పట్టణంలో కలిసినా.. పల్లె కంటే అధ్వానం

పట్టించుకోవడం లేదు

మా గ్రామాన్ని పట్టణంలో విలీనం చేయడంతో ఇక సౌకర్యాలు మెరుగపడతాయని ఎంతో సంబరపడ్డాం. కానీ పరిస్థితి భిన్నంగా ఉంది. రెండేళ్లుగా వీధి దీపాలు వెలగడం లేదు. రోడ్లపై ఎక్కడి చెత్త అక్కడ పేరుకుపోతుంది. డ్రెయినేజీలు శుభ్రం చేసే కార్మికులు కనిపిస్తారే తప్ప అధికారులేవరూ ఇటువైపు కన్నెత్తి చూడడం లేదు. మా సమస్యలు ఎవరికి చెప్పుకోవాలో తెలియని పరిస్థితి.

– దర్శనాల వెంకటి, రాంపూర్‌ కాలనీవాసి

ప్రత్యేక దృష్టి సారిస్తాం

పట్టణ అభివృద్ధి కోసం ప్రభుత్వం ఇటీవల రూ.18.70 కోట్ల నిధులువిడుదల చేసింది. వాటితో పనులు చేపట్టేందుకు సిబ్బందితో సర్వే నిర్వహిస్తున్నాం. విలీన కాలనీలు అభివృద్ధికి దూరంగా ఉన్నందున వాటికి అత్యంత ప్రాధాన్యత ఇచ్చి నిధులు కేటాయిస్తాం. సమస్యలు పరిష్కరించేలా ప్రత్యేక దృష్టి సారిస్తాం.

– సీవీఎన్‌. రాజు, మున్సిపల్‌ కమిషనర్‌

గ్రామ పంచాయతీ పరిధిలో ఉన్న కాలనీలను మున్సిపల్‌లో విలీనం చేయడంతో ఇక వసతులు మెరుగుపడుతాయని అక్కడి ప్రజలు ఎంతో సంతోషించారు. అయితే ఏళ్లు గడుస్తున్నా ఆయా కాలనీలు రోడ్లు, డ్రెయినేజీలు వంటి కనీస వసతులకు నోచుకోవడం లేదు. చాలా చోట్ల గతుకుల రోడ్లే దర్శనమిస్తున్నాయి. అలాగే డ్రెయినేజీలు లేక నీరంతా రోడ్లపైనే దుర్గంధం వెదజల్లుతోంది. ఇవి దోమలకు అవాసంగా మారి వ్యాధుల ప్రబలతకు కారణమవుతున్నాయి. కనీసం వీధి దీపాలు సైతం వెలగని దుస్థితి. ఇలా అసౌకర్యాలతో కూడిన ఆ కాలనీలు చెప్పుకునేందుకు పట్టణంలోనే ఉన్నా పరిస్థితి మాత్రం పల్లెలకంటే అధ్వానమనే విమర్శలు వినిపిస్తున్నాయి.

విలీనమై ఆరేళ్లవుతున్నా...

2019 మున్సిపల్‌ ఎన్నికల సమయంలో మావల మేజర్‌ గ్రామ పంచాయతీలో ఉన్న కేఆర్‌కే, దస్నాపూర్‌, టీచర్స్‌కాలనీ, సుభాష్‌నగర్‌, కై లాస్‌నగర్‌, రాంనగర్‌, హన్‌మాన్‌నగర్‌, 170 సర్వేనంబర్‌, టైల ర్స్‌ కాలనీ, న్యూహౌసింగ్‌బోర్డు కాలనీ, గ్రీన్‌సిటీ, కోజా కాలనీ, పిట్టలవాడ, దుర్గానగర్‌ వంటి కాలనీలతో పాటు ఆదిలాబాద్‌ రూరల్‌ మండలంలోని అనుకుంట, బంగారుగూడ, రాంపూర్‌ గ్రామాలతో పాటు కచ్‌కంటి గ్రామ పంచాయతీ పరిధిలోని అటెండర్స్‌ కాలనీని మున్సిపల్‌లో విలీనం చేశారు. వాటి పరిధిలో నిర్వహించిన ఎన్నికల్లో గెలుపొందిన కౌన్సిలర్ల పదవీ కాలం సైతం ముగిసింది. అయితే విలీనమై ఆరేళ్లు గడిచినా ఇంకా కనీస వసతులకు నోచుకోని పరిస్థితి. పంచాయతీలుగా ఉన్న సమయంలో నిర్మించిన సీసీ రోడ్లే తప్ప కొత్తవి దాదాపు ఎక్కడా కనిపించడం లేదు. ఇక అంతర్గత రోడ్లు మట్టిదారులే కావడంతో వర్షాకాలం బురదమయంగా మారి నడువడానికి సైతం వీల్లేని పరిస్థితి ఉంటుంది. మరోవైపు డ్రెయినేజీలు లేక పలు చోట్ల మురుగునీరంతా రోడ్లపైనే దర్శనమిస్తోంది. అలంకారప్రాయంగా మారిన వీధి దీపాలు రాత్రివేళలో వెలుగులు పంచక అంధకారం అలుముకుంటుంది. ప్రజలకు నీటిని అందించే చేతిపంపులు పలుచోట్ల చెడిపోయినా చిన్నపాటి మరమ్మతులకు సైతం నోచుకోని దుస్థితి. ఇలాంటి అనేక సమస్యల నడుమ విలీన కాలనీల వాసులు ఇబ్బందులు పడుతూ కాలం వెల్లదీస్తున్నారు.

జిల్లాలో ఉన్న ఏకై క మున్సిపాలిటీ.. ఆదిలాబాద్‌. గ్రేడ్‌–1గా అప్‌గ్రేడ్‌ అయి కూడా ఏళ్లు గడుస్తున్నాయి. ఆ స్థాయిలో మాత్రం సౌకర్యాలు కనిపించని పరిస్థితి. అధికారులు ప్రత్యేక దృష్టి సారిస్తున్నామని చెబుతున్నా.. క్షేత్రస్థాయిలో సమస్యలు వారి పనితీరుకు అద్దం పడుతున్నాయి. – కై లాస్‌నగర్‌

ఆదిలాబాద్‌ మున్సిపల్‌ పరిధిలో..

మొత్తం వార్డులు: 49

జనాభా : 1,80,390

విలీన కాలనీలు : 15

విలీనమైన గ్రామాలు : 02

పట్టణంలో కలిసినా.. పల్లె కంటే అధ్వానం