డీసీసీ పగ్గాలు.. నరేశ్‌ జాదవ్‌కే

సాక్షి,ఆదిలాబాద్‌: ఆదిలాబాద్‌ జిల్లా కాంగ్రెస్‌ కమిటీ (డీసీసీ) పగ్గాలు ఆ పార్టీకి చెందిన సీనియర్‌ నేత నరేశ్‌ జాదవ్‌ దక్కాయి. ఏఐసీసీ శనివారం విడుదల చేసిన రాష్ట్ర వ్యాప్త జిల్లాల అధ్యక్షుల జాబితాలో ఆయనకు చోటు దక్కింది. ఈ పదవీ కోసం పలువురు పార్టీ నేతలు విస్తృతంగా ప్రయత్నాలు చేశారు. అయితే అధిష్టానం పార్టీ విధేయతకు పట్టం కట్టినట్లు తెలుస్తోంది. సరైన అవకాశాలు రాకున్నా పార్టీని అంటిపెట్టుకుని ఉన్న నరేశ్‌వైపే మొగ్గు చూపింది. గిరిజన లంబాడా సామాజిక వర్గానికి చెందిన ఈయనకు ఆదిలాబాద్‌ నుంచి అవకాశం కల్పించారు.

ఆశావహులు అనేకం..

కాంగ్రెస్‌ జిల్లా అధ్యక్ష పదవి కోసం పార్టీ ఆదిలాబాద్‌ నియోజకవర్గ ఇన్‌చార్జి కంది శ్రీనివాసరెడ్డి, కిసాన్‌ కాంగ్రెస్‌ రాష్ట్ర ప్రధాన కార్యదర్శి బోరంచు శ్రీకాంత్‌రెడ్డి, మాజీ జెడ్పీటీసీ గోక గణేశ్‌రెడ్డి, ఖానాపూర్‌ ఎమ్మెల్యే వెడ్మ బొజ్జు, పార్టీ రాష్ట్ర ఉపాధ్యక్షురాలు ఆత్రం సుగుణతో పాటు పలువురు దరఖాస్తు చేసుకున్నారు. ఇందులో ఎమ్మెల్యే వెడ్మ బొజ్జుకు నిర్మల్‌ జిల్లా అధ్యక్ష స్థానం దక్కగా, ఆత్రం సుగుణకు కుమురంభీం ఆసిఫాబాద్‌ జిల్లా అధ్యక్ష బాధ్యతలు అప్పగించారు. ఈ ఇరువురు గిరిజన ఆదివాసీ గోండు సామాజిక వర్గానికి చెందిన వారు. ఇక మంచిర్యాలలో పిన్నింటి రఘునాథ్‌రెడ్డికి అవకాశం కల్పించారు. ఉమ్మడి ఆదిలాబాద్‌ జిల్లాలో ఆయా సామాజిక సమీకరణల ఆధారంగా ఈ పదవులు కేటాయించగా గిరిజన సామాజిక వర్గంలో లంబాడాలకు ఒకటి, ఆదివాసీలకు రెండు, ఓసీ సామాజిక వర్గానికి ఒకటి చొప్పున కేటాయించారు.