చదువుల తల్లి.. సాంకేతికతకు దూరం

బాసర: బాసర శ్రీ జ్ఞాన సరస్వతి అమ్మవారి ఆలయంలో ఆన్‌లైన్‌ సేవలు పూర్తిస్థాయిలో భక్తులకు అందుబాటులోకి రాలేదు. కేవలం అక్షరాభ్యాసానికి సంబంధించిన ఆన్‌లైన్‌ సేవలు మాత్రమే పాక్షికంగా భక్తులకు అందుబాటులో ఉన్నాయి. ఇతర ఆ ర్జిత సేవలు, వసతి గృహాలకు సంబంధించిన వివరాలు అందుబాటులో లేక భక్తులు తీవ్ర ఇబ్బందులు ఎదుర్కొంటున్నారు. ఆర్జిత సేవలు, అభిషేకం, కుంకుమార్చన, ఆశీర్వచనం, గదుల టికెట్ల జారీ, లడ్డూ, పులిహోర ప్రసాదాలకు సంబంధించిన టికె ట్లు ఇప్పటికీ పాత పద్ధతిలోనే ఇస్తుండడంతో భక్తులు గంటల తరబడి క్యూలో వేచి ఉండాల్సి వస్తోంది. రాజకీయ నాయకులు, పలుకుబడి ఉన్నవారు ఆలయ అధికారులపై ఒత్తిడి తెచ్చి తమకు అనుకూలంగా ఆఫ్‌లైన్‌లో ఆలయ గదులు, ఆర్జిత సేవలు కై వసం చేసుకుంటున్నారని భక్తులు ఆరోపిస్తున్నారు.

అక్రమాలకు చెక్‌...

ఆలయంలో ఆన్‌లైన్‌ వ్యవస్థ పూర్తిస్థాయిలో అందుబాటులోకి వస్తే దేవాదాయశాఖ నిధులు సక్రమంగా వినియోగంలోకి రావడంతో పాటు అక్రమాలకు చెక్‌ పడుతుందని భక్తులు ఆశాభావం వ్యక్తం చేస్తున్నారు. అంతేకాకుండా ఆలయ అభివృద్ధితో పాటు ఉద్యోగులు, సిబ్బంది క్రమశిక్షణ సైతం మెరుగుపడుతుందని అభిప్రాయం వ్యక్తం చేస్తున్నారు.

భక్తుల ఇబ్బందులు...

దేవస్థానం ఆధ్వర్యంలో అక్షరాభ్యాసం టికెట్ల జారీ, ఎంట్రో ల్యాబ్స్‌ ఆధ్వర్యంలో పాక్షికంగా సేవలు అందించేందుకు ప్రత్యేక యాప్‌ అందుబాటులో ఉన్నప్పటికీ సక్రమంగా పనిచేయక భక్తులు ఇబ్బందులకు గురవుతున్నారు. ఈ విషయంపై దేవస్థానం అధికారులు ఇటీవల పలు బ్యాంకులకు చెందిన అధికారులతో సంప్రదింపులు జరిపారు. డిసెంబర్‌లో పూర్తిస్థాయిలో ఆన్‌లైన్‌ సేవలు అందించే దిశగా అధికారులు ప్రణాళికలు చేపడుతున్నప్పటికీ కిందిస్థాయి ఉద్యోగుల వల్ల ఆ వ్యవస్థ పూర్తిస్థాయిలో వినియోగంలోకి వస్తుందా? అని భక్తులు అనుమానం వ్యక్తం చేస్తున్నారు.

ఉచిత లడ్డూ నిలిపివేత

సరస్వతీ అమ్మవారి చెంత అక్షరాభ్యాసం చేయించుకునే భక్తులకు ఉచిత లడ్డూ సరఫరా నిలిపివేయనున్నట్లు, వంద రూపాయల అభిషేకం లడ్డూ ధర రూ.150లకు పెంచనున్నట్లు అధికారులు ఉత్తర్వులు జారీ చేయడంతో సామాన్య భక్తుల్లో అసంతృప్తి నెలకొంది.

చదువుల తల్లి.. సాంకేతికతకు దూరం