స్వాహా చేసి .. పోటీకి దూరమై

కై లాస్‌నగర్‌: గ్రామ పంచాయతీ పాలనలో సర్పంచ్‌లది కీలకపాత్ర. కేంద్ర, రాష్ట్ర ప్రభుత్వాలు కేటా యించే నిధులతో పాటు స్థానికంగా వసూలయ్యే పన్నులను సక్రమంగా వినియోగిస్తూ గ్రామాలను అభివృద్ధి బాటలో నడిపించాల్సిన బాధ్యత వారిదే. అయితే జిల్లాలో కొంతమంది సర్పంచ్‌లు అడ్డదారి తొక్కారు. నిధుల దుర్వినియోగానికి పాల్పడ్డారు. దీంతో డిఫాల్టర్లుగా మిగిలి సర్పంచ్‌ పదవీకి పోటీకి అనర్హులుగా మిగిలారు. వారి వివరాలను జిల్లా ఉన్నతాధికారులతో పాటు రాష్ట్ర ఎన్నికల సంఘానికి పంపించారు. అయితే స్వాహా చేసిన సొమ్ము రికవరీని అధికారులు విస్మరించడం గమనార్హం.

రూ.1.49 కోట్ల నిధుల దుర్వినియోగం

జిల్లాలో 1990 నుంచి 2024 వరకు జరిగిన గ్రామ పంచాయతీ ఎన్నికల్లో సర్పంచ్‌ పదవి చేపట్టిన వారి లో 46 మంది నిధులను దుర్వినియోగం చేశారు. గ్రామాల అభివృద్ధి కోసం వినియోగించాల్సిన రూ.1.49 కోట్ల నిధులను పక్కదారి పట్టించారు. అధికారులు విచారణ జరిపి నిధుల దుర్వినియోగం జరిగినట్లు నిర్దారించినా వారు నయాపైసా తిరిగి ప్రభుత్వానికి చెల్లించలేదు. దీంతో డిఫాల్టర్లుగా మిగిలిపోయారు. ఇందులో అత్యధికంగా 2006–10 సమయంలో 18మంది, 2013–18 సమయంలో నలుగురు నిధులను పక్కదారి పట్టించిన ట్లు తేలింది. ఇందులో అత్యధికంగా జైనథ్‌ మండలంలో 12మంది, తాంసిలో ఎనిమిది మంది, బో థ్‌లో ఆరుగురు, ఉట్నూర్‌లో నలుగురు, ఇచ్చోడలో ముగ్గురు, ఆదిలాబాద్‌ రూరల్‌లో నలుగురు, తలమడుగు, గుడిమత్నూర్‌, బేలలో ఇద్దరేసి చొప్పున, నేరడిగొండ, నార్నూర్‌, బజార్‌హత్నూర్‌, ఇంద్రవెల్లిలో ఒక్కొక్కరు చొప్పున నిధులను స్వాహా చేసి డిఫాల్టర్లుగా నిలిచి పోటీకి దూరమయ్యారు.

తాజా మాజీలు ముగ్గురు..

తాజా మాజీలుగా మారిన వారిలో ముగ్గురు అనర్హులుగా తేలారు. 2019–24 వరకు సర్పంచ్‌గా పనిచేసిన వారిలో ఉట్నూర్‌ మండలం హస్నాపూర్‌లో అత్యధికంగా రూ.37లక్షల 93వేల 930 నిధుల దు ర్వినియోగం జరిగినట్లు అధికారులు నిర్ధారించారు. అలాగే ఇచ్చోడ మండలం నర్సాపూర్‌–టి సర్పంచ్‌, ఉపసర్పంచ్‌ కలిసి రూ.22లక్షల13వేల 831 నిధులను స్వాహాచేశారు. ఉట్నూర్‌ మండలంలోని శ్యాం నాయక్‌ తండా సర్పంచ్‌ రూ.2లక్షల 23వేల157 నిధులు దుర్వినియోగం చేసినట్లుగా తేలింది. వీరు కూడా ప్రస్తుతం పోటీకి అనర్హులుగా మిగిలారు.

అటకెక్కిన రికవరీ ...

దుర్వినియోగమైన నిధులను రికవరీ చేయాల్సిన జిల్లా పంచాయతీ అధికారులు పట్టించుకోవడం లేదని తెలుస్తోంది. సర్పంచ్‌ల పదవీకాలం ముగిసి న వెంటనే వారితో తమకు సంబంధం లేదనట్లుగా వ్యవహరిస్తున్నారు. మొక్కుబడిగా నోటీసులు జారీ చేసి సరిపెడుతున్నారనే విమర్శలున్నాయి. దీంతో దుర్వినియోగమైన సొమ్ములో ఇప్పటి వరకు నయాపైసా రికవరీ కాకపోవడం గమనార్హం.

నిధుల రికవరీకి చర్యలు

పంచాయతీ నిధులను దుర్వినియోగం చేసిన వారిపై కఠినంగా వ్యవహరిస్తాం. స్వాహా చేసిన సొమ్మును తిరిగి చెల్లించాలని తాజా మాజీ సర్పంచ్‌లకు నోటీసులు జారీ చేస్తాం. వాటికి స్పందించని పక్షంలో రెవెన్యూ రికవరీ యాక్ట్‌ (ఆర్‌ఆర్‌)ను ఉపయోగించైనా తిరిగి వసూలు చేసేలా చర్యలు చేపడుతాం.

– జి.రమేశ్‌, జిల్లా పంచాయతీ అధికారి