అవార్డు జోష్‌..

కైలాస్‌నగర్‌: జలసంరక్షణలో ఆదర్శంగా నిలిచి రాష్ట్రపతి ద్రౌపది ముర్ము చేతుల మీదుగా జల్‌ సంచాయి– జన్‌ భాగిదారి జాతీయ పురస్కారం అందుకుని జిల్లాకు చేరుకున్న కలెక్టర్‌ రాజర్షిషాకు బుధవారం ఘన స్వాగతం లభించింది. స్థానిక ఆఫీసర్స్‌ క్లబ్‌ వద్ద అదనపు కలెక్టర్లు శ్యామలాదేవి, రాజేశ్వర్‌ పూలమొక్కలు అందజేసి స్వాగతం పలికారు. అక్కడి నుంచి కలెక్టర్‌ క్యాంపు కార్యాలయం వరకు జోష్‌గా విజయోత్సవ ర్యాలీ చేపట్టారు. జిల్లా అధికారులు, ఎన్జీవోల ప్రతినిధులు, ఉద్యోగులు, విద్యార్థులు డీజే పాటలకనుగుణంగా డ్యాన్స్‌ చేశారు. కలెక్టర్‌ దంపతులు కూడా స్టెప్పులు వేసి అందరిలో ఉత్సాహం నింపారు. అనంతరం క్యాంప్‌ కార్యాలయంలో కలెక్టర్‌ కేక్‌ కట్‌ చేశారు. రాష్ట్రపతి చేతుల మీదుగా అవార్డు అందుకోవడం గర్వంగా ఉందని తెలిపారు. అందరి సహకారంతోనే ఇది సాధ్యమైందని పేర్కొన్నారు. ఇందులో కలెక్టర్‌ సతీమణి, యాపల్‌గూడ బెటాలియన్‌ కమాండెంట్‌ నితికపంథ్‌, ఆర్డీవో స్రవంతి, జిల్లా అధికారుల సంఘం అధ్యక్షుడు మనోహర్‌ రావు, డీఆర్డీవో రాథోడ్‌ రవీందర్‌, జిల్లా సంక్షేమ అధికారి మిల్కా, తహసీల్దార్లు, ఎంపీడీవోలు, వివిధ శాఖల అధికారులు పాల్గొన్నారు.