టీఎస్‌ఎఫ్‌సీ బ్రాంచ్‌ వచ్చేస్తోంది..

సాక్షి,ఆదిలాబాద్‌: తెలంగాణ రాష్ట్ర ఫైనాన్స్‌ కార్పొరేషన్‌ (టీఎస్‌ఎఫ్‌సీ) బ్రాంచ్‌ కార్యాలయం గతంలో ఉమ్మడి జిల్లా కేంద్రంగా ఆదిలాబాద్‌లో కొనసాగేది. కొన్నేళ్ల క్రితం దీనిని మంచిర్యాలకు తరలించారు. తాజాగా మళ్లీ ఇక్కడి నుంచి కార్యకలాపాలు నిర్వహించే యోచనలో టీఎస్‌ఎఫ్‌సీ ఉంది. త్వరలోనే జిల్లా కేంద్రంగా అందుబాటులోకి రానున్నట్లు అధికార వర్గాలు వెల్లడిస్తున్నాయి.

ఇదీ పరిస్థితి..

రాష్ట్రంలో పారిశ్రామిక ఉన్నతి కోసం టీఎస్‌ఎఫ్‌సీ పనిచేస్తుంది. ప్రధానకార్యాలయం హైదరాబాద్‌లో ఉండగా, ఉమ్మడి జిల్లాలకు బ్రాంచ్‌ కార్యాలయాలు ఉన్నాయి. గతంలో ఆదిలాబాద్‌ కేంద్రంగా కొనసాగిన బ్రాంచ్‌ కార్యాలయం సొంత భవనంలో కార్యకలాపాలు నిర్వహించేది. కొన్నేళ్ల క్రితం ఆ కార్యాలయాన్ని మంచిర్యాలకు తరలించారు. దీంతో ఈ ప్రాంతంలో కొత్త పరిశ్రమల ఏర్పాటుకు విఘాతం ఏర్పడింది. తాజాగా టీఎస్‌ఎఫ్‌సీ తన కార్యకలాపాలను ఆదిలాబాద్‌ నుంచి కూడా నిర్వహించేందుకు యోచిస్తోంది. హైదరాబాద్‌ ప్రధాన కార్యాలయం ఈ విషయంలో ఆలోచన చేస్తుంది.

ఎస్‌ఎంఈలకు ప్రోత్సాహం..

చిన్న, మధ్యతరహా (ఎస్‌ఎంఈఎస్‌) పరిశ్రమల ఏ ర్పాటుకు టీఎస్‌ఎఫ్‌సీ ద్వారా రుణాలు ఇస్తుంది. ఆదిలాబాద్‌లో జిన్నింగ్‌,ప్రెస్సింగ్‌ మిల్లులు మిన హా పెద్దగా పరిశ్రమలు లేవు. ఒకప్పుడు ఈ ప్రాంతంలో పెద్ద ఎత్తున ఈ పరిశ్రమలు నడిచేవి. రానురాను చాలా వరకు పాతవి మూతపడ్డాయి. ఈ పరి స్థితుల్లోనే ఇక్కడి నుంచి టీఎస్‌ఎఫ్‌సీ బ్రాంచ్‌ కార్యాలయాన్ని మంచిర్యాలకు తరలించారు. అక్కడి నుంచే ఉమ్మడి జిల్లా కార్యకలాపాలు కొనసాగుతున్నాయి. అయితే ఈ ప్రాంతంలో కొత్తగా పరిశ్రమలు ఏర్పాటు చేయాలనుకునే వారికి దూరభారం తప్పడం లేదు. అలాగే ప్రోత్సాహం కరువైంది. ఈ క్రమంలో తాజాగా మళ్లీ ఇక్కడి నుంచి ఆ కార్యాలయం కార్యకలాపాలు నిర్వహించే యోచన ఉండటంతో శుభపరిణామంగా పరిగణిస్తున్నారు.

సొంత భవనం..

ఆదిలాబాద్‌లో టీఎస్‌ఎఫ్‌సీకి జిల్లా కోర్టు సముదా యం సమీపంలో సొంత భవనం ఉంది. గతంలో బ్రాంచ్‌ కార్యాలయం ఇదే భవనంలో కొనసాగింది. ఇక్కడి నుంచి మంచిర్యాలకు తరలించడంతో ఆ భవనాన్ని అద్దెకు ఇచ్చారు. ఇందులో ప్రస్తుతం సబ్‌ రిజిస్ట్రార్‌ కార్యాలయం కొనసాగుతుంది. టీఎస్‌ ఎఫ్‌సీ మళ్లీ ఇక్కడి నుంచి కార్యకలాపాలు నిర్వహించే యోచనలో ఉండడంతో సబ్‌ రిజిస్ట్రార్‌ కార్యాలయ భవనం ఖాళీ చేయాలని తాజాగా రిజిస్ట్రేషన్ల శాఖ డీఐజీ కార్యాలయానికి నోటీసు పంపించినట్లు తెలుస్తోంది. తక్షణం భవనం ఖాళీ చేయాలని అందులో పేర్కొన్నట్టుగా సమాచారం. ఇదే జరిగితే త్వరలోనే టీఎస్‌ఎఫ్‌సీ కార్యాలయం ఇక్కడి నుంచి కార్యకలాపాల నిర్వహణ మొదలయ్యే అవకాశం ఉందని ఆ శాఖాధికారులు పేర్కొంటున్నారు.

ఆదిలాబాద్‌లో కూడా కార్యకలాపాలు..

ఆదిలాబాద్‌ నుంచి కూడా కార్యకలాపాలు నిర్వహించాలని హెడ్‌ ఆఫీస్‌ యోచనలో ఉంది. ఇది ఎప్పటివరకు సాధ్యమవుతుందనే విషయంలో ఇప్పుడే చెప్పలేం. హెడ్‌ ఆఫీస్‌ నుంచి వచ్చే ఆదేశాలకు అనుగుణంగా ముందుకెళ్లడం

జరుగుతుంది. – డాక్టర్‌ శంకర్‌ లకావత్‌,

బ్రాంచ్‌ మేనేజర్‌, టీఎస్‌ఎఫ్‌సీ, మంచిర్యాల