● ఎకరాకు 7.62 నుంచి 10 క్వింటాళ్లకు కొనుగోళ్ల పెంపు ● ఎట్టకేలకు అనుమతి ఇచ్చిన ప్రభుత్వం ● ఓటీపీ విధానంపై రెండురోజుల్లో స్పష్టత

ఇచ్చోడ: సోయా దిగుబడులను ఎకరాకు 7.62 క్వింటాళ్లు కొనుగోలు చేయాలనే నిబంధనను ప్రభుత్వ ం ఎట్టకేలకు పెంచడంతో ఉమ్మడి జిల్లాలో సోయా సాగుచేసిన రైతులు ఊరట చెందుతున్నారు. ప్రభుత్వం విధించిన షరతులతో ఉమ్మడి జిల్లా వ్యాప్తంగా సోయా కొనుగోళ్లు ఊపందుకోలేదు. పంట విక్రయించడానికి మార్కెట్‌ యార్డుకు వచ్చిన రైతులు రోజుల తరబడి పడిగాపులు కాయాల్సి వచ్చింది. ప్రభుత్వం ఎట్టకేలకు ఎకరాకు 7.62 క్వింటాళ్లకు బదులు 10 క్వింటాళ్లు కొనుగోలు చేసేందుకు గ్రీన్‌సిగ్నల్‌ ఇవ్వడంతో ఊరటనిచ్చినట్లు అయ్యింది.

47 వేల క్వింటాళ్లు మాత్రమే కొనుగోలు...

పదిహేను రోజుల క్రితం ఆదిలాబాద్‌ జిల్లా వ్యాప్తంగా మార్క్‌ఫెడ్‌ ఆధ్వర్యంలో పది సోయా కొనుగో లు కేంద్రాలు ఏర్పాటు చేశారు. ప్రభుత్వ నిబంధనతో మార్కెట్‌లో నిల్వలు పేరుకుపోయి కొనుగోళ్లు తరచూ నిలిపివేశారు. దీంతో ఇప్పటి వరకు 47 వేల క్వింటాళ్ల సోయాలు మాత్రమే కొనుగోలు చేశా రు. ప్రభుత్వ అంచనా ప్రకారం ఇంకా 4 లక్షల 90 వేలక్వింటాళ్లసోయాలుకొనుగోలు చేయాల్సి ఉంది.

ఓటీపీ విధానంపై స్పష్టత...

సోయా విక్రయాల్లో బయోమెట్రిక్‌ విధానం ఆలస్యానికి కారణమైంది. పట్టాదారు వేలిముద్ర వేస్తేనే పంట కొనుగోలు చేశారు. రైతులు ఇబ్బందులకు గురయ్యారు. జిల్లా వ్యాప్తంగా ఓటీపీ విధానం ప్రవేశపెట్టాలని రైతుల నుంచి డిమాండ్‌ ఉంది. ఈ విధానం ద్వారా రైతు కుటుంబ సభ్యులెవరైనా పంట విక్రయించే వీలుంది. సోయా విక్రయాల్లో తలెత్తుతున్న ఇబ్బందులను అధిగమించడానికి ప్రభుత్వం ఓటీపీ విధానంపై కూడా రెండు, మూడు రోజుల్లో స్పష్టత ఇవ్వనున్నట్లు సమాచారం.

ఆదిలాబాద్‌ జిల్లాలో సోయా పంట వివరాలు

సాగు విస్తీర్ణం : 58 వేల ఎకరాలు

దిగుబడి అంచనా : 5.40 లక్షల క్వింటాళ్లు

మద్దతుధర: రూ.5,328

కొనుగోలు కేంద్రాలు : 10

అమ్మిన పంట దిగుబడులు : 47 వేల క్వింటాళ్లు

ఎకరాకు పది క్వింటాళ్లు..

సోయా ఎకరాకు 10 క్వింటాళ్లు కొనుగోలు చేయడానికి ప్రభుత్వం అనుమతి ఇచ్చింది. కొనుగోలు కేంద్రాల ఇన్‌చార్జీలకు పది క్వింటాళ్ల సోయాలు కొనుగోలుకు ఆదేశాలు ఇచ్చాం. ఓటీపీ విధానంపై ప్రభుత్వం నుంచి స్పష్టత వచ్చే అవకాశాలు ఉన్నాయి.

– ప్రవీణ్‌రెడ్డి, మార్క్‌ఫెడ్‌ డీఎం, ఆదిలాబాద్‌