మందుల కోసం వెళ్లి తిరిగిరాని లోకాలకు

ఆదిలాబాద్‌టౌన్‌: రోడ్డు ప్రమాదంలో ప్రభుత్వ ఉపాధ్యాయుడు మృతి చెందిన సంఘటన జిల్లా కేంద్రంలో చోటు చేసుకుంది. కుటుంబ సభ్యులు, స్థానికులు తెలిపిన వివరాల మేరకు పట్టణంలోని శాంతినగర్‌లో నివాసం ఉంటున్న వడ్డాటి ప్రశాంత్‌ (31) ఖానాపూర్‌ ప్రభుత్వ పాఠశాలలో ఎస్జీటీ ఉపాధ్యాయుడిగా విధులు నిర్వహిస్తున్నాడు. ఆదివారం రాత్రి 11 గంటల ప్రాంతంలో మెడిసిన్‌కోసం బైక్‌పై ఓల్డ్‌బస్టాండ్‌ ప్రాంతానికి వెళ్లివస్తుండగా ఎదురుగా వేగంగా వచ్చిన ద్విచక్ర వాహనం ఢీకొట్టింది. తలకు తీవ్రగాయాలు కావడంతో గమనించిన స్థానికులు రిమ్స్‌ ఆస్పత్రికి తరలించారు. మెరుగైన చికిత్సకోసం కుటుంబ సభ్యులు హైదరాబాద్‌లోని గాంధీ ఆస్పత్రికి తరలించగా చికిత్స పొందుతూ మంగళవారం మృతి చెందాడు. 2017లో టీఆర్టీ ద్వారా ఉపాధ్యాయ కొలువు సాధించిన ప్రశాంత్‌కు భార్య, కుమార్తె ఉన్నారు. టీయూటీఎఫ్‌ అధ్యక్ష, ప్రధాన కార్యదర్శులు శ్రీకాంత్‌, జలేందర్‌రెడ్డి, పాఠశాల ప్రధానోపాధ్యాయుడు సంతోష్‌, ఉపాధ్యాయ సంఘాల నాయకులు బాధిత కుటుంబ సభ్యులకు ప్రగాఢ సానుభూతి తెలిపారు.