస్థలు పడుతున్నారు. ప్రభుత్వం కనీస మద్దతు ధర క్వింటా రూ.2,400 ప్రకటించినా.. కొనుగోలు చేయడంలో మీనమేషాలు లెక్కిస్తోంది. ఇదే క్రమంలో క్వింటా ధర బహిరంగ మార్కెట్లో కేవలం రూ.1,600–రూ.1,750 పలుకుతుండడంతో రైతులు నష్టపోయే పరిస్థితి ఏర్పడింది.

బూజు పడుతున్న గింజలు...

పొలాల్లోనే మొక్కజొన్న గింజలను రైతులు నిల్వ ఉంచుకున్నారు. ఇటీవల మంచు కురుస్తుండడంతో గింజలు దెబ్బతినకుండా టార్ఫాలిన్‌ కప్పుతున్నారు. అయితే, వాతావరణంలో మార్పుతో సూర్యరశ్మి అంతంత మాత్రంగానే తగులుతుండడంతో గింజలు బూజు పట్టాయి. కష్టపడి పండించిన పంట దెబ్బతింటుంటే రైతులు జీర్ణించుకోలేకపోతున్నారు.

జిల్లాలో కంది, మొక్కజొన్న సాగు చేసిన రైతుల కంట కన్నీరు