యుద్ధ అభ్యాస్‌లో మనోడు

లక్ష్మణచాంద: ప్రపంచంలోనే అగ్రరాజ్యమైన అమెరికా సైనికులకు శిక్షణ ఇవ్వడమంటే సాదాసీదా విషయం కాదు. నిర్మల్‌ జిల్లా లక్ష్మణచాందకు చెందిన యువ ఆర్మీ జవాన్‌ నెర్షన్‌పెల్లి నరేష్‌కు అలాంటి సువర్ణావకాశం దక్కింది. లక్ష్మణచాందకు చెందిన నెర్షన్‌పెల్లి గంగన్న–లక్ష్మి దంపతుల చిన్నకుమారుడైన నరేష్‌ పదోతరగతి వరకు స్థానిక ప్రభుత్వ ఉన్నత పాఠశాలలో, సహకార జూనియర్‌ కళాశాలలో ఇంటర్‌ పూర్తిచేసి 2014లో ఆర్మీ జవాన్‌గా ఎంపికయ్యాడు. ప్రస్తుతం మద్రాస్‌ రెజిమెంట్‌ యూనిట్‌లో జనరల్‌ విభాగంలో నాయక్‌గా విధులు నిర్వర్తిస్తున్నాడు. ఆయుధాల వినియోగం, యుద్ధరంగంలో భారత సైనికులను మరింత నిష్ణాతులను చేసేందుకు కేంద్రం అభ్యాస్‌ 2025లో భాగంగా 450 మంది సైనికులను అమెరికాలోని అలస్కాకు పంపించింది. ఇందులో నరేష్‌కు అవకాశం దక్కింది. సెప్టెంబర్‌ 1 నుండి 15 వరకు అమెరికా సైనికులు వినియోగిస్తున్న పలురకాల ఆయుధాలపై మెలకువలు నేర్చుకున్నారు. భారత ఆర్మీ వినియోగిస్తున్న పలు రకాల వెపన్స్‌పై అమెరికా సైనికులకు శిక్షణ ఇచ్చినట్లు తెలిపారు.

సువర్ణ అవకాశం

అమెరికాకు వెళ్లడం గొప్ప సువర్ణావకాశంగా భావిస్తున్నా. అమెరికా సైనికుల నుంచి పలు మెలకువలు నేర్చుకోవడంతో పాటు మన వెపన్స్‌ గురించి వారికి శిక్షణ ఇచ్చా. వారితో కలిసి పలు విషయాలు నేర్చుకోవడం సంతోషంగా ఉంది. – నెర్షన్‌పెల్లి నరేష్‌,

ఆర్మీ నాయక్‌, లక్ష్మణచాంద, నిర్మల్‌