అరచేతిలో ‘మీ సేవ’లు

అరచేతిలో ‘మీ సేవ’లు

నిర్మల్‌ఖిల్లా: రెవెన్యూ సేవలు పొందడానికి దరఖా స్తులు సమర్పించేందుకు మీసేవ కేంద్రాల చుట్టూ తిరిగే అవస్థలు ఇకనుంచి దూరం కానున్నాయి. మీసేవ కేంద్రాల ద్వారా అందే సేవలన్నీ నేరుగా వాట్సాప్‌లోనే అందుబాటులోకి రానున్నాయి. ఇంటి నుంచే ధ్రువీకరణ పత్రాలు, విద్యుత్‌ బిల్లులు, ఆస్తిపన్ను చెల్లింపులు, తదితర సేవలను సులభంగా పొందవచ్చు. ఈ సాంకేతిక విప్లవం ద్వారా ప్ర భుత్వ సేవలు మరింత చేరువ కానున్నాయి. రాష్ట్ర ప్రభుత్వం డిజిటల్‌ గవర్నెన్స్‌లో భాగంగా మరో విప్లవాత్మక ముందడుగు వేసింది. దీంతో ఉమ్మడి జిల్లాలోని దాదాపు 322 మీసేవ కేంద్రాల్లో అందించే అన్ని రకాల ప్రభుత్వ సేవలను ఇకపై నేరుగా వాట్సాప్‌ ద్వారా అందుబాటులోకి తెస్తోంది.

విప్లవాత్మక ముందడుగు...

ఐటీ, పరిశ్రమల శాఖ మంత్రి దుద్దిళ్ల శ్రీధర్‌బాబు ఈ కొత్త డిజిటల్‌ సేవను తాజాగా మంగళవారం హైదరాబాద్‌లో ప్రారంభించారు. రాష్ట్రంలో డిజిటల్‌ గవర్నెన్స్‌ను ముందంజలో ఉంచాలని, రాష్ట్ర పౌరులకు మరింత నాణ్యమైన సేవలందించేందుకు ముఖ్యమంత్రి నిర్దేశించిన లక్ష్యాలకు అనుగుణంగా ఈ చర్యలు తీసుకుంటున్నామని మంత్రి స్పష్టం చేశారు. మొదటి దశలో సర్టిఫికెట్‌ సేవలను వాట్సాప్‌లో పొందవచ్చు. క్రమంగా మీసేవ ప్లాట్‌ఫామ్‌ ద్వారా అందుబాటులో ఉన్న 580కు పైగా సేవలు కూడా వాట్సాప్‌ ఛానల్‌ కిందకు తీసుకొస్తారు. ఈ వినూత్న సేవతో ట్రాన్సెక్షన్లు సులభతరం కానున్నాయి.

అన్ని సేవలూ మీచేతిలోనే...

ఆదాయ, కుల, నివాస, జనన, మరణ ధ్రువీకరణ పత్రాలు, మార్కెట్‌ వాల్యూ సర్టిఫికెట్లు, మ్యారేజ్‌ రిజిస్ట్రేషన్‌ వంటి అన్నిరకాల సర్టిఫికెట్లకు వాట్సాప్‌ ద్వారా దరఖాస్తు చేసుకోవచ్చు. విద్యుత్‌, నీటి, ఆస్తి పన్ను, రెవెన్యూ, ఆర్టీఏ, పోలీసు, జీహెచ్‌ఎంసీ, హెచ్‌ఎమ్‌డీఏ, పౌరసరఫరాలు, పంచాయతీరాజ్‌, దేవాలయాల సేవలు పొందవచ్చు.

సేవలు ఎలా పనిచేస్తాయంటే..?

ఉన్నత చదువులకోసమో..ఉద్యోగానికి దరఖాస్తు చేసేందుకో.. విద్యార్థుల ప్రవేశాల కోసమో.. అన్నింటికీ కుల, ఆదాయ, నివాస ధ్రువీకరణ, తదితర పత్రాలు తప్పనిసరి.. వీటన్నింటికోసం ఇకనుంచీ రోజుల తరబడి వేచిచూడటం, మీసేవ కేంద్రాలు, రెవెన్యూ కార్యాలయాల చుట్టూ తిరగడం ఉండదు. వీటితో పాటు దాదాపు 35 శాఖల సేవలను మొబైల్‌ ద్వారా వాట్సాప్‌ నంబర్‌ నుంచే అందుబాటులోకి తెస్తున్నామని మంగళవారం హైదరాబాద్‌లో జరిగిన ప్రారంభ కార్యక్రమంలో రాష్ట్ర ఐటీశాఖ మంత్రి దుద్దిళ్ల శ్రీధర్‌బాబు వెల్లడించారు.