విద్యార్థినిని వేధించిన వ్యక్తిపై అట్రాసిటీ కేసు

ఆదిలాబాద్‌టౌన్‌: పట్టణంలోని విద్యానగర్‌లోని పారామెడికల్‌ కళాశాలలో చదువుతున్న ఓ విద్యార్థిని ప్రేమ పేరిట వేధింపులకు గురిచేసిన యువకుడిపై అట్రాసిటీ కేసు నమోదు చేసినట్లు డీఎస్పీ ఎల్‌.జీవన్‌రెడ్డి తెలిపారు. ఆయన కథనం ప్రకారం.. పట్టణానికి చెందిన ఫైజాన్‌.. నెల క్రితం కళాశాలలో పరీక్ష ఫీజు కట్టడానికి వచ్చిన విద్యార్థిని ప్రేమిస్తున్నానని ఇబ్బందులకు గురిచేశాడు. చేతిలో ఉన్న సెల్‌ఫోన్‌ను తీసుకుని పగులగొట్టాడు. బాధితురాలి ఫిర్యాదుతో శుక్రవారం కేసు నమోదు చేసి ఫైజాన్‌ను అరెస్ట్‌ చేసినట్లు తెలిపారు.

ప్రీలాన్స్‌ జర్నలిస్టుపై..

ఆదిలాబాద్‌రూరల్‌: పట్టణానికి చెందిన ప్రీలాన్స్‌ జర్నలిస్టు ఫిరోజ్‌ఖాన్‌పై అట్రాసిటీ కేసు నమోదు చేసి రిమాండ్‌కు తరలించినట్లు డీఎస్పీ ఎల్‌.జీవన్‌రెడ్డి తెలిపారు. ఆయన కథనం ప్రకారం.. ఈనెల 26న సాయంత్రం ఫిరోజ్‌ఖాన్‌తోపాటు మరో వ్యక్తి ఫుడ్‌ ఇన్‌స్పెక్టర్‌ కార్యాలయానికి వెళ్లారు. సరిగా డ్యూటీ చేయడం లేదని రెస్టారెంట్లు తనిఖీ చేయడం లేదని బెదిరించారు. రూ.10వేలు ఇవ్వాలని డిమాండ్‌ చేసినట్లు పుడ్‌ ఇన్‌స్పెక్టర్‌ ప్రత్యూష మావల పీఎస్‌లో ఫిర్యాదు చేసింది. విధులకు ఆటంకం కలిగించడంతోపాటు కులంపేరుతో దూషించారని ఫిర్యాదులో పేర్కొన్నారు. శుక్రవారం కారు నిలిపిన చోట ఫొటో తీసి, అధికారిగా ఉండి బ్లాక్‌ఫిల్మ్‌ పెట్టావని వార్త రాసి అధికారికే పోస్టు చేశారు.

‘రైతుల ఆత్మహత్యలను

పట్టించుకోని ప్రభుత్వం’

నేరడిగొండ: రైతుల ఆత్మహత్యల గోసను రాష్ట్ర ప్రభుత్వం పట్టించుకోవడం లేదని రైతు ఆత్మహత్యల నివారణ కమిటీ, రైతు స్వరాజ్యవేదిక జిల్లా అధ్యక్షుడు సంగెపు బొర్రన్న అన్నారు. మండలంలోని కిష్టాపూర్‌కు చెందిన కౌలు రైతు సోలాంకి శ్రీకాంత్‌ ఇటీవల ఉరేసుకుని ఆత్మహత్మ చేసుకోగా, శనివారం బాధిత కుటుంబాన్ని పరామర్శించారు. రెండు మూడేళ్లుగా పంట దిగుబడి రాలేదని మనోవేదనకు గురై ఉరేసుకున్నాడు. పంటకు సంబంధించిన వివరాలు నమోదు చేసుకున్నారు. బాధిత కుటుంబానికి జీవో నం.194 ప్రకారం రూ.6లక్షల పరిహారం అందించి ఆదుకోవాలని కోరారు. కుటుంబ యజమానురాలికి నెలకు రూ.5వేల పెన్షన్‌ ఇవ్వాలని పేర్కొన్నారు. నాయకులు బుపేందర్‌, సంతోష్‌, ప్రమోద్‌ ఉన్నారు.

బీజేపీ జిల్లా ఇన్‌చార్జీల నియామకం

ఆదిలాబాద్‌: బీజేపీ రాష్ట్రవ్యాప్తంగా జిల్లా ఇన్‌చార్జీలను శనివారం నియమించింది. ఈమేరకు పార్టీ రాష్ట్ర ప్రధాన కార్యదర్శి ఎన్‌.గౌతమ్‌రావు ఉత్తర్వులు జారీ చేశారు. ఆదిలాబాద్‌కు మాజీ ఎమ్మెల్యే అరుణతార, మంచిర్యాలకు కె.ఓదెలు, నిర్మల్‌కు గోపిడి స్రవంతిరెడ్డి, కుమురంభీం ఆసిఫాబాద్‌ జిల్లాకు కోమల ఆంజనేయులను నియమించారు.