బోయ ఆనంద్‌ది ముమ్మాటికీ హత్యే

● హంతకులకు ఎమ్మెల్యే అమిలినేని సురేంద్రబాబు అండదండలు

● మాజీ ఎంపీ తలారి రంగయ్య ధ్వజం

అనంతపురం: ‘బ్రహ్మసముద్రం మండలం యనకల్లు గ్రామానికి చెందిన బోయ ఆనంద్‌ది ముమ్మాటికీ పరువు హత్యే. కళ్యాణదుర్గం నియోజకవర్గంలో ఎమ్మెల్యే అమిలినేని సురేంద్రబాబు ఆటవిక పాలన సాగిస్తూ బీసీ సామాజికవర్గాల వారిపై దమనకాండకు పాల్పడుతున్నారు. హంతకులు సీఎం చంద్రబాబు సామాజికవర్గానికి చెందిన వారు కావడం, ఎమ్మెల్యే సురేంద్రబాబు అండదండలు ఉండడంతో పోలీసులు పట్టించుకోవడం లేదు’ అంటూ వైఎస్సార్‌ సీపీ కళ్యాణదుర్గం సమన్వయకర్త, మాజీ ఎంపీ తలారి రంగయ్య ధ్వజమెత్తారు. శనివారం బాధిత కుటుంబ సభ్యులతో కలిసి వైఎస్సార్‌సీపీ జిల్లా కార్యాలయంలో ఆయన విలేకరులతో మాట్లాడారు. చంద్రబాబు సామాజికవర్గానికి చెందిన ఓ యువతి, బోయ ఆనంద్‌ ఐదు సంవత్సరాలుగా ప్రేమించుకుంటున్నారన్నారు. ఈ విషయం తెలిసిన యువతి తల్లిదండ్రులు గతంలోనే ఆనంద్‌ తల్లిదండ్రులైన బోయ వెంకటేశులు, వరలక్ష్మిపై పాశవికంగా దాడి చేశారన్నారు. ఈ క్రమంలోనే ఆనంద్‌ బెంగళూరుకు వెళ్లిపోయి ఉద్యోగంలో చేరాడన్నారు. ఈ నెల 20న మళ్లీ సదరు యువతి ఫోన్‌ చేసి కళ్యాణదుర్గం రాకపోతే పురుగుల మందు తాగి ఆత్మహత్య చేసుకుంటానని చెప్పడంతో వెంటనే బయలుదేరి వచ్చాడన్నారు. ఈ క్రమంలో రాయదుర్గం రోడ్డులోని పెట్రోల్‌ బంకు వెనుక ముళ్ల కంపల్లో బోయ ఆనంద్‌కు యువతి తల్లిదండ్రులు, వారి కుటుంబ సభ్యులు బలవంతంగా గడ్డి మందు తాగించి, చిత్రహింసలకు గురి చేసి హత్య చేశారన్నారు. దీనిపై బ్రహ్మసముద్రం పోలీస్‌ స్టేషన్‌తో పాటు కళ్యాణదుర్గం సీఐకి బాధిత కుటుంబీకులు ఫిర్యాదు చేసినా స్పందించలేదన్నారు. ఆనంద్‌ను కడతేర్చారనేందుకు తమ వద్ద అన్ని ఆధారాలు ఉన్నాయని పేర్కొన్నారు. పోలీసులు నిష్పాక్షికంగా దర్యాప్తు చేసి నిందితులకు శిక్ష పడేలా చేయకుంటే పెద్ద ఎత్తున ఆందోళన చేస్తామని హెచ్చరించారు.

ఇంకా ఎంత మంది బలి కావాలి..?

కళ్యాణదుర్గం నియోజకవర్గంలో ఎమ్మెల్యే అమిలినేని సురేంద్రబాబు,టీడీపీ నాయకుల వేధింపులకు ఎంతో మంది ఎస్సీ, బీసీలు బలవుతున్నారని రంగయ్య పేర్కొన్నారు. టీడీపీలో చేరలేదని వేధించడంతో మర్రిమాకులపల్లికి చెందిన గొల్ల మమత తన బిడ్డను నీళ్ల తొట్టెలో వేసి తనూ ఆత్మహత్య చేసుకుందని వాపోయారు. కళ్యాణదుర్గం పట్టణానికి చెందిన తలారి శ్రావణిని టీడీపీకి చెందిన మున్సిపల్‌ మాజీ చైర్మన్‌, మాజీ వైస్‌ చైర్మన్‌ పోలీసులతో కుమ్మకై ్క వేధించడంతో బాధితురాలు ఆత్మహత్య చేసుకుందన్నారు. బోరంపల్లి చాకలి రామాంజినేయులు, తలారి రత్నమ్మలూ టీడీపీ నాయకుల బాధితులేనన్నారు. జంబుగుంపలకు చెందిన షాలిని అనే బాలికను టీడీపీ నాయకులు పట్టపగలే చేయి పట్టుకుని అఘాయిత్యం చేసేందుకు యత్నించారని విమర్శించారు.

బాధిత కుటుంబాన్ని ఆదుకోవాలి..

బోయ ఆనంద్‌ హత్యతో కుటుంబం దిక్కులేనిదిగా మారిందని రంగయ్య వాపోయారు. తక్షణమే కుటుంబాన్ని ఆదుకోవాలని, కోటి రూపాయల పరిహారంతో పాటు ఆనంద్‌ సోదరి పూజకు ప్రభుత్వ ఉద్యోగం కల్పించాలని డిమాండ్‌ చేశారు. కార్యక్రమంలో వైఎస్సార్‌ సీపీ ఎస్సీ సెల్‌ రాష్ట్ర ప్రధాన కార్యదర్శి చామలూరు రాజగోపాల్‌, జిల్లా కార్యనిర్వాహక కార్యదర్శి యర్రంపల్లి కృష్ణమూర్తి, బ్రహ్మసముద్రం, కళ్యాణదుర్గం రూరల్‌ కన్వీనర్లు పాలబండ్ల చంద్రశేఖర్‌ రెడ్డి, గోళ్ల సూరి, కంబదూరు జెడ్పీటీసీ జి. నాగరాజు, మున్సిపల్‌ విభాగం అధ్యక్షుడు దొడగట్ట మురళి, లీగల్‌ సెల్‌ నాయకులు రామాంజినేయులు, ఎనుముల దొడ్డి సర్పంచ్‌ విజయ్‌కుమార్‌, సీనియర్‌ నాయకులు భాస్కర్‌, అంకంపల్లి గోపాల్‌, జానీ తదితరులు పాల్గొన్నారు.