సమన్వయం దిశగా..

సాక్షి, ఆదిలాబాద్‌: ఇటీవల డీసీసీ అధ్యక్షుడిగా నియమితులైన నరేశ్‌ జాదవ్‌ కాంగ్రెస్‌ పార్టీ పటిష్టత దిశగా దృష్టి సారించారు. సీనియర్‌ నేతల మధ్య విభేదాలు తొలగించి ఏకతాటిపైకి తెచ్చేందుకు ప్ర యత్నాలు ముమ్మరం చేశారు. పార్టీని బలోపేతం చేయడం, స్థానిక సంస్థల ఎన్నికల్లో విజయం సాధించడంపై ఫోకస్‌ పెట్టారు. పాత, కొత్త, సీనియర్‌, జూనియర్‌ తేడా లేకుండా అందరు నేతలను కలుస్తూ కలిసి రావాలని కోరుతున్నారు. ప ట్టణంలోని స్థానిక టీఎన్జీవోస్‌ భవన్‌లో పార్టీ జిల్లా సమావేశం ఆదివారం నిర్వహిస్తున్నారు. ఈ వేదిక ద్వారా పంచాయతీ ఎన్నికల్లో పార్టీ బలపర్చిన అభ్యర్థుల గెలుపుకోసం నేతలు కలిసికట్టుగా ముందుకెళ్లేలా చొరవ చూపుతున్నారు.

నేతలను కలుస్తూ..

మాజీ ఎంపీ సోయం బాపూరావు, బోథ్‌ మాజీ ఎమ్మెల్యే రాథోడ్‌ బాపూరావు, మాజీ జెడ్పీటీసీ గోక గణేశ్‌రెడ్డిలను శనివారం కలిశారు. అధ్యక్ష బాధ్యతలు స్వీకరించి ఆదిలాబాద్‌ వచ్చిన మొదట్లోనే సీని యర్‌ నాయకురాలు గండ్రత్‌ సుజాత, కిసాన్‌ కాంగ్రెస్‌ రాష్ట్ర ప్రధాన కార్యదర్శి బోరంచు శ్రీకాంత్‌ రెడ్డి, మార్కెట్‌ కమిటీ మాజీ చైర్మన్‌ అల్లూరి సంజీవ్‌రెడ్డిల మద్దతు కోరారు. ఆదిలాబాద్‌ నియోజకవర్గ ఇన్‌చార్జి కంది శ్రీనివాస్‌ రెడ్డి స్థానికంగా లేకపోయినప్పటికీ ఆయనతో ఫోన్‌లో మాట్లాడారు. ఆయన వర్గీయులు కూడా నరేశ్‌తో కలిసి ముందడుగు వేస్తున్నారు. బోథ్‌ నియోజకవర్గ ఇన్‌చార్జి ఆడె గజేందర్‌తో కూడా మంతనాలు జరిపారు. ఇక ఆదివారం జరిగే సమావేశం ద్వారా పార్టీలో సమన్వయాన్ని చాటి ఎన్నికలకు ఏకతాటిగా ముందుకెలుతున్నామనే సంకేతాలు ప్రతిపక్ష పార్టీలకు ఇవ్వాలనే ప్రయత్నం చేస్తున్నారు.

రాష్ట్ర పార్టీ ఆదేశాల మేరకు ..

పీసీసీ అధ్యక్షుడు మహేశ్‌కుమార్‌ ఆధ్వర్యంలో ఇటీవల హైదరాబాద్‌లో నిర్వహించిన సమావేశంలో డీసీసీ అధ్యక్షులు పాల్గొనగా జిల్లా నుంచి నరేశ్‌ జాదవ్‌ కూడా హాజరయ్యారు. జిల్లాలో నేతలందరినీ సమన్వయం చేసుకోవాలని అధిష్టానం ఆదేశించింది. స్థానిక సంస్థల ఎన్నికల్లో పార్టీ విజయం కోసం కలిసికట్టుగా ముందుకెళ్లాలని స్పష్టం చేసింది. ఈ మేరకు జిల్లాలో ముఖ్య నేతలందరినీ ఆయన కలుస్తున్నారు.

సీఎం టూర్‌ నేపథ్యంలో ..

సీఎం రేవంత్‌ రెడ్డి డిసెంబర్‌ 4న జిల్లాకు రానున్న నేపథ్యంలో జిల్లా కేంద్రంలో బహిరంగ సభ నిర్వహణ, అభివృద్ధి కార్యక్రమాల ప్రారంభోత్సవాలు, శంకుస్థాపనల విషయంలోనూ ఆదివారం నిర్వహించనున్న సమావేశంలో ముఖ్య నేతలంతా కలిసి చర్చించనున్నారు. సభ విజయవంతం చేయడం ఇప్పుడు పార్టీ నేతల భుజస్కంధాలపై ఉంది. ఈ నేపథ్యంలో నరేశ్‌జాదవ్‌ ప్రత్యేక చొరవ చూపుతున్నారు. అంతేకాకుండా జిల్లాకేంద్రంలో పార్టీ ఆఫీస్‌ ప్రారంభించేందుకు కూడా కార్యాచరణ చేస్తున్నారు. పార్టీ ఆఫీస్‌ కేంద్రంగానే కార్యకలాపాలు ఉండాలనే దిశగా ప్రయత్నాలు సాగుతున్నాయి.