డుమ్మా వైద్యులపై ఫోకస్‌

ఆదిలాబాద్‌టౌన్‌: డుమ్మా వైద్యులకు చెక్‌ పెట్టేందుకు వైద్యారోగ్య శాఖ సిద్ధమవుతోంది. రాష్ట్రంలోని ఆయా బోధన ఆస్పత్రుల్లో విధులకు గైర్హాజరవుతున్న వారి వివరాలు ఇప్పటికే సేకరించింది. రాష్ట్రవ్యాప్తంగా 32 మందిని గుర్తించింది. వా రిని ఉద్యోగం నుంచి తొలగించేందుకు ఇటీవల చివరిసారిగా షోకాజ్‌ నోటీసు జారీ చేశారు. ఇందులో ఏడుగురు జిల్లాలోని రిమ్స్‌ వైద్య కళాశాలకు చెందిన వారు ఉన్నారు. వీరంతా విధుల్లో చేరి దీర్ఘకాలికంగా ఆస్పత్రి ముఖం చూడకపోవడంతో రోగులపై ప్రభావం చూపుతుంది.

ఏళ్లుగా విధులకు ఎగనామం..

2023 మేలో ప్రభుత్వం రెగ్యులర్‌ వైద్యాధికారుల నియామకాలు చేపట్టింది. ఇందులో రిమ్స్‌కు ఏడుగురిని కేటాయించగా, అందరూ రిపోర్టు చేశారు. ఇద్దరు విధుల్లో చేరారు. మిగతా ఐదుగురు రెండేళ్లకు పైగా ఎలాంటి సమాచారం లేకుండా గైర్హాజరవుతున్నారు. దీంతో రోగులకు ఇబ్బందులు తప్పడం లేదు. వీరితో పాటు 2020 నుంచి మరో వైద్యురాలు, 2024 నుంచి మరో ఇద్దరు వైద్యులు విధులకు ఎగనామం పెడుతున్నారు. 2023 నుంచి గైర్హాజరవుతున్న వారిలో పీడియాట్రిక్‌కు సంబంధించి అసిస్టెంట్‌ ప్రొఫెసర్‌ డాక్టర్‌ కృష్ణ సుంకం, వీర్ల స్వాతి, జనరల్‌ మెడిసిన్‌ విభాగం అసిస్టెంట్‌ ప్రొఫెసర్లు డాక్టర్‌ ఆరె సిద్ధార్థ, డాక్టర్‌ ఫైజాన్‌ అజ్నతుల్లా, అనస్తీషియా విభాగం అసిస్టెంట్‌ ప్రొఫెసర్‌ ఎమ్మడి ఉదయ్‌ ఉన్నారు. అలాగే 2020 జనవరి 1నుంచి గైనకాలజీ ట్యూటర్‌గా రెగ్యులర్‌ ఉద్యోగం సాధించిన డాక్టర్‌ స్వప్న, 2024 మార్చి 21 నుంచి అనస్తీషియా అసిస్టెంట్‌ ప్రొఫెసర్‌ డాక్టర్‌ జెన్ని ఎవెలిన్‌లు గైర్హాజరవుతున్నారు.

వైద్య సేవలపై ప్రభావం..

ప్రభుత్వం కొన్నేళ్ల తర్వాత రెగ్యులర్‌ వైద్యుల నియామకాలు చేపట్టింది. ఈ క్రమంలో రిమ్స్‌కు కేటాయించిన వారితో మేలు జరుగుతుందని అంతా భావించారు. అయితే ఈ డుమ్మా వైద్యుల కారణంగా వైద్యసేవలపై ప్రభావం పడుతుంది. పీడియాట్రిక్‌ విభాగం అన్ని సీజన్లలోనూ కిటకిటలాడుతుంది. ఇద్దరు పీడియాట్రిక్‌ల రాకతో మేలు చేకూరుతుందని భావించినప్పటికీ.. వారు రెండేళ్లకు పైగా విధులకు హాజరు కావడం లేదు. దీంతోపాటు జనరల్‌ మెడిసిన్‌ విభాగం సైతం ప్రాధాన్యత ఉంటుంది. దీనికి సంబంధించి ఇద్దరు వైద్యులను కేటాయించారు. వీరుకూడా ఆస్పత్రి ముఖం చూడటం లేదు. అనస్తీషియా, గైనిక్‌ విభాగాలు కూడా కీలకమే. ప్రాధాన్యత పోస్టులు ఉన్నవారు విధులకు ఎగనామం పెట్టడంతో ప్రస్తుతం పనిచేస్తున్న వైద్యులకు పనిభారంగా మారింది.

తొలగింపునకు రంగం సిద్ధం..

ఏళ్లుగా విధులకు హాజరుకాని ఏడుగురు వైద్యులను ఉద్యోగం నుంచి తొలగించేందుకు రంగం సిద్ధమవుతున్నట్లు తెలుస్తోంది. వారికి ఇచ్చిన షోకాజు నోటీసులో విధులకు హాజరు కాకపోతే రాజీనామా చేసినట్లుగా పరిగణించడం జరుగుతుందని రాష్ట్ర వైద్యారోగ్య శాఖ అధికారులు నోటీసులో పేర్కొన్నారు. వీరు ఇతర జిల్లాల నుంచి జిల్లాకు వచ్చేందుకు సుముఖంగా లేకపోవడంతోనే హాజరు కావడం లేదని తెలుస్తోంది. ప్రైవేట్‌ క్లినిక్‌లు ఏర్పాటు చేసుకొని ఆయా ప్రాంతాల్లో ఉన్నట్లు సమాచారం. వీరికి ఇప్పటికే పలుమార్లు రిమ్స్‌ అధికారులతో పాటు రాష్ట్ర వైద్యారోగ్య శాఖాధికారులు సైతం నోటీసులు జారీ చేశారు. వారం, పది రోజుల్లో ఈ వ్యవహారంపై స్పష్టత రానుంది.

ఇప్పటికే పలుమార్లు షోకాజ్‌..

దీర్ఘకాలికంగా గైర్హాజరవుతున్న వైద్యుల వివరాలను ఉన్నతాధికారుల సూచన మేరకు డీఎంఈకి పంపించాం. గైర్హాజరవుతున్న వైద్యులకు ఇదివరకే పలుమార్లు షోకాజు నోటీసులు జారీ చేశాం. ప్రస్తుతం డీఎంఈ నుంచి షోకాజ్‌ నోటీసులు అందించారు.

– జైసింగ్‌ రాథోడ్‌, రిమ్స్‌ డైరెక్టర్‌

డుమ్మా వైద్యులపై ఫోకస్‌