బాలిక అదృశ్యం కలకలం

దండేపల్లి: ఇంటిముందు ఆడుకుంటున్న ఏడేళ్ల బాలిక మిస్సింగ్‌ ఘటన మండలంలో కలకలం రేపింది. వివరాలు.. మండలంలోని నంబాల గ్రామానికి చెందిన మేకల కాపరి శనిగారపు శేఖర్‌–రజిత దంపతుల కూతురు మహన్విత (7) సోమవారం రాత్రి 7గంటల ప్రాంతంలో ఇంటిముందు ఆడుకుంది. కొద్దిసేపటి తర్వాత కనిపించక పోవడంతో తల్లిదండ్రులు, స్థానికులు ఆమె ఆచూకీ కోసం చుట్టుపక్కల వెతికారు. పోలీసులకు సమాచారం ఇచ్చారు. లక్సెట్టిపేట సీఐ రమణమూర్తి, దండేపల్లి ఎస్సై తహసినొద్దీన్‌, పోలీసు సిబ్బంది నంబాల గ్రామానికి చేరుకుని బాలిక ఇంటికి వెళ్లి తల్లిదండ్రులు, స్థానికులతో మాట్లాడారు. బాలిక మిస్సింగ్‌పై అన్ని కోణాల్లో విచారణ చేపట్టారు. మంగళవారం డాగ్‌స్క్వాడ్‌తో తనిఖీలు నిర్వహించారు. రాత్రి మంచిర్యాల ఏసీపీ ప్రకాశ్‌ నంబాలకు వెళ్లి ఘటనపై ఆరా తీశారు. రాత్రి వరకూ బాలిక ఆచూకీ లభించలేదు.